ಆಲೂ ಹೆಸರುಕಾಳಿನ ಪಕೋಡ-ಹೊಸ ರುಚಿ

ಸ್ವಲ್ಪ ದಿನಗಳ ಮುಂಚೆ ನಿಮಗೆ ಹೆಸರುಕಾಳಿನಿಂದ ಪಕೋಡ ಮಾಡುವ ವಿಧಾನ ತಿಳಿಸಿದ್ದೆ. ಆ ಪಕೋಡ ಟ್ರೈ ಮಾಡಿದವರು ಅಷ್ಟೇ ಸರಳವಾಗಿ ಮಾಡಬಹುದಾದ, ರುಚಿಯಲ್ಲಿ ಸ್ವಲ್ಪ ಭಿನ್ನವಾಗಿರುವ ಈ ಪಕೋಡ ಟ್ರೈ ಮಾಡಬಹುದು.

ಈ ಪಕೋಡಕ್ಕೆ ನೀವು ಆಲೂಗಡ್ಡೆ, ಮತ್ತು ಇಂಗು ಮಾತ್ರ ಹೆಚ್ಚಿನ ಸಾಮಾಗ್ರಿಯಾಗಿ ಸೇರಿಸಿದರೆ ಸಾಕು. ಸಂಜೆ ಟೀ ಜೊತೆ ಸವಿಯಲು ಈ ಹೊಸರುಚಿಯನ್ನು ಟ್ರೈ ಮಾಡಿ, ನಿಮ್ಮ ಅಭಿಪ್ರಾಯ ನಮಗೆ ತಿಳಿಸಿ.

ಬೇಕಾಗುವ ಸಾಮಗ್ರಿಗಳು

*1 ಕಪ್ ಹೆಸರು ಕಾಳು
* 1 ಕಪ್ ಈರುಳ್ಳಿ
* ಆಲೂಗಡ್ಡೆ 2-3
* ಹಸಿ ಮೆಣಸಿನಕಾಯಿ 2 (ಚಿಕ್ಕದಾಗಿ ಕತ್ತರಿಸಿದ್ದು)
* ಸ್ವಲ್ಪ ಶುಂಠಿ (ತುಂಬಾ ಚಿಕ್ಕದಾಗಿ ಕತ್ತರಿಸಿರಬೇಕು) * ಅರ್ಧ ಚಮಚ ಮೆಂತೆ
* ಅರ್ಧ ಚಮಚ ಜೀರಿಗೆ
* ಸ್ವಲ್ಪ ಕೊತ್ತಂಬರಿ ಪುಡಿ
* ನಿಂಬೆ ರಸ
* ರುಚಿಗೆ ತಕ್ಕ ಉಪ್ಪು
* ಸ್ವಲ್ಪ ಇಂಗು
* ಎಣ್ಣೆ
* ಕಡಲೆ ಹಿಟ್ಟು ಅರ್ಧ ಕಪ್

ತಯಾರಿಸುವ ವಿಧಾನ:

* 4 ಗಂಟೆಗಳ ಕಾಲ ಹೆಸರು ಬೇಳೆಯನ್ನು ನೆನೆ ಹಾಕಿರಬೇಕು. ನಂತರ ಅವುಗಳನ್ನು ತೊಳೆದು ಮಿಕ್ಸಿಗೆ ಹಾಕಿ ಸ್ವಲ್ಪ ಗಟ್ಟಿಯಾಗಿ ರುಬ್ಬಿಕೊಳ್ಳಬೇಕು.

* ಆಲೂಗಡ್ಡೆಯನ್ನು ಬೇಯಿಸಿ ಸಿಪ್ಪೆ ಸುಲಿದು ಚೆನ್ನಾಗಿ ಹಿಸುಕಿ. ನಂತರ ರುಬ್ಬಿದ ಹೆಸರಕಾಳಿನ ಜೊತೆ ಹಾಕಿ ಮಿಶ್ರಣ ಮಾಡಿ.

* ಈಗ ಆಲೂ, ಹೆಸರುಕಾಳು ಮಿಶ್ರಣಕ್ಕೆ ಎಣ್ಣೆ ಮತ್ತು ಕಡಲೆ ಹಿಟ್ಟು ಬಿಟ್ಟು ಉಳಿದ ಎಲ್ಲಾ ಪದಾರ್ಥಗಳನ್ನು ಹಾಕಿ ಮಿಶ್ರಣ ಮಾಡಿ ಉಂಡೆ ಕಟ್ಟಿ.

* ನಂತರ ಕಡಲೆ ಹಿಟ್ಟನ್ನು ಸ್ವಲ್ಪ ಗಟ್ಟಿಯಾಗಿ ಕಲೆಸಿ. ಈಗ ಬಾಣಲೆಗೆ ಅರ್ಧದಷ್ಟು ಎಣ್ಣೆ ಹಾಕಿ ಕಾಯಿಸಿ.

* ಈಗ ಉಂಡೆಯನ್ನು ಕಡಲೆ ಹಿಟ್ಟಿನಲ್ಲಿ ಅದ್ದಿ ಎಣ್ಣೆಯಲ್ಲಿ ಹಾಕಿ ಕಂದು ಬಣ್ಣ ಬರುವಾಗ ತೆಗೆದರೆ ರುಚಿಯಾದ ಆಲೂ ಹೆಸರುಕಾಳಿನ ಪಕೋಡ ರೆಡಿ.