ಟೀ ಜೊತೆ ಸವಿಯಲು ಈರುಳ್ಳಿ ಸಮೋಸ

Snacks

oi-Reena

By Hema S

Updated: Tuesday, August 21, 2012, 16:52 [IST]

ಸಮೋಸವನ್ನು ಅನೇಕ ಬಗೆಯಲ್ಲಿ ತಯಾರಿಸಬಹುದು. ಸಮೋಸವನ್ನು ಮಾಡುವ ವಿಧಾನ ಒಂದೇ ಆದರೂ ಅದರಲ್ಲಿ ಹಾಕುವ ಸಾಮಾಗ್ರಿಗಳನ್ನು ಬದಲಾಯಿಸಿದರೆ ಭಿನ್ನ ರುಚಿಯ ಸಮೋಸ ಸವಿಯಬಹುದು. ಸಾಯಾಂಕಾಲದ ತಿಂಡಿ ಜೊತೆ ಈರುಳ್ಳಿ ಸಮೋಸ ಸವಿಯಲು ತುಂಬಾ ರುಚಿಕರವಾಗಿದ್ದು ಇದನ್ನು ಮಾಡುವ ವಿಧಾನ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು:
ಮೈದಾ 1 ಕಪ್
ಒಂದು ಚಮಚ ಬಿಸಿ ಎಣ್ಣೆ
ಈರುಳ್ಳಿ 4 (ಕತ್ತರಿಸಿದ್ದು)
ಅರಿಶಿಣ ಪುಡಿ 1/4 ಚಮಚ
ಕೊತ್ತಂಬರಿ ಪುಡಿ 1/4 ಚಮಚ
ಗರಂ ಮಸಾಲ 1 ಚಮಚ
ಕೆಂಪು ಮೆಣಸಿನ ಪುಡಿ 1 ಚಮಚ
ಜೀರಿಗೆ ಪುಡಿ 1 ಚಮಚ
ಸಕ್ಕರೆ 3 ಚಮಚ
ನಿಂಬೆ ರಸ 3 ಚಮಚ
ಚಿಟಿಕೆಯಷ್ಟು ಇಂಗು
ರುಚಿಗೆ ತಕ್ಕ ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:

1. ಮೈದಾ, ರುಚಿಗೆ ತಕ್ಕ ಉಪ್ಪು, ಒಂದು ಚಮಚ ಬಿಸಿ ಎಣ್ಣೆಯನ್ನು ಹಾಕಿ ಮಿಶ್ರ ಮಾಡಿ ಚೆನ್ನಾಗಿ ಕಲೆಸಬೇಕು.

2. ಈಗ ಬಾಣಲೆಲ್ಲಿ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಈರುಳ್ಳಿ ಹಾಕಿ ಕಂದು ಬಣ್ಣಕ್ಕೆ ಹುರಿಯಬೇಕು. ನಂತರ ಈರುಳ್ಳಿಗೆ ಅರಿಶಿಣ ಪುಡಿ, ಗರಂ ಮಸಾಲ, ಕೊತ್ತಂಬರಿ ಪುಡಿ, ಕೆಂಪು ಮೆಣಸಿನ ಪುಡಿ, ಜೀರಿಗೆ ಪುಡಿ, ಚಿಟಿಕೆಯಷ್ಟು ಇಂಗು, ಸಕ್ಕರೆ, ನಿಂಬೆ ರಸ ಹಾಕಿ ಮಿಶ್ರ ಮಾಡಿ ಉರಿಯಿಂದ ಪಾತ್ರೆಯನ್ನು ತೆಗೆಯಬೇಕು.

3. ನಂತರ ಹಿಟ್ಟನ್ನು ಸಣ್ಣ ಸಣ್ಣ ಉಂಡೆಗಳಾಗಿ ಮಾಡಿಕೊಳ್ಳಬೇಕು.

4. ಬಾಣಲೆಯಲ್ಲಿ ಅರ್ಧದಷ್ಟು ಎಣ್ಣೆ ಹಾಕಿ ಕಾಯಲು ಇಡಬೇಕು.

5. ಉಂಡೆಯನ್ನು ವೃತ್ತಾಕಾರವಾಗಿ ಒತ್ತಿಕೊಂಡು ಚಾಕುವಿನ ಸಹಾಯದಿಂದ ಅರ್ಧ ಕತ್ತರಿಸಬೇಕು.

6. ಅರ್ಧ ಭಾಗಕ್ಕೆ ಹುರಿದ ಈರುಳ್ಳಿ ಮಿಶ್ರಣ ತುಂಬಿ ಇನ್ನರ್ಧ ಭಾಗವನ್ನು ಸುರುಳಿ ಸುತ್ತಿ ತ್ರಿಕೋನಾಕಾರವಾಗಿ ಮಾಡಿ ಎಣ್ಣೆಗೆ ಬಿಡಬೇಕು.

ಎಣ್ಣೆಯಲ್ಲಿ ಸಮೋಸ ಕೆಂಪಗಾಗುವವರೆಗೂ ಕರಿದು ಆಮೇಲೆ ಪೇಪರ್ ಮೇಲೆ ಎಣ್ಣೆ ಹೀರಿಕೊಳ್ಳಲು ಬಿಡಬೇಕು. ಈ ರೀತಿ ಮಾಡಿದರೆ ಈರುಳ್ಳಿ ಸಮೋಸಾ ಸಾಯಾಂಕಾಲದ ಟೀ ಜೊತೆ ಸವಿಯಲು ರೆಡಿ.