ಈ ಆಲೂಗಡ್ಡೆ ಖಾದ್ಯದ ಸ್ಪೆಷಾಲಿಟಿ ಏನು?

Snacks

oi-Sumalatha

By Sumalatha

Published: Thursday, December 1, 2011, 18:16 [IST]

ಆಲೂಗಡ್ಡೆಯನ್ನು ಸಾಮಾನ್ಯವಾಗಿ ಎಲ್ಲಾ ತಿಂಡಿ ಅಡುಗೆಗಳಲ್ಲೂ ಬಳಸಲಾಗುತ್ತೆ. ಯಾವಾಗಲೂ ಆಲೂಗಡ್ಡೆಯನ್ನು ಸಾರು, ಪಲ್ಯದಲ್ಲಿ ಮಾತ್ರ ತಿಂದು ಬೋರೆನಿಸಿದ್ದರೆ ಈ ವಿಭಿನ್ನ ರುಚಿಯನ್ನು ಟೇಸ್ಟ್ ಮಾಡಬಹುದು. ಮಸಾಲೆಯನ್ನು ಬೇಯಿಸಿದ ಆಲೂಗಡ್ಡೆಯಲ್ಲಿ ಹಾಕಿ ಮಾಡುವ ಈ ಖಾದ್ಯ ನಿಮ್ಮ ಬಾಯಲ್ಲಿ ನೀರೂರಿಸೋದಂತೂ ಗ್ಯಾರಂಟಿ.

ಮಸಾಲೆ ಆಲೂಗಡ್ಡೆ ಮಾಡುವ ವಿಧಾನ:
* 4-5 ಬೇಯಿಸಿ ಸಿಪ್ಪೆ ತೆಗೆದ ಆಲೂಗಡ್ಡೆ
* 2-3 ಈರುಳ್ಳಿ, 1 ಕ್ಯಾಪ್ಸಿಕಂ
* 1 1/2 ಕ್ಯಾರೆಟ್, ಸ್ವಲ್ಪ ಬಟಾಣಿ
* 1 ಟೊಮೆಟೊ, ಹಸಿರು ಮೆಣಸಿನಕಾಯಿ
* 2 ಚಮಚ ಬೆಳ್ಳುಳ್ಳಿ ಪೇಸ್ಟ್
* ಚಾಟ್ ಮಸಾಲಾ, ಅರಿಶಿಣ, ಕೆಂಪು ಮೆಣಸಿನ ಪುಡಿ
* ಮೆಣಸಿನ ಪುಡಿ, ಉಪ್ಪು
* ಟೊಮೆಟೊ ಕೆಚಪ್
* ಜೀರಿಗೆ, ಎಣ್ಣೆ, ಕೊತ್ತಂಬರಿ
* ಚೀಸ್ (ಬೇಕಿದ್ದರೆ)

ಮಸಾಲೆ ಆಲೂಗಡ್ಡೆ ತಯಾರಿಸುವುದು ಹೇಗೆ?

* ಬೇಯಿಸಿದ ಆಲೂಗಡ್ಡೆಯನ್ನು ಎರಡು ಭಾಗವಾಗಿ ಕತ್ತರಿಸಿ ಅದರ ಮಧ್ಯದ ಭಾಗವನ್ನು ಚಮಚದ ಸಹಾಯದಿಂದ ನಿಧಾನವಾಗಿ ತೆಗೆದು ಒಂದೆಡೆ ಇಡಬೇಕು. ಇದನ್ನು ಕತ್ತರಿಸುವ ಮುನ್ನ ಸ್ವಲ್ಪ ಹುರಿದುಕೊಂಡಿದ್ದರೆ ಗರಿಗರಿಯಾಗಿರುತ್ತದೆ.

* ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಅದಕ್ಕೆ 1/2 ಚಮಚ ಜೀರಿಗೆಯನ್ನು ಹಾಕಬೇಕು. ಜೀರಿಗೆ ಸಿಡಿಯುತ್ತಿದ್ದಂತೆ ಬೆಳ್ಳುಳ್ಳಿ ಪೇಸ್ಟ್, ಕತ್ತರಿಸಿದ ಈರುಳ್ಳಿ, ಬಟಾಣಿ, ಕ್ಯಾಪ್ಸಿಕಂ ಮತ್ತು ಕ್ಯಾರೆಟ್ ಹಾಕಿ ಚೆನ್ನಾಗಿ ಬೆರೆಸಿ ಸ್ವಲ್ಪ ಬೇಯುವವರೆಗೂ ಕಾದು ನಂತರ ಹಸಿರು ಮೆಣಸಿನಕಾಯಿ, ಉಪ್ಪು, ಅರಿಶಿಣ ಹಾಕಿ ಕೆಲವು ನಿಮಿಷ ಬೇಯಿಸಬೇಕು.

* ಈಗ ಈ ಮಿಶ್ರಣಕ್ಕೆ ಚಾಟ್ ಮಸಾಲಾ, ಕೆಂಪು ಮೆಣಸಿನ ಪುಡಿ, ಮೆಣಸಿನ ಪುಡಿ ಮತ್ತು ಟೊಮೆಟೊ ಹಾಕಬೇಕು. ಒಂದು ನಿಮಿಷ ಈ ಮಿಶ್ರಣವನ್ನು ಬೇಯಿಸಿ ಟೊಮೆಟೊ ಕೆಚಪ್ ಬೆರೆಸಬೇಕು. ಪೇಸ್ಟ್ ನಂತೆ ಆಗುತ್ತಿದ್ದಂತೆ ಉರಿಯನ್ನು ಆರಿಸಬೇಕು.

* ಚಮಚದ ಸಹಾಯದಿಂದ ಈ ಪಲ್ಯವನ್ನು ಆಲೂಗಡ್ಡೆಗೆ ಹಾಕಿ ಕೊತ್ತಂಬರಿ ಮತ್ತು ಚೀಸ್ ಹಾಕಿದರೆ ಮಸಾಲೆ ತುಂಬಿದ ಆಲೂಗಡ್ಡೆ ಖಾದ್ಯ ತಿನ್ನಲು ರೆಡಿ.