ಅಣಬೆ ಟಿಕ್ಕಾ ಮಸಲಾ, ಮಾಡಿ ನೋಡಿ ಒಂದ್ಸಲ

Rasam

oi-Reena

By Hema S

Published: Tuesday, March 13, 2012, 18:40 [IST]

ಅಣಬೆಯಿಂದ ಕುರುಕಲು ತಿಂಡಿ , ಸಾರು, ಗ್ರೇವಿ, ಪಲ್ಯ ಹೀಗೆ ಏನೇ ಮಾಡಲಿ ರುಚಿಕರವಾಗಿರುತ್ತದೆ. ಅದರಲ್ಲೂ ಸ್ವಲ್ಪ ಗ್ರೇವಿ ತರದ ಅಡುಗೆಯಂತೂ ತುಂಬಾನೆ ರುಚಿಕರವಾಗಿರುತ್ತದೆ ಇವತ್ತು ನಾವು ಅಣಬೆಯಿಂದ ಟಿಕ್ಕಾ ಮಸಾಲೆ ತಯಾರಿಸುವುದು ಹೇಗೆ ಎಂದು ತಿಳಿಯೋಣ. ಈ ಅಡುಗೆ ಮಾಡಲು ಸುಲಭವಾಗಿದ್ದು ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:

ಟಿಕ್ಕಾ ಮಸಾಲೆಗೆ:
* ವನಸ್ಪತಿ 2 ಚಮಚ
* 1/2 ಚಮಚ ಸಾಸಿವೆ
* ಕತ್ತರಿಸಿದ ದೊಡ್ಡ ಈರುಳ್ಳಿ ಒಂದು
* ಹಣ್ಣಾದ ಟೊಮೆಟೊ 3
* ಕೊತ್ತಂಬರಿ ಪುಡಿ 1/2 ಚಮಚ
* ಜೀರಿಗೆ ಪುಡಿ 1/2 ಚಮಚ
* ಅರಿಶಿಣ 1/4 ಚಮಚ
* 1/2 ಚಮಚ ಮೆಣಸಿನ ಪುಡಿ
* ಮೆಂತೆ ಕಾಳು 1/2 ಚಮಚ
* ರುಚಿಗೆ ತಕ್ಕ ಉಪ್ಪು
* ಶುಂಠಿ ಮತ್ತು ಬೆಳ್ಳುಳ್ಳಿ ಪೇಸ್ಟ್ 1 ಚಮಚ

ಅಣಬೆಗೆ ಮಸಾಲೆ:
* ಒಂದು ಪ್ಯಾಕೆಟ್ ಅಣಬೆ (12-15 ಅಣಬೆ)
* ಕರಿಮೆಣಸಿನ ಪುಡಿ 1 ಚಮಚ
* 1/4 ಚಮಚ ಅರಿಶಿಣ
* 1/4 ಚಮಚ ಕೆಂಪು ಮೆಣಸಿನ ಪುಡಿ
* 1/2 ಕಪ್ ಮೊಸರು
* ಎಣ್ಣೆ 1 ಚಮಚ

ತಯಾರಿಸುವ ವಿಧಾನ:

1. ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಬೇಕು. ಅದಕ್ಕೆ ಸಾಸಿವೆಯನ್ನು ಹಾಕಿದಾಗ ಚಟಾಪಟಾ ಶಬ್ದ ಬರುವುದು, ಈಗ ಮೆಂತೆ ಕಾಳು ಕತ್ತರಿಸಿದ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.

2. ಈಗ ಶುಂಠಿ ಮತ್ತು ಬೆಳ್ಳುಳ್ಳಿ ಪೇಸ್ಟ್ ಹಾಕಿ 1 ನಿಮಿಷ ಬಿಸಿಮಾಡಬೇಕು.ಈಗ ಟೊಮೆಟೊವನ್ನು ಹಾಕಿ ಅದು ಬಿಸಿಯಾದಾಗ ಸೌಟ್ ನಿಂದ ಮೆತ್ತಗೆ ಮಾಡಿ ಪೇಸ್ಟ್ ರೀತಿ ಮಾಡಬೇಕು.

3. ನಂತರ ಕೊತ್ತಂಬರಿ ಪುಡಿ, ಜೀರಿಗೆ ಪುಡಿ ಮತ್ತು ಕೆಂಪು ಮೆಣಸಿನ ಪುಡಿ, ಅರಿಶಿಣ ಹಾಕಿ ಮಿಶ್ರಣವನ್ನು ಕುದಿಸಬೇಕು.ಈಗ ಮಿಶ್ರಣ ತುಂಬಾ ಗಟ್ಟಿಯಾದರೆ 1/2 ಲೋಟ ನೀರು ಹಾಕಿ ಕುದಿಸಬೇಕು.

4. ಈಗ ಅಣಬೆಯನ್ನು ಶುದ್ಧ ಮಾಡಿ ಚಿಕ್ಕ ತುಂಡುಗಳಾಗಿ ಕತ್ತರಿಸಿ ಅದಕ್ಕೆ ಅರಿಶಿಣ ಕರಿಮೆಣಸಿನ ಪುಡಿ, ಕೆಂಪು ಮೆಣಸಿನ ಪುಡಿ, ಮೊಸರು, ಸ್ವಲ್ಪ ಉಪ್ಪು ಹಾಕಿ ಮಿಶ್ರ ಮಾಡಬೇಕು.

5. ಈಗ ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಬಿಸಿ ಮಾಡಬೇಕು. ಅದಕ್ಕೆ ಮಸಾಲೆ ಮತ್ತು ಮೊಸರು ಹಾಕಿದ ಅಣಬೆಯನ್ನು ಹಾಕಿ ತಿರುಗಿಸುತ್ತಾ ಬೇಯಿಸಬೇಕು.

6. ಈಗ ಬೆಂದ ಅಣಬೆ ಮಿಶ್ರಣವನ್ನು ಮೇಲಿನ ಮಸಾಲೆ ಮಿಶ್ರಣದ ಜೊತೆ ಹಾಕಿ, ರುಚಿಗೆ ತಕ್ಕ ಉಪ್ಪು ಸೇರಿಸಿ 5 ನಿಮಿಷ ಬೇಯಿಸಿದರೆ ಅಣಬೆ ಟಿಕ್ಕಾ ಮಸಾಲೆ ರೆಡಿ. ಇದನ್ನು ಬೇಕಿದ್ದರೆ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಬಹುದು.