ಟೀ ಜೊತೆ ಸವೆಯಲು ನೂಡಲ್ಸ್ ಪಕೋಡ

Snacks

oi-Reena

By Hema S

Published: Monday, April 30, 2012, 18:17 [IST]

ನೂಡಲ್ಸ್ ಸುಲಭವಾಗಿ ತಯಾರಿಸಬಹುದಾದ ಮತ್ತು ಬಾಯಿಗೆ ರುಚಿಯಾದ ಖಾದ್ಯವಾಗಿರುವುದರಿಂದ ಇದು ಹೆಚ್ಚಿನವರ ಪ್ರಿಯವಾದ ಆಹಾರವಾಗಿದೆ. ನೂಡಲ್ಸ್‌ಗೆ ತರಕಾರಿ ಹಾಕಿದರೆ ಒಂದು ರೀತಿಯ ರುಚಿ, ಅದೇ ಮೊಟ್ಟೆ ಹಾಕಿ ತಯಾರಿಸಿದರೆ ಎಗ್ ನೂಡಲ್ಸ್ ಆಗುತ್ತದೆ. ಹೀಗೆ ಸುಲಭವಾಗಿ ವಿವಿಧ ರುಚಿಯಲ್ಲಿ ತಯಾರಿಸಬಹುದಾದ ಈ ನೂಡಲ್ಸ್‌ನಿಂದ ರುಚಿಕರವಾದ ಪಕೋಡ ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
* 250 ಗ್ರಾಂ ನೂಡಲ್ಸ್
* ಒಂದೂವರೆ ಕಪ್ ಮೈದಾ
* ಕತ್ತರಿಸಿದ ಈರುಳ್ಳಿ 1
* ಸ್ವಲ್ಪ ಕರಿಮೆಣಸಿನ ಪುಡಿ
* ಶುಂಠಿ ಪೇಸ್ಟ್ 1 ಚಮಚ
* 5-6 ಹಸಿಮೆಣಸಿನ ಕಾಯಿ
* 1/2 ಕಪ್ ಮೈದಾ
* 1 ಕಪ್ ಹಾಲು
* 1/2 ಕಪ್ ಬ್ರೆಡ್ ಚೂರುಗಳು
* ರುಚಿಗೆ ತಕ್ಕ ಉಪ್ಪು
* ಎಣ್ಣೆ

ಮಾಡುವ ವಿಧಾನ:

1. ನೂಡಲ್ಸ್ ಅನ್ನು ಚಿಟಿಕೆಯಷ್ಟು ಉಪ್ಪು ಹಾಕಿ ಬಿಸಿನೀರಿನಲ್ಲಿ ಹಾಕಿ ಬೇಯಿಸಬೇಕು. ಅಂಟದಿರಲು ಸ್ವಲ್ಪ ಎಣ್ಣೆ ಹಾಕಬೇಕು.

2. ಈಗ ಬೆಂದ ನೂಡಲ್ಸ್‌ಗೆ ಶುಂಠಿ ಪೇಸ್ಟ್, ಕರಿಮೆಣಸಿನ ಪುಡಿ, ಈರುಳ್ಳಿ, ಹಸಿಮೆಣಸಿನಕಾಯಿ, ಉಪ್ಪು ಹಾಕಿ ಮಿಶ್ರ ಮಾಡಿ ಪಕೋಡಕ್ಕೆ ಉಂಡೆ ಕಟ್ಟಿದ ರೀತಿ ಕಟ್ಟಬೇಕು.

3. ಈಗ ಬಾಣಲೆಯನ್ನು ಬಿಸಿ ಮಾಡಿ ಸ್ವಲ್ಪ ಎಣ್ಣೆ ಹಾಕಿ ಅದಕ್ಕೆ ಬ್ರೆಡ್ ಚೂರುಗಳನ್ನು ಹಾಕಿ ಹುರಿದು ತಟ್ಟೆಯಲ್ಲಿ ಇಡಬೇಕು.

4. ಈಗ ಬಾಣಲೆಗೆ ಒಂದು ಚಮಚ ಎಣ್ಣೆ ಹಾಕಿ ಅದಕ್ಕೆ ಮೈದಾ ಹಾಕಿ 1 ನಿಮಿಷದ ಬಳಿಕ ಹಾಲು ಸೇರಿಸಿ ಕಡಿಮೆ ಉರಿಯಲ್ಲಿ ಬೇಯಿಸಬೇಕು. ಮೈದಾ ಸ್ವಲ್ಪ ಗಟ್ಟಿ ಪೇಸ್ಟ್ ಆದ ಮೇಲೆ ಉರಿಯಿಂದ ತೆಗೆಯಬೇಕು.

5. ಬಾಣಲೆಯಲ್ಲಿ ಎಣ್ಣೆ ಹಾಕಿ ಕುದಿಸಬೇಕು.

6. ಈಗ ನೂಡಲ್ಸ್ ಪಕೋಡವನ್ನು ಈ ಮೈದಾ ಮಿಶ್ರಣದಲ್ಲಿ ಅದ್ದಿ, ನಂತರ ಬ್ರೆಡ್ ಚೂರುಗಳ ಮೇಲೆ ಉರುಳಿಸಿ ಎಣ್ಣೆಯಲ್ಲಿ ಹಾಕಬೇಕು. ಪಕೋಡ ಕಂದು ಬಣ್ಣಕ್ಕೆ ಬಂದಾಗ ತೆಗೆದರೆ ರುಚಿಕರವಾದ ಪಕೋಡ ರೆಡಿ.