ಈ ರೀತಿ ಎಗ್ ಮಸಾಲ ಟ್ರೈ ಮಾಡಿದ್ದೀರಾ?

Updated: Thursday, August 16, 2012, 15:40 [IST]

ಎಗ್ ಮಸಾಲ್ ಫ್ರೈಯನ್ನು ಅನೇಕ ರುಚಿಯಲ್ಲಿ ತಯಾರಿಸುತ್ತಾರೆ. ಹಾಕುವ ಮಸಾಲದಲ್ಲಿ ಸ್ವಲ್ಪ ವ್ಯತ್ಯಾಸ ಮಾಡಿದರೆ ರುಚಿ ಬದಲಾಗುತ್ತದೆ. ಈ ಕೆಳಗಿನ ವಿಧಾನದಂತೆ ಎಗ್ ಮಸಾಲ ಮಾಡಿದರೆ ನೀವು ಮಾಮೂಲಿ ಮಾಡುವ ಎಗ್ ಮಸಾಲಕ್ಕಿಂತ ಸ್ವಲ್ಪ ಭಿನ್ನವಾಗಿರುವುದು. ಇದನ್ನು ಅನ್ನ ಅಥವಾ ಚಪಾತಿ ಜೊತೆ ತಿನ್ನಲು ರುಚಿಯಾಗಿರುತ್ತದೆ.

ಬೇಕಾಗುವ ಸಾಮಾಗ್ರಿಗಳು:

* ಬೇಯಿಸಿದ ಮೊಟ್ಟೆ 5
* ಈರುಳ್ಳಿ 2 (ಕತ್ತರಿಸಿದ್ದು)
* ಪುಡಿ ಮಾಡಿದ ಕಾಳು ಮೆಣಸಿನ ಪುಡಿ 1/4 ಚಮಚ
* ಕೊತ್ತಂಬರಿ ಪುಡಿ 1 ಚಮಚ
* ಗರಂ ಮಸಾಲ ಅರ್ಧಚಮಚ
* ಕೆಂಪು ಮೆಣಸಿನ ಪುಡಿ ಅರ್ಧ ಚಮಚ
* ಕತ್ತರಿಸಿದ ಟೊಮೆಟೊ 3
* ಬೆಳ್ಳುಳ್ಳಿ 2 ಎಸಳು
* ಚಕ್ಕೆ 1 ತುಂಡು
* ಪಲಾವ್ ಎಲೆ 1
* ಗೋಡಂಬಿ 3-4
* ರುಚಿಗೆ ತಕ್ಕ ಉಪ್ಪು
* ನಿಂಬೆ ರಸ 1 ಚಮಚ
* ಸ್ವಲ್ಪ ಕೊತ್ತಂಬರಿ ಸೊಪ್ಪು
* ಎಣ್ಣೆ 2 ಚಮಚ

ತಯಾರಿಸುವ ವಿಧಾನ:

1. ಪಾತ್ರೆಯನ್ನು ಬಿಸಿ ಮಾಡಿ ಅದರಲ್ಲಿ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಚಕ್ಕೆ, ಪಲಾವ್ ಎಲೆ , ಶುಂಠಿ, ಬೆಳ್ಳುಳ್ಳಿ, ಈರುಳ್ಳಿ ಹಾಕಿ ಈರುಳ್ಳಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

2. ನಂತರ ಟೊಮೆಟೊ , ಕೆಂಪು ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಗೋಡಂಬಿ ಹಾಕಿ 5 ನಿಮಿಷ ಹುರಿಯಬೇಕು. ನಂತರ ಸ್ವಲ್ಪ ನೀರು ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಿ ಸ್ವಲ್ಪ ಹೊತ್ತು ಕುದಿಸಬೇಕು.

3. ನಂತರ ಮೊಟ್ಟೆಯನ್ನು 2 ಭಾಗ ಮಾಡಿ ಕತ್ತರಿಸಿ ಹಾಕಬೇಕು. ನಂತರ ಗರಂ ಮಸಾಲ ಮತ್ತು ನಿಂಬೆ ರಸ ಹಕಿ ಮಿಶ್ರ ಮಾಡಿ 2 ನಿಮಿಷ ಬಿಸಿ ಮಾಡಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಎಗ್ ಮಸಾಲ ಫ್ರೈ ರೆಡಿ.