ಪುಷ್ಟಿದಾಯಕ ಬಿಸಿ ಬಿಸಿ ಪಾಲಾಕ್ ಸೂಪ್

ಪಾಲಾಕ್ ಸೊಪ್ಪಿನ ಸೂಪ್ ನಿಂದ ಚಳಿಗಾಲದಲ್ಲಿ ಕಾಣಿಸಿಕೊಳ್ಳುವ ಜೀರ್ಣ ಕ್ರಿಯೆ ಸಮಸ್ಯೆ ನಿವಾರಣೆಗೊಳ್ಳುವುದರೊಂದಿಗೆ ವೈರಲ್ ಸೋಂಕುಗಳಿಂದ ದೂರವಿರಲು ರೋಗ ನಿರೋಧಕ ಶಕ್ತಿಯನ್ನೂ ಹೆಚ್ಚಿಸಿಕೊಳ್ಳಬಹುದು.

ಪಾಲಾಕ್ ಸೂಪ್ ಗೆ ಏನೇನು ಬೇಕು?
* 2 ಕಪ್ ಪಾಲಾಕ್
* 1 ಈರುಳ್ಳಿ (ಕತ್ತರಿಸಿದ್ದು)
* 1 ಚಮಚ ಬೆಳ್ಳುಳ್ಳಿ ಪೇಸ್ಟ್
* 2-3 ಚಮಚ ಬೆಣ್ಣೆ
* 1 1/2 ಕಪ್ ಕೆನೆ
* ಉಪ್ಪು, ಮೆಣಸಿನ ಪುಡಿ, ಎಣ್ಣೆ

ಪಾಲಾಕ್ ಸೂಪ್ ತಯಾರಿಸುವ ವಿಧಾನ:
1. 5 ನಿಮಿಷ ಪಾಲಾಕ್ ಸೊಪ್ಪನ್ನು ಬಿಸಿ ನೀರಿನಲ್ಲಿ ನೆನೆಸಿ ಶುದ್ಧಗೊಳಿಸಬೇಕು. ಸೊಪ್ಪನ್ನು ಬೇಯಿಸಿ ರುಬ್ಬಿಕೊಳ್ಳಬೇಕು. (ಅವಶ್ಯವಿದ್ದರೆ ಸ್ವಲ್ಪವೇ ನೀರು ಬೆರೆಸಬಹುದು)

2. ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಕಾಯಿಸಿ ಅದರಲ್ಲಿ ಈರುಳ್ಳಿ ಮತ್ತು ಬೆಳ್ಳುಳ್ಳಿ ಪೇಸ್ಟನ್ನು ಹುರಿದು ಒಂದು ನಿಮಿಷ ತಿರುಗಿಸಬೇಕು. ನಂತರ ಉಪ್ಪು ಮತ್ತು ಮೆಣಸಿನ ಪುಡಿಯನ್ನು ಬೆರೆಸಬೇಕು.

3. ಈಗ ರುಬ್ಬಿದ ಪಾಲಾಕ್ ಮಿಶ್ರಣ ಮತ್ತು ಕೆನೆಯನ್ನು ಹಾಕಿ 4-5 ನಿಮಿಷ ಬೇಯಿಸಬೇಕು. ನಿಮ್ಮ ಅವಶ್ಯಕತೆಗೆ ತಕ್ಕಂತೆ ನೀರನ್ನು ಬೆರೆಸಿ ಬೇಯಲು ಬಿಡಬೇಕು. ಸೂಪ್ ಸ್ವಲ್ಪ ಗಟ್ಟಿಯಾಗುತ್ತಿದ್ದಂತೆ ಒಲೆಯನ್ನು ಆರಿಸಬೇಕು.

ಈಗ ಪಾಲಾಕ್ ಸೂಪ್ ತಿನ್ನಲು ಸಿದ್ಧವಾಗಿದೆ. ಸೂಪ್ ಮೇಲೆ ಸ್ವಲ್ಪ ಕೆನೆ ಹಾಕಿ ಕುಡಿಯಬಹುದು. ಬ್ರೆಡ್ ನೊಂದಿಗೆ ಅಥವಾ ಚಪಾತಿಯೊಂದಿಗೂ ಬೆರೆಸಿ ತಿನ್ನಬಹುದು.