ಈ ಬಾರಿ ಕುಂಬಳಕಾಯಿ ಹೂವು ಅಲ್ಲ! ಎಲೆಗಳಿಂದ ಪಕೋಡ ಮಾಡಿ.. ಈ ರುಚಿ ನೋಡಿದ್ರೆ ಮತ್ತೆ ಮತ್ತೆ ಮಾಡ್ತೀರಾ

ಕುಂಬಳಕಾಯಿ ಹೂವು ಅಲ್ಲ, ಈ ಬಾರಿ ಎಲೆಗಳ ಪಕೋಡ ಮಾಡಿ ನೋಡಿ! ರುಚಿ ನೋಡಿದರೆ ಪ್ರತಿ ಸೀಸನ್‌ನಲ್ಲಿ ಇದನ್ನೇ ಮಾಡ್ತೀರಾ. ಹೌದು, ಚಳಿಗಾಲದ ಸಂಜೆಗಳಲ್ಲಿ ಕುರುಕುಲು ತಿಂಡಿಗಳಿಲ್ಲದೆ ಕಳೆ ಕಟ್ಟುವುದೇ ಇಲ್ಲ. ಸಾಂಪ್ರದಾಯಿಕವಾಗಿ ಸೇವಿಸುವ ಆಲೂಗಡ್ಡೆ, ಈರುಳ್ಳಿ, ಅಥವಾ ಪನೀರ್ ಪಕೋಡಗಳ ಬದಲಿಗೆ ಈ ಬಾರಿ ಹೊಸತನವನ್ನು ಪ್ರಯತ್ನಿಸಬಹುದು. ಕುಂಬಳಕಾಯಿ ಎಲೆಗಳಿಂದ ಮಾಡುವ ಪಕೋಡ (Pumpkin Leaves Pakora) ರುಚಿಕರವಾಗುರುತ್ತದೆ. ಜೊತೆಗೆ ಆರೋಗ್ಯಕ್ಕೂ ಒಳ್ಳೆಯದು. ಇದು ಪೋಷಕಾಂಶಗಳಿಂದ ಸಮೃದ್ಧವಾಗಿದ್ದು, ಗರಿಗರಿಯಾಗಿ ಮತ್ತು ರುಚಿಕರವಾಗಿ ಇರುತ್ತದೆ.

ಕುಂಬಳಕಾಯಿ ಹೂವಿನ ಪಕೋಡಗಳನ್ನು ನೀವು ಸವಿದಿರಬಹುದು, ಅದು ಗರಿಗರಿಯಾಗಿ ಮತ್ತು ರುಚಿಕರವಾಗಿರುತ್ತವೆ. ಕುಂಬಳಕಾಯಿ ಎಲೆಗಳು ಸಾಮಾನ್ಯವಾಗಿ ಎಲ್ಲೆಡೆ ಲಭ್ಯವಿರುತ್ತವೆ. ಬಿಸಿ ಬಿಸಿ ಚಹಾ ಅಥವಾ ಕಾಫಿಯ ಜೊತೆ ಇಂತಹ ಪಕೋಡ ಸವಿಯುವುದು ಅಥವಾ ಸೇವಿಸುವುದು ವಿಶೇಷ ಅನುಭವ ನೀಡುತ್ತದೆ. ಈ ವಿಭಿನ್ನ ಹಾಗೂ ಆರೋಗ್ಯಕರ ತಿಂಡಿಯನ್ನು ಕುಟುಂಬದವರು ಮತ್ತು ಸ್ನೇಹಿತರು ಸಹ ಖಂಡಿತ ಇಷ್ಟಪಡುತ್ತಾರೆ. ಇದು ಚಳಿಗಾಲದ ಸಂಜೆಗಳನ್ನು ಮತ್ತಷ್ಟು ಆಹ್ಲಾದಕರಗೊಳಿಸುತ್ತದೆ. ಮನೆಯಲ್ಲಿ ಸುಲಭವಾಗಿ ಮತ್ತು ತ್ವರಿತವಾಗಿ ಕುಂಬಳಕಾಯಿ ಎಲೆಗಳ ಪಕೋಡ ತಯಾರಿಸುವುದು ಹೇಗೆ (Pumpkin leaves pakora recipe) ಎಂದು ಈ ಲೇಖನದಲ್ಲಿ ತಿಳಿಸಲಾಗಿದೆ.

ಕುಂಬಳಕಾಯಿ ಎಲೆಗಳ ಪಕೋಡಗೆ ಬೇಕಾಗುವ ಸಾಮಗ್ರಿಗಳು

• ತಾಜಾ ಕುಂಬಳಕಾಯಿ ಎಲೆಗಳು - 10-12 (ಚೆನ್ನಾಗಿ ತೊಳೆದಿರಬೇಕು)
• ಕಡಲೆ ಹಿಟ್ಟು - 1 ಕಪ್
• ಅಕ್ಕಿ ಹಿಟ್ಟು - 2 ಚಮಚ (ಗರಿಗರಿತನಕ್ಕಾಗಿ)
• ಕೆಂಪು ಮೆಣಸಿನ ಪುಡಿ - 1 ಚಮಚ
• ಅರಿಶಿನ - ಅರ್ಧ ಚಮಚ
• ಕೊತ್ತಂಬರಿ ಪುಡಿ - ಒಂದು ಚಮಚ
• ಅಜ್ವೈನ್ (ಓಮ) - ಅರ್ಧ ಚಮಚ
• ಧನಿಯಾ ಪುಡಿ: 1 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ನೀರು - ಹಿಟ್ಟು ಕಲಸಲು ಅಗತ್ಯವಿರುವಷ್ಟು
• ಎಣ್ಣೆ - ಕರಿಯಲು

ಕುಂಬಳಕಾಯಿ ಎಲೆಗಳ ಪಕೋಡ ತಯಾರಿಸುವ ವಿಧಾನ

- ಮೊದಲಿಗೆ ತಾಜಾ ಕುಂಬಳಕಾಯಿ ಎಲೆಗಳನ್ನು ತೆಗೆದುಕೊಂಡು, ಹರಿಯುವ ನೀರಿನಲ್ಲಿ ಚೆನ್ನಾಗಿ ತೊಳೆಯಿರಿ. ಎಲೆಗಳ ಮೇಲಿರುವ ಸಣ್ಣ ಕೂದಲನ್ನು ತೆಗೆಯಲು ನಿಧಾನವಾಗಿ ಉಜ್ಜಿ.

- ತೊಳೆದ ನಂತರ, ಎಲೆಗಳನ್ನು ನಿಮ್ಮ ಅನುಕೂಲಕ್ಕೆ ತಕ್ಕಂತೆ ಸಣ್ಣ ತುಂಡುಗಳಾಗಿ ಕತ್ತರಿಸಬಹುದು ಅಥವಾ ಹಾಗೆಯೇ ಇಡಬಹುದು.

- ಒಂದು ದೊಡ್ಡ ಪಾತ್ರೆಯಲ್ಲಿ ಕಡಲೆ ಹಿಟ್ಟು, ಅಕ್ಕಿ ಹಿಟ್ಟು, ಕೆಂಪು ಮೆಣಸಿನ ಪುಡಿ, ಅರಿಶಿಣ, ಧನಿಯಾ ಪುಡಿ, ಅಜ್ವೈನ್ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ.

- ನಂತರ, ಈ ಮಿಶ್ರಣಕ್ಕೆ ಸ್ವಲ್ಪ ಸ್ವಲ್ಪ ನೀರನ್ನು ಸೇರಿಸುತ್ತಾ ಗಂಟುಗಳಾಗದಂತೆ ಹಿಟ್ಟನ್ನು ಕಲಸಿ. ಹಿಟ್ಟು ತುಂಬಾ ತೆಳುವಾಗದೆ, ದಪ್ಪವಾಗಿರಬೇಕು. ಅದು ಎಲೆಗಳಿಗೆ ಸರಿಯಾಗಿ ಅಂಟಿಕೊಳ್ಳುವಷ್ಟು ಗಟ್ಟಿಯಾಗಿರಬೇಕು.

- ಈಗ ಪಕೋಡ ಕರಿಯುವುದು: ಒಂದು ಬಾಣಲೆ ಅಥವಾ ಕಡಾಯಿಯನ್ನು ಬಿಸಿ ಮಾಡಿ. ಅದರಲ್ಲಿ ಎಣ್ಣೆಯನ್ನು ಹಾಕಿ. ಎಣ್ಣೆ ಮಧ್ಯಮ ಬಿಸಿಯಾದ ನಂತರ, ಉರಿಯನ್ನು ಮಧ್ಯಮಕ್ಕೆ ಇಳಿಸಿ.

- ಈಗ ಕತ್ತರಿಸಿದ ಅಥವಾ ಇಡೀ ಎಲೆಗಳನ್ನು ತಯಾರಿಸಿದ ಹಿಟ್ಟಿನಲ್ಲಿ ಸಂಪೂರ್ಣವಾಗಿ ಅದ್ದಿ ಎಣ್ಣೆಯಲ್ಲಿ ನಿಧಾನವಾಗಿ ಬಿಡಿ. ಒಂದೇ ಬಾರಿಗೆ ಹೆಚ್ಚು ಪಕೋಡಗಳನ್ನು ಹಾಕಬಾರದು. ಎರಡೂ ಬದಿಯಲ್ಲಿ ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಮತ್ತು ಗರಿಗರಿಯಾಗುವವರೆಗೆ ಕರಿಯಿರಿ.

- ಈಗ ಪಕೋಡಗಳನ್ನು ಹೆಚ್ಚುವರಿ ಎಣ್ಣೆಯನ್ನು ಹೀರಿಕೊಳ್ಳಲು ಟಿಶ್ಯೂ ಪೇಪರ್ ಇರುವ ತಟ್ಟೆಗೆ ಹಾಕಿ. ಇಷ್ಟು ಮಾಡಿದರೆ ಸಾಕು ಬಿಸಿ ಬಿಸಿ ಮತ್ತು ರುಚಿಕರವಾದ ಕುಂಬಳಕಾಯಿ ಎಲೆಗಳ ಪಕೋಡಾ (Kaddu Patte ke Pakode) ಸಿದ್ದ.

ಈ ಬಿಸಿ ಬಿಸಿ ಕುಂಬಳಕಾಯಿ ಎಲೆಗಳ ಪಕೋಡಾಗಳನ್ನು ನಿಮ್ಮ ನೆಚ್ಚಿನ ಚಟ್ನಿ (ಪುದೀನಾ, ಕೊತ್ತಂಬರಿ ಅಥವಾ ಹುಣಸೆಹಣ್ಣಿನ ಚಟ್ನಿ) ಅಥವಾ ಟೊಮೆಟೊ ಸಾಸ್‌ನೊಂದಿಗೆ ಚಹಾ ಸಮಯಕ್ಕೆ ಬಡಿಸಿ. ಈ ವಿಶಿಷ್ಟ ಮತ್ತು ಆರೋಗ್ಯಕರ ಕುಂಬಳಕಾಯಿ ಎಲೆಗಳ ಪಕೋಡ ಅಥವಾ ಸ್ನ್ಯಾಕ್ ನಿಮ್ಮ ಚಳಿಗಾಲದ ಸಂಜೆಯನ್ನು ಇನ್ನಷ್ಟು ಸುಂದರವಾಗಿಸುತ್ತದೆ.