ಬಂಗಾಳಿ ಆಲೂ ಗಸಗಸೆ ಪಲ್ಯ ನಿಮ್ಮ ಮನೆಯಲ್ಲಿ...

ಆಲೂ ಗಸಗಸೆ ಪಲ್ಯಕ್ಕೆ ಏನೇನು ಬೇಕು?
ಈ ಬಂಗಾಳಿ ಮೂಲದ ಪಲ್ಯಕ್ಕೆ ಹೆಚ್ಚೇನೂ ಪದಾರ್ಥಗಳ ಅವಶ್ಯಕತೆಯಿಲ್ಲ. ಚಿಕ್ಕದಾಗಿ ಕತ್ತರಿಸಿದ 5-6 ಆಲೂಗಡ್ಡೆ, 2 ಈರುಳ್ಳಿ, 4 ಹಸಿರು ಮೆಣಸಿನಕಾಯಿ, 2 ಚಮಚ ಗಸಗಸೆ, 1 ಚಮಚ ಕರಿ ಜೀರಿಗೆ, ಸ್ವಲ್ಪ ಅರಿಶಿಣ, ಎಣ್ಣೆ, ಪಲಾವ್ ಎಲೆ 2 ಮತ್ತು ರುಚಿಗೆ ತಕ್ಕಷ್ಟು ಉಪ್ಪು, ಇಷ್ಟಿದ್ದರೆ ಸಾಕು.

ಆಲೂ ಗಸಗಸೆ ಪಲ್ಯ ತಯಾರಿಸೋದು ಹೇಗೆ?
* ಎರಡು ಗಂಟೆಯ ಅವಧಿ ಗಸಗಸೆಯನ್ನು ನೀರಿನಲ್ಲಿ ನೆನೆಸಬೇಕು. ಆಲೂಗಡ್ಡೆಯನ್ನು ಚಿಕ್ಕದಾಗಿ ಕತ್ತರಿಸಿಕೊಳ್ಳಬೇಕು.
* ನೆನೆಸಿಟ್ಟಿದ್ದ ಗಸಗಸೆ ಮತ್ತು ಹಸಿರು ಮೆಣಸಿನಕಾಯಿಯನ್ನು ರುಬ್ಬಿಕೊಳ್ಳಬೇಕು.
* ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ ಬಿಸಿಯಾಗುತ್ತಿದ್ದಂತೆ ಅದಕ್ಕೆ ಪಲಾವ್ ಎಲೆ ಮತ್ತು ಕರಿ ಜೀರಿಗೆಯನ್ನು ಹಾಕಬೇಕು.
* ಒಂದು ನಿಮಿಷದ ನಂತರ ಕತ್ತರಿಸಿದ್ದ ಈರುಳ್ಳಿ ಹಾಕಿ ಬಣ್ಣ ತಿರುಗುವವರೆಗೂ ಹುರಿಯಬೇಕು.
* ಈಗ ಬಾಣಲೆಗೆ ಆಲೂಗಡ್ಡೆಯನ್ನು ಹಾಕಿ ಆಲೂಗಡ್ಡೆ ಫ್ರೈ ಆದ ವಾಸನೆ ಬರುತ್ತಿದ್ದಂತೆ ರುಬ್ಬಿಕೊಂಡಿದ್ದ ಗಸಗಸೆ ಮತ್ತು ಮೆಣಸಿನ ಕಾಯಿ ಪೇಸ್ಟನ್ನು ಬೆರೆಸಬೇಕು.
* ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಚಿಟಿಕೆ ಅರಿಶಿಣ ಹಾಕಿ ಚೆನ್ನಾಗಿ ತಿರುಗಿಸಿ 5 ನಿಮಿಷ ಬೇಯಲು ಬಿಡಬೇಕು.
* ಅದು ಒಣಗಿದಂತಾದಾಗ ಅರ್ಧ ಕಪ್ ನೀರು ಹಾಕಬೇಕು. ಕಡಿಮೆ ಉರಿಯಲ್ಲಿ ಈ ಮಿಶ್ರಣವನ್ನು 3-4 ನಿಮಿಷ ಬೇಯಿಸಿದರೆ ಆಲೂ ಗಸಗಸೆ ಪಲ್ಯ ತಿನ್ನಲು ತಯಾರಾಗಿರುತ್ತೆ.