ತಂಪು ತಂಪು ಪಾನೀಯಗಳು !

ಮನೆಯಲ್ಲೇ ತಯಾರಿಸಬಹುದಾದ ತಣ್ಣನೆಯ ತಂಪು ಪಾನೀಯಗಳನ್ನು ಮಾಡುವ ವಿಧಾನ ಓದಿಕೊಳ್ಳಿ.

*ವಸಂತಿ ಮಂಜುನಾಥ್‌

ಶುಂಠಿ ಲಿಂಬೂ
ಶುಂಠಿಯ ಕೆಲವು ತಾಜಾ ತುಂಡುಗಳನ್ನು ತೆಗೆದುಕೊಂಡು ಸ್ಲೈಸ್‌ ಮಾಡಿ ಮಿಕ್ಸಿಯಲ್ಲಿ ರುಬ್ಬಿ ರಸ ತೆಗೆಯಿರಿ. ನಂತರ ಲಿಂಬೂ ರಸವನ್ನು ಸೇರಿಸಿ ಚಿಟಿಕೆ ಉಪ್ಪು ಸಕ್ಕರೆ ಹಾಕಿ ಫ್ರಿಜ್‌ನಲ್ಲಿರಿಸಿರಿ. ಬೇಕೆನಿಸಿದಾಗ ಜ್ಯೂಸ್‌ ತಯಾರಿಸಿ ಕುಡಿಯಿರಿ. ಫ್ರಿಜ್‌ ಇಲ್ಲದವರು ಕುದಿಸಿ ಪಾಕ ಮಾಡಿ ಇಡಬಹುದು. ಕಬ್ಬಿನಹಾಲಿನ ರುಚಿಯ ಜ್ಯೂಸ್‌ ತುಂಬಾ ರುಚಿಯಾಗಿದ್ದು ಜೀರ್ಣಕಾರಕವಾಗಿರುತ್ತದೆ.

ಕೆನೆಮೊಸರಿನ ಲಸ್ಸಿ
ಕೆನೆಕೆನೆಯಾದ ಎರಡು ಲೋಟ ಮೊಸರಿಗೆ ಸಕ್ಕರೆ, ಚಿಟಿಕೆ ಉಪ್ಪು ಸೇರಿಸಿ; ಚೆನ್ನಾಗಿ ಕದಡಿ ಅಥವಾ ಒಂದು ಸುತ್ತು ಮಜ್ಜಿಗೆ ಕಡೆಯುವಂತೆ ಒಂದೆರಡು ಬಾರಿ ಕಡೆಯಿರಿ. 1/2 ಲೋಟ ತಾಜಾ ಹಾಲು ಸೇರಿಸಿ ಫ್ರಿಜ್‌ನಲ್ಲಿಡಿ. ಬಾಯಾರಿ ಹಸಿವಾದಾಗ ಕುಡಿದರೆ ಹೊಟ್ಟೆ ತುಂಬಾ ತಂಪೆನಿಸಿ ತಣ್ಣಗಾಗುತ್ತದೆ. ಇದು ಮಕ್ಕಳಿಗೆ ತುಂಬಾ ಒಳ್ಳೆಯದು.

ಪುದಿನಾ
ತಾಜಾ ಪುದಿನಾ ಎಲೆ ಒಂದು ಹಿಡಿ. ಕಾಳು ಮೆಣಸು ಪುಡಿ 1 ಟೀ ಸ್ಪೂನ್‌ ಸೇರಿಸಿ ಮಿಕ್ಸಿ ಮಾಡಿ, ನೀರು ಸೇರಿಸಿ ಸೋಸಿ, ಚಿಟಿಕೆ ಉಪ್ಪು ಲಿಂಬೆರಸ ಸೇರಿಸಿ ಫ್ರಿಜ್‌ನಲ್ಲಿರಿಸಿ ಕುಡಿಯಿರಿ. ಅತಿಯಾದ ಬಾಯಾರಿಕೆ ನೀಗುತ್ತದಲ್ಲದೆ ಕುಡಿಯಲು ಹಿತಕರವಾಗಿರುತ್ತದೆ.

ಬೆರೆಸಿದ ಮಜ್ಜಿಗೆಸ್ವಲ್ಪ ಹುಳಿಯಿರುವ ಮಜ್ಜಿಗೆಗೆ ಚೆನ್ನಾಗಿ ನೀರು ಸೇರಿಸಿ ರುಚಿಗೆ ತಕ್ಕಂತೆ ಉಪ್ಪು ಸೇರಿಸಿ. ಒಂದು ಚೂರು ಹಸಿ ಶುಂಠಿ, 1/2 ಹಸಿ ಮೆಣಸು, ಕರಿಬೇವು ಎಲೆ, ಕೊತ್ತುಂಬರಿ ಸೊಪ್ಪು ಜಜ್ಜಿ ಬಟ್ಟೆಯಲ್ಲಿ ಕಟ್ಟಿ ಮಜ್ಜಿಗೆಯಲ್ಲಿ ಹಾಕಿರಿ. ಬೇಕಿದ್ದಲ್ಲಿ ಇಂಗನ್ನು ಸೇರಿಸಬಹುದು. ರುಚಿಗೆ 1/2 ಟೀ ಸ್ಪೂನ್‌ ಲಿಂಬೆರಸ ಸೇರಿಸಿ. ಫ್ರಿಜ್‌ನಲ್ಲಿರಿಸಿರಿ. ಸಿಹಿಮುಟ್ಟದ ಅತಿಥಿಗಳಿಗೆ ಇದು ಒಳ್ಳೆಯ ಪಾನೀಯ. ಬಾಯಾರಿಕೆ ನೀಗುತ್ತದೆ. ಅಲ್ಲದೆ ಹಸಿವೂ ಚೆನ್ನಾಗಿ ಆಗುತ್ತದೆ.