ಪೇರಳೆ ಹಣ್ಣಿನ ಸಿಹಿ

ಪೇರಲ(ಪೇರಳೆ)ಹಣ್ಣಿನಿಂದ ಸಿಹಿತಿನಿಸೇ ? ರುಚಿನೋಡಿ, ಆಮೇಲೆ ಮಾತಾಡಿ...

• ಜೇನ್‌ ಡಿಸೋಜಾ

ಬೇಕಾಗುವ ಸಾಮಗ್ರಿಗಳು :
ಪೇರಳೆ ಹಣ್ಣಿನ ತಿರುಳು - 2 ಕಪ್‌
ಸಕ್ಕರೆ - 2ಕಪ್‌
ತುಪ್ಪ - 1 ಚಮಚ
ನಿಂಬೆ ರಸ - 2 ಚಮಚ

ಮಾಡುವ ವಿಧಾನ : ಪೇರಳೆ ಹಣ್ಣಿನ ಸಿಪ್ಪೆ ಸುಲಿದು ಚೆನ್ನಾಗಿ ಜಜ್ಜಿ ಬೀಜಗಳನ್ನು ತೆಗೆಯಿರಿ. ಈ ತಿರುಳನ್ನು ಮಿಕ್ಸಿಯಲ್ಲಿ ಹಾಕಿ ಮಿಶ್ರಣ ಮಾಡಿ. ಪೇರಳೆ ಹಣ್ಣಿನ ಮಿಶ್ರಣದಷ್ಟೇ ಪ್ರಮಾಣದ ಸಕ್ಕರೆ ಬೇಕು. ಈ ಸಕ್ಕರೆ ಮತ್ತು ಪೇರಳೆಯ ತಿರುಳನ್ನು ಚೆನ್ನಾಗಿ ಬೆರೆಸಿ.

ದಪ್ಪ ತಳವಿರುವ ಪಾತ್ರೆಯಲ್ಲಿ ಈ ಮಿಶ್ರಣವನ್ನು ಹಾಕಿ ಕಡಿಮೆ ಉರಿಯಲ್ಲಿ ಒಂದು ಗಂಟೆಯವರೆಗೆ ಮಗ ಚುತ್ತಾ ಇರಿ. ನಂತರ ಒಂದು ಚಮಚ ತುಪ್ಪ ಹಾಗೂ ನಿಂಬೆ ಹಣ್ಣಿನ ರಸ ಹಾಕಿ ಬೆರೆಸಿ. ತುಪ್ಪ ಸವರಿದ ತಟ್ಟೆಗೆ ಈ ಮಿಶ್ರಣವನ್ನು ಸುರಿದು ಸಮತಟ್ಟಾಗಿ ಹರಡಿ.

ಇದು ಅರ್ಧದಷ್ಟು ತಣ್ಣಗಾದ ಮೇಲೆ ಬೇಕಾದ ಗಾತ್ರ ಹಾಗೂ ಆಕಾರದಲ್ಲಿ ಕತ್ತರಿಸಿ. ಈ ತುಂಡುಗಳ ಮೇಲೆ ಸ್ವಲ್ಪ ಮೈದಾ ಹಿಟ್ಟನ್ನು ಸಿಂಪಡಿಸಿ ತಟ್ಟೆಯಲ್ಲಿ ಮಗುಚಿ ಹಾಕಿ ಇಡಿ. ಪೆರಾರ್ದ್‌ ಪೂರ್ತಿಯಾಗಿ ತಣ್ಣಗಾದ ನಂತರ ಅದರ ಸ್ವಾದ ಸವಿಯಿರಿ..

(ಸ್ನೇಹ ಸೇತು: ವಿಜಯ ಕರ್ನಾಟಕ )