ಚಿಕನ್ ರೇಷ್ಮಿ ಕಬಾಬ್-ಸ್ಟಾಟರ್ಸ್

ಚಿಕನ್ ರೇಷ್ಮಿ ಕಬಾಬ್ ಬೀದಿಬದಿಯ ಅಂಗಡಿಗಳಲ್ಲಿ ದೊರೆಯುವ ರುಚಿಕರವಾದ ನಾನ್ ವೆಜ್ ಸ್ಟಾಟರ್ಸ್. ಗ್ರಿಲ್ಡ್ ಟಿಕ್ಕಾ, ಶೀಕ್ ಕಬಾಬ್ , ರೇಷ್ಮಿ ಕಬಾಬ್ ಈ ರೀತಿಯ ಆಹಾರಗಳನ್ನು ಬೀದಿ ಬದಿಯಲ್ಲಿ ತಿನ್ನುವ ಸ್ವಾದವೇ ಬೇರೆ, ಯಾವ ಫೈ ಸ್ಟಾರ್ ಹೋಟೆಲ್ ಗಳಲ್ಲೂ ಆ ರುಚಿ ಸಿಗುವುದಿಲ್ಲ. ಈ ಕಾರಣದಿಂದಲೇ ಜನರು ಬೀದಿ ಬದಿಯ ಆಹಾರಗಳಾದ ಪಾನಿ ಪುರಿ, ಬೇಲ್ ಪುರಿ, ಈ ನಾನ್ ವೆಜ್ ಸ್ಟಾಟರ್ಸ್ ಗಳನ್ನು ಹೆಚ್ಚು ಇಷ್ಟ ಪಡುತ್ತಾರೆ.

ಕೆಲವರಿಗೆ ಬೀದಿ ಬದಿಯಲ್ಲಿ ಶುಚಿಯಾಗಿ ಮಾಡುತ್ತಾರೋ, ಯಾವ ಎಣ್ಣೆ ಬಳಸುತ್ತಾರೋ ಎಂಬ ಭಯವಿರುತ್ತದೆ. ಕೆಲವೊಂದು ಅಂಗಡಿಗಳನ್ನು ನೋಡುವಾಗ ಆ ರೀತಿಯ ಭಯ ಹುಟ್ಟಿಕೊಳ್ಳುವುದು ಸಹಜ ಕೂಡ. ಅಯ್ಯೋ ಅದಲ್ಲ ನಮಗ್ಯಾಕೆ ಮನೆಯಲ್ಲಿಯೇ ಸವಿರುಚಿಯ ನಾನ್ ವೆಜ್ ಸ್ಟಾಟರ್ಸ್ ಮಾಡಿ ತಿನ್ನಬೇಕೆ? ಹಾಗಾದರೆ ಈ ರೆಸಿಪಿ ಟ್ರೈ ಮಾಡಿ.

ಬೇಕಾಗುವ ಸಾಮಾಗ್ರಿಗಳು
* ಬೋನ್ ಲೆಸ್ ಚಿಕನ್ ಅರ್ಧ ಕೆಜಿ
* 1 ನಿಂಬೆ ಹಣ್ಣು
* ವೈಪ್ಡ್ ಕ್ರೀಮ್ ಅರ್ಧ ಕಪ್
* ಮೊಸರು 1 ಚಮಚ
* ಬಾದಾಮಿ 5-6
* ಶುಂಠಿ ಪೇಸ್ಟ್ 1 ಚಮಚ
* ಬೆಳುಳ್ಳಿ ಪೇಸ್ಟ್ 1 ಚಮಚ
* ಅರ್ಧ ಕಟ್ಟು ಪುದೀನಾ
* ಕೊತ್ತಂಬರಿ ಸೊಪ್ಪು ಅರ್ಧ ಚಮಚ
* ರುಚಿಗೆ ತಕ್ಕ ಉಪ್ಪು
* 3-4 ಚಮಚ ಎಣ್ಣೆ

ತಯಾರಿಸುವ ವಿಧಾನ:

* ಬಾದಾಮಿಯನ್ನು ಬಿಸಿ ನೀರಿನಲ್ಲಿ 10 ನಿಮಿಷ ನೆನೆ ಹಾಕಿ.

* ಕೊತ್ತಂಬರಿ ಮತ್ತು ಪುದೀನಾ ಸೊಪ್ಪನ್ನು ಶುಚಿ ಮಾಡಿ.

* ಈಗ ಪುದೀನಾ, ಕೊತ್ತಂಬರಿ ಸೊಪ್ಪು, ಬಾದಾಮಿ, ಹಸಿ ಮೆಣಸಿನಕಾಯಿ ಇವುಗಳನ್ನು ಮಿಕ್ಸಿಯಲ್ಲಿ ಹಾಕಿ ರುಬ್ಬಿ.

* ಬೋನ್ ಲೆಸ್ ಚಿಕನ್ ಅನ್ನು ಕಬಾಬ್ ಗೆ ನ ಬೇಕಾದಷ್ಟು ಗಾತ್ರದಲ್ಲಿ ಕತ್ತರಿಸಿ. ನಂತರ ಚೆನ್ನಾಗಿ ತೊಳೆದು ರುಬ್ಬಿದ ಮಿಶ್ರಣವನ್ನು ಹಾಕಿ ಅದರ ಜೊತೆ ವೈಪ್ಡ್ ಕ್ರೀಮ್, ಮೊಸರು, ಉಪ್ಪು, ಬೆಳ್ಳುಳ್ಳಿ, ಶುಂಠಿ ಪೇಸ್ಟ್ , ನಿಂಬೆ ರಸ ಹಾಕಿ ಮಿಕ್ಸ್ ಮಾಡಿ 1 ಗಂಟೆ ಕಾಲ ಇಡಿ.

* ಈಗ ತಳ ಸ್ವಲ್ಪ ಅಗಲವಿರುವ ಬಾಣಲೆಗೆ 4 ಚಮಚ ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದಾಗ ಚಿಕನ್ ತುಂಡುಗಳನ್ನು ಒಂದೊಂದು ಆಗಿ ಹಾಕಿ (ಪಾತ್ರೆಯ ಬಾಯಿ ಮುಚ್ಚ ಬೇಡಿ). 5 ನಿಮಿಷಕ್ಕೊಮ್ಮೆ ಸೌಟ್ ನಿಂದ ಆಡಿಸುತ್ತಾ ಚಿಕನ್ ತುಂಡುಗಳು ಬೆಂದು ಕಂದು ಬಣ್ಣ ಬರುವವರೆಗೆ (20 ನಿಮಿಷ) ಬೇಯಿಸಿ. ಇಷ್ಟು ಮಾಡಿ ಉರಿಯಿಂದ ಇಳಿಸಿದರೆ ರುಚಿ-ರುಚಿಯಾದ ಸ್ಟಾಟರ್ಸ್ ರೆಡಿ.