ಗುಜರಾತ್‌ನ ಸಾಂಪ್ರದಾಯಕ ತಿಂಡಿ-ಡೋಕಲಾ

ಡೋಕಲಾ ಗುಜರಾತ್ ರಾಜ್ಯದ ಸಾಂಪ್ರದಾಯಕ ತಿಂಡಿಯಾಗಿದ್ದು ಇದನ್ನು ಕಟಲೆ ಹಿಟ್ಟಿನಿಂದ ತಯಾರಿಸಲಾಗುವುದು. ತುಂಬಾ ರುಚಿಕರವಾದ ಈ ತಿಂಡಿಯನ್ನು ಮಕ್ಕಳಿಗೆ ಬೆಳಗ್ಗಿನ ತಿಂಡಿಯಾಗಿ ಕೊಡಬಹುದು, ಅಲ್ಲದೆ ಇದನ್ನು ಸಾಯಾಂಕಾಲದ ಟೀ ಜೊತೆ ತಿನ್ನಲು ಕೂಡ ತುಂಬಾ ರುಚಿಕರವಾಗಿರುತ್ತದೆ. ಇದನ್ನು ಸುಲಭವಾಗಿ ತಯಾರಿಸಬಹುದಾಗಿದ್ದು ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
* 1 ಕಪ್ ಕಡಲೆ ಹಿಟ್ಟು
* 1/2 ಕಪ್ ಮೊಸರು
* ಅರ್ಧ ಕಪ್ ನೀರು
* ಒಂದು ಚಮಚ ಶುಂಠಿ ಪೇಸ್ಟ್
* ಒಂದು ಚಮಚ ಹಸಿಮೆಣಸಿನ ಕಾಯಿ ಪೇಸ್ಟ್
* ಎರಡು ಚಮಚ ಎಣ್ಣೆ
* 1 ಚಮಚ ENO ಫ್ರೂಟ್ ಸಾಲ್ಟ್ (ಫುಡ್ ಮಾರ್ಕೆಟ್ ನಲ್ಲಿ ದೊರೆಯುತ್ತದೆ)
* ರುಚಿಗೆ ತಕ್ಕ ಉಪ್ಪು

ಒಗ್ಗರಣೆ:
* ಒಂದು ಚಮಚ ಸಾಸಿವೆ
* 1 ಚಮಚ ಜೀರಿಗೆ (ಆಯ್ಕೆ)
* 5-6 ಒಣ ಮೆಣಸಿನ ಕಾಯಿ
* ಒಂದು ಚಮಚ ಸಕ್ಕರೆ
* ಒಂದು ಚಮಚ ನಿಂಬೆರಸ
* ಕರಿಬೇವಿನ ಎಲೆ
* 3-4 ಚಮಚ ಎಣ್ಣೆ

ಅಲಂಕಾರಕ್ಕೆ :
* 2 ಚಮಚ ತುರಿದ ತೆಂಗಿನಕಾಯಿ
* ಸ್ವಲ್ಪ ಕೊತ್ತಂಬರಿ ಸೊಪ್ಪು

ತಯಾರಿಸುವ ವಿಧಾನ:

1. ಒಂದು ಪಾತ್ರೆಯಲ್ಲಿ ಕಡಲೆ ಹಿಟ್ಟು, ಎಣ್ಣೆ, ENO ಫ್ರೂಟ್ ಸಾಲ್ಟ್ ಹಾಕಿ ಸ್ಪೂನ್ ನಲ್ಲಿ ಮಿಶ್ರ ಮಾಡಬೇಕು. ನಂತರ ಮೊಸರು, ನೀರು, ಶುಂಠಿ ಮತ್ತು ಹಸಿಮೆಣಸಿನಕಾಯಿ ಪೇಸ್ಟ್ ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು. ಈ ಮಿಶ್ರಣ ಸ್ವಲ್ಪ ಗಟ್ಟಿಯಾಗಿರಬೇಕು.

2. ಪ್ರೆಶರ್ ಕುಕ್ಕರಿನಲ್ಲಿ ತಳಭಾಗದಲ್ಲಿ ನೀರು ಹಾಕಿ, ನಂತರ ಕುಕ್ಕರ್ ನಲ್ಲಿ ಹಿಡಿಸುವ ಪ್ಲೇಟ್ ಹಾಕಿ, ಅದರಲ್ಲಿ ಎಣ್ಣೆ ಸವರಿ ಅದರಲ್ಲಿ ಈ ಪೇಸ್ಟ್ ಅಥವಾ ಕಡಲೆ ಹಿಟ್ಟಿನ ಮಿಶ್ರಣ ಹಾಕಿ ಇಡಬೇಕು. ಅನ್ನ ಬೇಯಲು ಇಡುವ ಪಾತ್ರೆಯಾದರೂ ಸರಿ.

3. ಮಿಶ್ರಣವನ್ನು ಪಾತ್ರೆಯಲ್ಲಿ ಹಾಕುವಾಗ 2/3 ಭಾಗದಷ್ಟು ಮಾತ್ರ ಹಾಕಬೇಕು.

4. ಈಗ ಕುಕ್ಕರ್ ಬಾಯಿ ಮುಚ್ಚಿ 10-15 ನಿಮಿಷ ಬೇಯಿಸಬೇಕು. ಆದರೆ ಕುಕ್ಕರ್ ನಲ್ಲಿ ವಿಶಲ್ ಬರುವವರೆಗೆ ಕಾಯುವ ಅವಶ್ಯಕತೆಯಿಲ್ಲ. ನಂತರ ಗ್ಯಾಸ್ ಆಫ್ ಮಾಡಿ ಇನ್ನು ಒಂದು 5-10 ನಿಮಿಷ ಕುಕ್ಕರ್ ನ ಪ್ರಶರ್ ನಲ್ಲಿ ಬೇಯಲು ಬಿಡಬೇಕು. ನಂತರ ಪ್ಲೇಟ್ ಹೊರತೆಗೆದು ಬದಿಯಲ್ಲಿ ಇಡಿ.

ಒಗ್ಗರಣೆ:

1. ಈಗ ಬಾಣಲೆಯನ್ನು ಬಿಸಿಮಾಡಿ ಅದರಲ್ಲಿ ಸ್ವಲ್ಪ ಎಣ್ಣೆ ಹಾಕಬೇಕು. ಎಣ್ಣೆ ಬಿಸಿಯಾದಾಗ ಸಾಸಿವೆ, ಜೀರಿಗೆ ಮತ್ತು ಕರಿಬೇವಿನ ಎಲೆ ಹಾಕಬೇಕು. ಸಾಸಿವೆ ಚಟಾಪಟ ಶಬ್ದ ಮಾಡುವಾಗ ಒಣ ಮೆಣಸಿನ ಕಾಯಿಯನ್ನು ಮುರಿದು ಹಾಕಬೇಕು. ನಂತರ ಉರಿಯನ್ನು ಆಫ್ ಮಾಡಬೇಕು.

2. ಈಗ ಈ ಒಗ್ಗರಣೆಗೆ ಸ್ವಲ್ಪ ನೀರು, ನಿಂಬೆ ರಸ, ಸಕ್ಕರೆ, ರುಚಿಗೆ ತಕ್ಕ ಉಪ್ಪು ಸೇರಿಸಿ ಮಿಶ್ರ ಮಾಡಬೇಕು.

3. ಈಗ ಈ ರಸವನ್ನು ಚಮಚದಲ್ಲಿ ತೆಗೆದುಕೊಂಡು ಬೇಯಿಸಿಟ್ಟ ಡೋಕಲಾ ಮೇಲೆ ಸುರಿದು ಸ್ವಲ್ಪ ಹೊತ್ತು ಹಾಗೇ ಬಿಡಬೇಕು.

4. ನಂತರ ಅದರ ಮೇಲೆ ತುರಿದ ತೆಂಗಿನ ಕಾಯಿ ಮತ್ತು ಕೊತ್ತಂಬರಿ ಸೊಪ್ಪಿನಿಂದ ಅಲಂಕಾರ ಮಾಡಿ, ಬೇಕಾದ ಆಕಾರದಲ್ಲಿ ಕತ್ತರಿಸಿದರೆ ರುಚಿಕರವಾದ ಡೋಕಲಾ ತಿಂಡಿ ರೆಡಿ.