ರುಚಿಯಾದ ತೊಂಡೆ ಕಾಯಿ, ಗೋಡಂಬಿ ಪಲ್ಯ

Palya

oi-Reena

By Hema S

Published: Monday, June 25, 2012, 14:18 [IST]

ತೊಂಡೆ ಕಾಯಿ ಪಲ್ಯ ಹೆಚ್ಚಿನವರಿಗೆ ರುಚಿಸುವುದಿಲ್ಲ. ಕಾರಣ ಇಷ್ಟೆ ರುಚಿಕರವಾದ ತೊಂಡೆ ಕಾಯಿ ಪಲ್ಯದ ಬದಲು ಸುಮ್ಮನೆ ತೊಂಡೆ ಕಾಯಿ ಮತ್ತು ಸ್ವಲ್ಪ ಮೆಣಸು, ಉಪ್ಪು ಹಾಕಿ ತಯಾರಿಸಿದ ಪಲ್ಯ ತಿಂದರೆ ಯಾರಿಗಾದರೂ ತೊಂಡೆ ಕಾಯಿ ಕಂಡರೆ ಕೋಪ ಬರುವುದು ಸಹಜ. ನನಗೂ ಅಷ್ಟೆ ಹಾಸ್ಟೆಲ್ ನಲ್ಲಿ ಓದುವ ಸಮಯದಲ್ಲಿ ಅವರು ಕೊಡುತ್ತಿದ್ದ ತೊಂಡೆ ಕಾಯಿ ಪಲ್ಯ ತಿಂದು, ತೊಂಡೆ ಕಾಯಿ ಕಂಡರೆ ಉರಿದು ಬೀಳುತ್ತಿದ್ದೆ.

ಆದರೆ ಯಾವಾಗ ಗೋಡಂಬಿ ಮತ್ತು ತೊಂಡೆ ಕಾಯಿ ಪಲ್ಯ ರುಚಿ ಗೊತ್ತಾಯಿತೊ ಅವತ್ತಿನಿಂದ ಪುನಃ ತೊಂಡೆ ಕಾಯಿ ಇಷ್ಟಪಡಲಾರಂಭಿಸಿದೆ. ತೊಂಡೆ ಕಾಯಿ ಮತ್ತು ಗೋಡಂಬಿ ಹಾಕಿ ತಯಾರಿಸುವ ಪಲ್ಯ ತುಂಬಾ ರುಚಿಕರವಾಗಿದ್ದು ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಗ್ರಿಗಳು:
* ಅರ್ಧ ಕೆಜಿಯಷ್ಟು ತೊಂಡೆಕಾಯಿ ( ತೊಳೆದು ಕತ್ತರಿಸಿಡಬೇಕು)
* ತುರಿದ ತೆಂಗಿನಕಾಯಿ ಅರ್ಧ ಹೋಳು
* ಗೋಡಂಬಿ- ಎರಡು ಹಿಡಿ
* ಚಿಕ್ಕ ಚೂರು ಬೆಲ್ಲ
* ರುಚಿಗೆ ತಕ್ಕ ಉಪ್ಪು
* ಸಾಸಿವೆ
* ಕೆಂಪು ಮೆಣಸಿನ ಕಾಯಿ4- 5
* ಎಣ್ಣೆ
* ಅರಿಶಿಣ 1/4 ಚಮಚ
* ಸ್ವಲ್ಪ ಜೀರಿಗೆ
* ಸ್ವಲ್ಪ ಉದ್ದು

ತಯಾರಿಸುವ ವಿಧಾನ:

1. ತೆಂಗಿನಕಾಯಿ,ಕೆಂಪು ಮೆಣಸಿನ ಕಾಯಿ, ಸ್ವಲ್ಪ ಸಾಸಿವೆ ಅರಿಶಿಣ ಹಾಕಿ ತರಿಯಾಗಿ ರುಬ್ಬಬೇಕು (ಪೇಸ್ಟ್ ರೀತಿ ಮಾಡಬೇಡಿ).

2. ಪಾತ್ರೆಯನ್ನು ಬಿಸಿ ಮಾಡಿ ಸ್ವಲ್ಪ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಬೇಕು. ಸಾಸಿವೆ ಚಟಾಪಟ ಶಬ್ದ ಬರುವಾಗ ಉದ್ದು,ಅರಿಶಿನ,ಜೀರಿಗೆ ಹಾಕಬೇಕು.

3. ನಂತರ ತೊಂಡೆ ಕಾಯಿ ಮತ್ತು ಗೋಡಂಬಿ ಹಾಕಿ ಸ್ವಲ್ಪ ನೀರು ಹಾಕಿ ಬೇಯಿಸಿ. ತೊಂಡೆ ಕಾಯಿ ಅರ್ಧ ಬೆಂದಾಗ ರುಬ್ಬಿದ ತೆಂಗಿನ ಕಾಯಿ ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಿ ಮಂದ ಉರಿಯಲ್ಲಿ ಬೇಯಿಸಬೇಕು.

4. ಈಗ ಸ್ವಲ್ಪ ಬೆಲ್ಲವನ್ನು ತುರಿದು ಮಿಶ್ರ ಮಾಡಬೇಕು ಮತ್ತೆ 5 ನಿಮಿಷ ಕಡಿಮೆ ಉರಿಯಲ್ಲಿ ಬೇಯಿಸಿದರೆ ರುಚಿಕರವಾದ ಗೋಡಂಬಿ ಪಲ್ಯ ರೆಡಿ.