ಸಾರಿನ ಪುಡಿ

• ಸುನೀತಾ ಅನಂತರಾಮು, ತುಮಕೂರು

ಇದು ರೆಡಿಮೇಡ್ ಕಾಲ. ಸಾರಿನ ಪುಡಿ ಇರಲಿ, ಸಾರನ್ನೇ ಮನೆಗೆ ತರುವ ಕಾಲ ಇದು. ನಮ್ಮ ಹೆಣ್ಣು ಮಕ್ಕಳಿಗೆ ಸಾರಿನ ಪುಡಿ ಮಾಡೋದು ಮರೆತೇ ಹೋಗಿದೆ. ಮದುವೆಯಾಗಿ ಎರಡು ಮಕ್ಕಳಾದರೂ, ತವರು ಮನೆಯಿಂದಲೇ ಸಾರಿನ ಪುಡಿ ತರುವ ಹೆಣ್ಣುಮಕ್ಕಳ ಸಂಖ್ಯೆ ಕಡಿಮೆಯೇನಿಲ್ಲ. ನಿಜಕ್ಕೂ ಸಾಂಬರ್ ಪುಡಿ ಮಾಡೋದು ಅಷ್ಟೊಂದು ಕಷ್ಟವೇನಿಲ್ಲ. ಅದು ಹೇಗೆ ಅನ್ನೋದನ್ನು ನಾನು ಹೇಳ್ತೀನಿ ಕೇಳಿ.

ಮೊದಲು ಅಂಗಡಿಗೆ ಹೋಗಿ ಕೆಳಕಂಡ ಪದಾರ್ಥಗಳನ್ನು ತಗೊಂಡು ಬನ್ನಿ :

ಅರ್ಧ ಕಿಲೋ ಒಣ ಮೆಣಸಿನ ಕಾಯಿ(ಖಾರ ಕಮ್ಮಿ ಇರಲಿ ಜೊತೆಗೆ ಸ್ವಲ್ಬ ಬಣ್ಣ ಇರಲಿ ಅನ್ನೋರು ಬ್ಯಾಡಗಿ ಮೆಣಸಿನ ಕಾಯಿ ಬಳಸಬಹುದು.)

• 400 ಗ್ರಾಂ ಧನಿಯಾ(ಕೊತ್ತಂಬರಿ ಬೀಜ)
• 100 ಗ್ರಾಂ +100 ಗ್ರಾಂ ಮೆಣಸು ಮತ್ತು ಮೆಂತ್ಯ
• 100 ಗ್ರಾಂ ಜೀರಿಗೆ
• 75 ಗ್ರಾಂ ಸಾಸಿವೆ
• 2ಟೀ ಚಮಚ ಅರಿಶಿನ ಪುಡಿ
• ಸ್ವಲ್ಪ ಪುಡಿ ಮಾಡಿದ ಇಂಗು
• ಒಂದು ಚೂರು ಚಕ್ಕೆ

ಮಾಡೋ ವಿಧಾನ : ಮೊದಲು ಮಾಡಬೇಕಾದ ಕೆಲಸ, ಮೆಣಸಿನಕಾಯನ್ನು ಬಿಸಿಲಲ್ಲಿ ಒಣಗಿಸುವುದು. ಆಮೇಲೆ ಬಾಣಲಿಗೆ ಎರಡು ಚಮಚ ಅಡುಗೆ ಎಣ್ಣೆ ಹಾಕಿ. ಆ ಎಣ್ಣೆಗೆ ಮೆಣಿಸಿನ ಕಾಯಿ ಹಾಕಿ ಚೆನ್ನಾಗಿ ಉರಿಯಿರಿ. ಘಂ ಅನ್ನೋ ವಾಸನೆ ಮೂಗಿಗೆ ಬರುತ್ತೆ.

ಅಮೇಲೆ ಮೆಣಸು, ಮೆಂತ್ಯ, ಜೀರಿಗೆ, ಸಾಸಿವೆ, ಧನಿಯಾ ಎಲ್ಲಾ ಪದಾರ್ಥಗಳನ್ನು ಬೇರೆಬೇರೆಯಾಗಿ ಉರಿಯಿರಿ. ಆಮೇಲೆ ಅನ್ನುವಿರಾ? ಇನ್ನೇನಿದೆ, ಮಿಕ್ಸಿಗೆ ಹಾಕಿ ನುಣ್ಣಗೆ ಪುಡಿ ಮಾಡಿ. ಹೀಗೆ ಮಾಡಿದ ಪುಡಿಯನ್ನು ನಾವು ನಾಲ್ಗೈದು ತಿಂಗಳು ಬಳಸಬಹುದು. ಇನ್ನೇಕೆ ತಡ. ಇನ್ನೆಂದೂ ಅಂಗಡಿಯಿಂದ ಸಾಂಬರ್ ಪುಡಿ ತರೋದಿಲ್ಲ ಅಂಥ ಈಗಲೇ ಪ್ರತಿಜ್ಞೆ ಮಾಡಿ.