ಚೀನಿಕಾಯಿ (ಕೆಂಪು ಕುಂಬಳ) ಆಂಬೊಡೆ

ಬೇಕಾಗುವ ಸಾಮಗ್ರಿ:

ಕೆಂಪು ಕುಂಬಳ ತುರಿ: 1 ಕಪ್‌
ಸಣ್ಣದಾಗಿ ಹೆಚ್ಚಿದ ಈರುಳ್ಳಿ: 1/4 ಕಪ್‌
ಮೈದಾ ಹಿಟ್ಟು : 1 ಟೇಬಲ್‌ ಸ್ಪೂನ್‌
ಕಡಲೆ (ಬೇಸನ್‌) ಹಿಟ್ಟು : 1/2 ಕಪ್‌
ಅಡುಗೆ ಸೋಂಡಾ : 1ಚಿಟಿಕೆ
ಕೊತ್ತಂಬರಿ ಸೊಪ್ಪು, ಸ್ವಲ್ಪ ಪುದಿನಾ, ಹಸಿ ಮೆಣಸಿನ ಕಾಯಿ, ಉಪ್ಪು - ಇವು ರುಚಿಗೆ ಬೇಕಾಗುವಷ್ಟು ಹಾಗೂ ಕರಿಯಲು ಉಪಯೋಗಿಸುವ ಎಣ್ಣೆ .

ಮಾಡುವ ವಿಧಾನ :

ಮೇಲೆ ತಿಳಿಸಿದ ಎಲ್ಲಾ ಸಾಮಗ್ರಿಗಳನ್ನು (ಎಣ್ಣೆ ಮತ್ತು ನೀರು ಹಾಕಿಕೊಳ್ಳದೇ) ಚನ್ನಾಗಿ ಕಲೆಕೊಳ್ಳಿ. ಚೆನ್ನಾಗಿ ನಾದಿದ ಹಿಟ್ಟನ್ನು ಅಂಗೈಯಲ್ಲಿ ಗೋಲಾಕಾರದಲ್ಲಿ ತಟ್ಟಿಕೊಳ್ಳಿ. ನಂತರ ಕೈಯಲ್ಲಿ ತಟ್ಟಿಕೊಂಡ ಆಂಬೊಡೆಯನ್ನು ಕಾಯ್ದ ಎಣ್ಣೆಯಲ್ಲಿ ಕೆಂಪಗೆ ಕರಿಯಿರಿ. ಟಿಶ್ಯೂ ಪೇಪರ್‌ ಲೈನಿಂಗ್‌ ಹಾಕಿದ ಅಗಲ ಹರಿವಾಣದಲ್ಲಿ ಒಂದು ಮಿನಿಟು ಇರಿಸಿ, ಬಿಸಿ ಬಿಸಿಯಾಗಿ ಬಡಿಸಿರಿ.

ಇದು ಚಳಿಗಾಲದ ಸ್ಪೆಷಲ್‌ ತಿಂಡಿ. ಹದಿನೈದು ನಿಮಿಷಗಳ ಒಳಗೆ ತಯಾರಿಸಿ ಸಂಜೆಯ ಚಹಾಕೂಟಕ್ಕೆ ಬಡಿಸಬಹುದು. ಈ ತಿಂಡಿಯು ಸಾಕಷ್ಟು ಗರಿ ಗರಿಯಾಗಿ ಮತ್ತು ಖಾರ ಖಾರವಾಗಿ ಇರುವುದರಿಂದಾಗಿ ನೆಂಚಿಕೊಳ್ಳಲು ಯಾವುದೇ ಚಟ್ನಿ ಅಥವಾ ಸಾಸ್‌ ಅಗತ್ಯ ಇರುವುದಿಲ್ಲ.