ಬ್ರೇಕ್ ಫಾಸ್ಟ್ ಗೆ ಮಾಡಿ ಎಲೆ ಕೋಸಿನ ಪಲಾವ್

Rice

oi-Sumalatha

By Sumalatha

Published: Monday, January 2, 2012, 16:31 [IST]

ಒಂದೊಂದು ವಿಧದ ತರಕಾರಿಯೂ ಒಂದೊಂದು ರೀತಿ ರುಚಿ ನೀಡುತ್ತೆ. ಅದೇ ರೀತಿ ಎಲೆಕೋಸಿನ ರುಚಿಯನ್ನು ನೀವು ಸವಿಯಬೇಕೆಂದಿದ್ದರೆ ಎಲೆಕೋಸಿನ ಪಲಾವ್ ಮಾಡಿ ನೋಡಿ. ಬೆಳಗ್ಗಿನ ತಿಂಡಿಗೆ ಎಲೆಕೋಸಿನ ಪಲಾವ್ ಸಖತ್ತಾಗಿರುತ್ತೆ. ಹೊಟ್ಟೆ ತುಂಬಿಸುವುದರೊಂದಿಗೆ ಬಾಯಿಗೆ ರುಚಿ ನೀಡುವ ಈ ಎಲೆಕೋಸಿನ ಪಲಾವ್ ತಯಾರಿಸುವ ವಿಧಾನವನ್ನು ಇಲ್ಲಿ ತಿಳಿದುಕೊಳ್ಳಿ.

ಪಲಾವ್ ಗೆ ಬೇಕಾಗುವ ಪದಾರ್ಥಗಳು:
* 1 ಕಪ್ ಅಕ್ಕಿ
* 250 ಗ್ರಾಂ ಎಲೆ ಕೋಸು
* 4 ಈರುಳ್ಳಿ
* 1/2 ಕಪ್ ಎಣ್ಣೆ, ಉಪ್ಪು
* 1/2 ಕಪ್ ತೆಂಗಿನ ತುರಿ
* 4 ಚಮಚ ಹುರಿಗಡಲೆ
* 10 ಹಸಿರು ಮೆಣಸಿನಕಾಯಿ
* ಸ್ವಲ್ಪ ಶುಂಠಿ
* ಕೊತ್ತಂಬರಿ, ಕರಿಬೇವು
* ಸಾಸಿವೆ, 1 ಚಮಚ ಕಡಲೆ ಬೇಳೆ
* 1 ಚಮಚ ಉದ್ದಿನ ಬೇಳೆ
* 1/2 ಚಮಚ ಜೀರಿಗೆ
* 8 ಗೋಡಂಬಿ

ಎಲೆಕೋಸಿನ ಪಲಾವ್ ತಯಾರಿಸುವ ವಿಧಾನ:
* ಅನ್ನವನ್ನು ಉದುರುದುರಾಗಿ ಮಾಡಿಟ್ಟುಕೊಂಡು ಪೂರ್ಣ ತಣ್ಣಗಾಗಲು ಬಿಡಬೇಕು.

* ಹಸಿರು ಮೆಣಸಿನಕಾಯಿ, ಶುಂಠಿ, ತೆಂಗಿನ ತುರಿ, ಹುರಿಗಡಲೆಯನ್ನು ಸ್ವಲ್ಪ ನೀರಿನೊಂದಿಗೆ ರುಬ್ಬಿಕೊಳ್ಳಬೇಕು.

* ಪಾತ್ರೆಯೊಂದರಲ್ಲಿ ಎಣ್ಣೆ ಕಾಯಿಸಿ ಅದರಲ್ಲಿ ಸಾಸಿವೆ, ಉದ್ದಿನ ಬೇಳೆ, ಕಡಲೆ ಬೇಳೆ, ಜೀರಿಗೆಯನ್ನು ಹಾಕಿ ಹುರಿಯಬೇಕು.

* ಕತ್ತರಿಸಿದ ಈರುಳ್ಳಿಯನ್ನು ಬೆರೆಸಿ ಗರಿ ಗರಿಯಾಗುವಂತೆ ಹುರಿಯಬೇಕು.

* ನಂತರ ಚಿಕ್ಕ ಚಿಕ್ಕದಾಗಿ ಕತ್ತರಿಸಿಕೊಂಡಿದ್ದ ಎಲೆ ಕೋಸನ್ನು ಹಾಕಿ ಬೇಯುವವರೆಗು ಹುರಿಯಬೇಕು.

* ರುಬ್ಬಿಕೊಂಡ ಮಸಾಲೆಯನ್ನು ಇದಕ್ಕೆ ಬೆರೆಸಿ 10 ನಿಮಿಷ ಸಣ್ಣಗಿನ ಉರಿಯಲ್ಲಿ ಹುರಿಯಬೇಕು.

* ಈಗ ಅನ್ನ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಬೆರೆಸಿ 5 ನಿಮಿಷ ಹುರಿಯಬೇಕು.

* ಕೊನೆಯಲ್ಲಿ ಕೊತ್ತಂಬರಿ, ಕರಿಬೇವು ಮತ್ತು ಹುರಿದ ಗೋಡಂಬಿಯನ್ನು ಅನ್ನದ ಮೇಲೆ ಉದುರಿಸಿದರೆ ಎಲೆಕೋಸಿನ ಪಲಾವ್ ಬ್ರೇಕ್ ಫಾಸ್ಟ್ ಗೆ ರೆಡಿಯಾಗಿರುತ್ತೆ.