ಮಶ್ರೂಮ್ ಪಲಾವ್ ಒಮ್ಮೆ ಟೇಸ್ಟ್ ಮಾಡಿ

Rice

oi-Sumalatha

By Sumalatha

Published: Tuesday, December 20, 2011, 11:09 [IST]

ಬಟಾಣಿ ಪಲಾವ್, ಟೊಮೆಟೊ ಬಾತ್, ಮೆಂತ್ಯೆ ಬಾತ್ ಎಲ್ಲಕ್ಕಿಂತ ಮಶ್ರೂಮ್ ಪಲಾವ್ ಹೆಚ್ಚು ರುಚಿಯಾಗಿರುತ್ತೆ. ಆರೋಗ್ಯಕ್ಕೂ ಪೂರಕವಾಗಿರುವ ಮಶ್ರೂಮನ್ನು ಪಲಾವ್ ನಲ್ಲಿ ಬಳಸಿದರೆ ಹೆಚ್ಚು ಸ್ವಾದಭರಿತವಾಗಿರುತ್ತೆ. ಮಾಮೂಲಿ ಪಲಾವ್ ನಂತೆ ಹೆಚ್ಚು ಸಮಯವೂ ಬೇಕಿಲ್ಲ, ಚಕ್ ಅಂತ ಮಾಡಿ ಮುಗಿಸಬಹುದು. ಮಶ್ರೂಮ್ ಪಲಾವ್ ಮಾಡುವ ವಿಧಾನವನ್ನು ಇಲ್ಲಿ ತಿಳಿದುಕೊಳ್ಳಿ.

ಮಶ್ರೂಮ್ ಪಲಾವ್ ಗೆ ಬೇಕಾಗುವ ಪದಾರ್ಥ:
* 1 ಕಪ್ ಅಕ್ಕಿ
* 1 ಕಪ್ ಅಣಬೆ
* 4 ಈರುಳ್ಳಿ ಹೂವು (ಸಾಂಬಾರು ಈರುಳ್ಳಿ)
* 2 ಲವಂಗ
* 1/2 ಇಂಚಿನ ಚೆಕ್ಕೆ
* 2 ಏಲಕ್ಕಿ
* 1 ಪಲಾವ್ ಎಲೆ
* 1 ಚಮಚ ಗರಂ ಮಸಾಲ
* 1 ಚಮಚ ಜೀರಿಗೆ ಪುಡಿ
* ಎಣ್ಣೆ, ಉಪ್ಪು

ಮಶ್ರೂಮ್ ಪಲಾವ್ ತಯಾರಿಸುವ ವಿಧಾನ:
* ಅಕ್ಕಿಯನ್ನು ಶುದ್ಧಗೊಳಿಸಿ ತೊಳೆಯಬೇಕು. ಬಿಸಿ ನೀರಿನಲ್ಲಿ 10 ನಿಮಿಷ ನೆನೆಸಬೇಕು.
* ಸಾಂಬಾರು ಈರುಳ್ಳಿ (ಬಿಳಿ ಹೂವನ್ನು ಮತ್ತು ಹಸಿರು ಕಡ್ಡಿಯನ್ನು ಪ್ರತ್ಯೇಕವಾಗಿ ಕತ್ತರಿಸಿ) ಒಂದೆಡೆ ಇಟ್ಟುಕೊಳ್ಳಬೇಕು.
* ಎಣ್ಣೆ ಕಾಯಿಸಿ ಅದರಲ್ಲಿ ಈರುಳ್ಳಿಯ ಬಿಳಿ ಹೂವು, ಲವಂಗ, ಚೆಕ್ಕೆ, ಏಲಕ್ಕಿ ಮತ್ತು ಪಲಾವ್ ಎಲೆಯನ್ನು ಹುರಿದುಕೊಂಡು ಮಶ್ರೂಮ್ ಹಾಕಬೇಕು. ಈಗ ಜೀರಿಗೆ ಪುಡಿ ಮತ್ತು ಗರಂ ಮಸಾಲಾ ಪುಡಿಯನ್ನು ಬೆರೆಸಬೇಕು.
* ಅಕ್ಕಿಯನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು.
* ಎರಡು ಕಪ್ ಬಿಸಿ ನೀರನ್ನು ಅಕ್ಕಿ ಮಿಶ್ರಣಕ್ಕೆ ಹಾಕಿ ಈರುಳ್ಳಿಯ ಹಸಿರು ಭಾಗ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಹಾಕಿ ಚೆನ್ನಾಗಿ ತಿರುಗಿಸಬೇಕು. ಮುಚ್ಚುಳ ಮುಚ್ಚಿ ಬೇಯಿಸಿದರೆ ಮಶ್ರೂಮ್ ಪಲಾವ್ ತಿನ್ನಲು ರೆಡಿಯಾಗಿರುತ್ತೆ.