ಕ್ಯಾ ಬಾತ್, ಹುಳಿಹುಳಿ ಹುಣಸೆ ಹಣ್ಣಿನ ರೈಸ್ ಭಾತ್ ಮಾಡಿ

Published: Saturday, July 2, 2011, 11:39 [IST]

ಹುಣಸೆಹಣ್ಣಿನ ರೈಸ್ ಭಾತ್ ಒಬ್ಬರೊಬ್ಬರು ಒಂದೊಂದು ರೀತಿ ಮಾಡುತ್ತಾರೆ. ಟ್ಯಾಮರಿಂಡ್ ರೈಸ್ ಮಾಡುವುದಕ್ಕೆ ಹೆಚ್ಚು ಶ್ರಮ ಪಡಬೇಕಿಲ್ಲ. ಮುಂಜಾನೆ ಎದ್ದಾಗ ಒಂದಿಷ್ಟು ತಡವಾಗಿದ್ದರೆ, ದೋಸೆ ಹುಯ್ಯುವಷ್ಟು ಸಮಯ ನಿಮ್ಮಲ್ಲಿಲ್ಲದಿದ್ದರೆ ತಕ್ಷಣ ಹುಣಸೆಹಣ್ಣಿನ ರೈಸ್ ಮಾಡಬಹುದು.

ಬೇಕಾಗುವ ಪದಾರ್ಥಗಳು
* ಒಂದು ಬಟ್ಟಲು ಅಕ್ಕಿ
* ಖಾರದ ಪುಡಿ ಎರಡು ಚಮಚ
* ಕರಿಬೇವು ಒಂದೆರಡು ಎಳಸು
* ನೂರು ಗ್ರಾಂ ಎಣ್ಣೆ
* ಅರ್ಧಮುಷ್ಠಿ ಕಡಲೆಬೀಜ
* ನೂರು ಗ್ರಾಂ ಹುಣಸೆ
* ನಾಲ್ಕು ಒಣಮೆನಸಿನಕಾಯಿ
* ಒಗ್ಗರಣೆಗೆ ಕೊಂಚ ಸಾಸಿವೆ
* ಸ್ವಲ್ಪ ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು

ಮಾಡೋದು ಹೀಗೆ
* ಅಕ್ಕಿಯನ್ನು 15 ನಿಮಿಷ ನೀರಿನಲ್ಲಿ ನೆನೆಸಿಡಿ.
* ಹುಣಸೆ ಹಣ್ಣು ನೆನೆಸಿಟ್ಟು ರಸ ತೆಗೆದಿಟ್ಟುಕೊಳ್ಳಿ
* ಬಾಣಲೆಗೆ ಎಣ್ಣೆ ಹಾಕಿ ಬಿಸಿಯಾದ ನಂತರ, ಸಾಸಿವೆ, ಒಣಮೆನಸಿನಕಾಯಿ, ಕಡಲೆ ಬೀಜ ಹಾಕಿ ಕೆಂಪಗೆ ಒಗ್ಗರಣೆ ಮಾಡಿರಿ.
* ನಂತರ ಅದಕ್ಕೆ ಹುಣಸೆರಸ, ಖಾರದಪುಡಿ, ಬೆಲ್ಲ, ಅನ್ನ ಬೇಯಲು ಬೇಕಾದಷ್ಟು ನೀರು, ಉಪ್ಪು ಹಾಕಿ ಕುದಿಸಿ.
* ನೀರು ಚೆನ್ನಾಗಿ ಕುದಿಯುತ್ತಿರುವಾಗ ಅಕ್ಕಿ ಹಾಕಿ. ಬೇಯ್ದನಂತರ ರುಚಿನೋಡಿ. ಟ್ಯಾಮರಿಂಡ್ ರೈಸ್ ರೆಡಿ.

;