ಟೀ ಜೊತೆ ಸವಿಯಲು-ಆಲೂ ಚೀಸ್ ಬಾಲ್

ಆಲೂ ಬೋಂಡಕ್ಕಿಂತ ಸ್ವಲ್ಪ ಭಿನ್ನವಾದ ತಿಂಡಿಯಿದು. ಇದನ್ನು ಆಲೂಗಡ್ಡೆ, ಚೀಸ್ ಹಾಗೂ ಬ್ರೆಡ್ ಈ ಮೂರು ಪ್ರಮುಖ ಸಾಮಾಗ್ರಿಗಳನ್ನು ಹಾಕಿ ಮಾಡಲಾಗುವುದು. ಇದನ್ನು ಮಾಡಲು ಅಧಿಕ ಸಾಮಾಗ್ರಿಗಳು ಬೇಕಾಗಿಲ್ಲ, ಹೆಚ್ಚಿನ ಶ್ರಮ ಪಡಬೇಕಾಗಿಲ್ಲ. ಅರ್ಧ ಗಂಟೆಯ ಒಳಗೆ ಈ ತಿಂಡಿಯನ್ನು ತಯಾರಿಸಬಹುದು.

ಟೀ ಜೊತೆ ಸವಿಯಲು ಏನಾದರೂ ಹೊಸ ರುಚಿಯ ತಿಂಡಿ ಮಾಡಬಯಸುವುದಾದರೆ ಇದನ್ನು ಟ್ರೈ ಮಾಡಬಹುದು:

ಬೇಕಾಗುವ ಸಾಮಾಗ್ರಿಗಳು
ಆಲೂಗೆಡ್ಡೆ4
ಚೀಸ್ 1 ಕಪ್
ಹಸಿ ಮೆಣಸಿನ ಕಾಯಿ 2
ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಕರಿ ಮೆಣಸಿನ ಪುಡಿ ಅರ್ಧ ಚಮಚ
ಬ್ರೆಡ್ ತುಂಡು 10-12 ಪೀಸ್
ಎಣ್ಣೆ 1 ಕಪ್

ತಯಾರಿಸುವ ವಿಧಾನ:

1. ಒಂದು ಬಟ್ಟಲಿನಲ್ಲಿ ಬೇಯಿಸಿ, ಸಿಪ್ಪೆ ಸುಲಿದ ಆಲೂಗಡ್ಡೆ ಹಾಕಿ ಚೆನ್ನಾಗಿ ಹಿಸುಕಬೇಕು. ನಂತರ ಚೀಸ್ ಮತ್ತು ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಕಲೆಸಬೇಕು.

2. ನಂತರ ಹಸಿ ಮೆಣಸಿನಕಾಯಿ, ಕರಿ ಮೆಣಸಿನ ಪುಡಿ, ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರಣ ಮಾಡಿ.

3. ಬ್ರೆಡ್ ಚೂರುಗಳ ತುದಿಯ ಕಪ್ಪು ಭಾಗವನ್ನು ತೆಗೆದು ನಂತರ ಅದನ್ನು ನೀರಿನಲ್ಲಿ ಅದ್ದಿ, ನೀರನ್ನು ಹಿಂಡಿ ಅದರಲ್ಲಿ ಆಲೂಗಡ್ಡೆ-ಚೀಸ್ ಮಿಶ್ರಣವನ್ನು ಹಾಕಿ ಉಂಡೆ ಕಟ್ಟಿ.

4. ಎಣ್ಣೆಯನ್ನು ಬಾಣಲಿಯಲ್ಲಿ ಹಾಕಿ ಕಾಯಿಸಿ, ನಂತರ ಉಂಡೆಗಳನ್ನು ಹಾಕಿ ಕಂದು ಬಣ್ಣ ಬರುವಾಗ ತೆಗೆದರೆ ಆಲೂ-ಚೀಸ್ ಉಂಡೆ ರೆಡಿ.
ಇದನ್ನು ಮಾಡಿ ಟೀ ಜೊತೆ ಸವಿಯಲು ರುಚಿಯಾಗಿರುತ್ತದೆ.