ಬಾಯಿರುಚಿಗೆ, ಆಯಾಸ ನಿವಾರಣೆಗೆ ಬ್ರೆಡ್‌ ಪಾಯಸ!

ಇದು ದೀಢೀರ್‌ ಪಾಯಸ. ಆಯಾಸವಾದಾಗ ಆಹ್ಲಾದಕರ. ಮಾಡುವಾಗಲೂ ಸುಸ್ತಾಗುವುದಿಲ್ಲ. ಕುಡಿದರೂ ಸುಸ್ತಾಗುವುದಿಲ್ಲ.

• ಎಸ್‌.ವಿ. ಲತಾ, ಬೆಂಗಳೂರು
  [email protected]

ಬ್ರೆಡ್‌ ಪಾಯಸಕ್ಕೆ ಬೇಕಾಗುವ ಸಾಮಗ್ರಿ :

1/2 ಪೌಂಡ್‌ ಬ್ರೆಡ್‌,
50 ಗ್ರಾಂ ಗಸಗಸೆ,
1/2 ಬಟ್ಟಲು ಕೊಬ್ಬರಿ ತುರಿ,
1 ಬಟ್ಟಲು ಹಾಲು,
ಒಂದೆರೆಡು ಬಾಳೆಹಣ್ಣು,
1 ಬಟ್ಟಲು ಸಕ್ಕರೆ,
ಏಲಕ್ಕಿ, ದ್ರಾಕ್ಷಿ, ಗೋಡಂಬಿ ಹಾಗೂ ಒಂದು ಬಟ್ಟಲು ತುಪ್ಪ.

ಮಾಡುವ ವಿಧಾನ :

ಬ್ರೆಡ್‌ನ್ನು ಚಿಕ್ಕ ಚಿಕ್ಕ ತುಂಡು ತುಂಡುಗಳಾಗಿ ಕತ್ತರಿಸಿ ಬಿಸಿಲಲ್ಲಿ ಒಣಗಿಸಿ. ಬಾಣಲೆಗೆ ಸ್ವಲ್ಪ ತುಪ್ಪ ಬಿಸಿ ಮಾಡಿ, ಅದಕ್ಕೆ ಒಣಗಿದ ಬ್ರೆಡ್‌ ಚೂರುಗಳನ್ನು ಹಾಕಿ ಕೆಂಬಣ್ಣಕ್ಕೆ ಹುರಿಯಿರಿ.

ದಪ್ಪ ತಳದ ಪಾತ್ರೆಗೆ ಹಾಲು, ಸಕ್ಕರೆ, ಸ್ವಲ್ಪ ನೀರು ಹಾಕಿ ಕಾಯಿಸುತ್ತಾ, ಸಕ್ಕರೆ ಹಾಲು ಬೆರೆತು ಕುದಿ ಬಂದ ಕೂಡಲೇ ತುಪ್ಪದಲ್ಲಿ ಹುರಿದ ಗಸಗಸೆ, ದ್ರಾಕ್ಷಿ, ಗೋಡಂಬಿ, ಕೊಬ್ಬರಿ ಹಾಕಿ ಸೌಟಿನಿಂದ ಕೈ ಆಡಿಸಿ. ನಂತರ ಹುರಿದ ಬ್ರೆಡ್‌ ಚೂರುಗಳನ್ನು ಹಾಕಿ ಒಂದು ಕುದಿ ಬರಿಸಿ ಕೆಳಗಿಳಿಸಿ. ಈ ಮಿಶ್ರಣಕ್ಕೆ ಬೇಕಾದರೆ ಬಾಳೆಹಣ್ಣಿನ ಬಿಲ್ಲೆಗಳನ್ನು ಕತ್ತರಿಸಿ ಹಾಕಿ.

ಬ್ರೆಡ್‌ ಪಾಯಸ ರುಚಿಕರವಷ್ಟೇ ಅಲ್ಲ , ಪೌಷ್ಟಿಕವೂ ಹೌದು.