ಸಿಹಿ ಗೆಣಸು-ಪಾಲಾಕ್ ಕಾಂಬಿನೇಶನ್ ಖಾರಾ ಫ್ರೈ

Palya

oi-Sumalatha

By Sumalatha

Published: Thursday, December 8, 2011, 16:55 [IST]

ಸಿಹಿ ಗೆಣಸೆಂದರೆ ಸಾಮಾನ್ಯವಾಗಿ ಎಲ್ಲರಿಗೂ ಇಷ್ಟ. ಸಿಹಿಗೆಣಸನ್ನು ಖಾರವಾಗಿಯೂ ಮಾಡಿ ತಿನ್ನಬಹುದು. ಸಿಹಿ ಗೆಣಸು ಮತ್ತು ಪಾಲಾಕ್ ಸೊಪ್ಪಿನ ಕಾಂಬಿನೇಶನ್ ನ ಫ್ರೈ ಸಖತ್ ಸ್ವಾದಭರಿತವಾಗಿರುತ್ತೆ. ಇದು ಕೇವಲ ರುಚಿಗೆ ಮಾತ್ರವಲ್ಲ, ಆರೋಗ್ಯಕ್ಕೂ ಪೂರಕ.

ಗೆಣಸು ಮತ್ತು ಪಾಲಾಕ್ ಉಪಯೋಗ: ಗೆಣಸಿನಲ್ಲಿ ವಿಟಮಿನ್, ನಾರಿನಂಶ ಮತ್ತು ಆಂಟಿಯಾಕ್ಸಿಡೆಂಟ್ ಹೆಚ್ಚಿರುತ್ತದೆ. ಇದು ಮಧುಮೇಹಿಗಳಿಗೆ ಮತ್ತು ಲೊ ಬಿಪಿ ಇದ್ದವರಿಗೆ ತುಂಬಾ ಉಪಯುಕ್ತ. ಪಾಲಾಕ್ ನಲ್ಲಿ ಕಬ್ಬಿಣಾಂಶ, ವಿಟಮಿನ್, ಫೊಲೇಟ್, ಪೊಟಾಶಿಯಂ ಮತ್ತು ಫಾಸ್ಪರಸ್ ಹೆಚ್ಚಿದೆ. ಕ್ಯಾನ್ಸರ್ ತಡೆಗಟ್ಟುವ ಫ್ಲೇವನಾಯ್ಡ್ ಕೂಡ ಅಧಿಕವಿದೆ.

ಗೆಣಸು ಪಾಲಾಕ್ ಫ್ರೈ ಮಾಡಲು ಏನೇನು ಬೇಕು?
* 2-3 ಸಿಹಿ ಗೆಣಸು (ಸ್ವಲ್ಪವೇ ಬೇಯಿಸಿ ಕತ್ತರಿಸಿರಬೇಕು)
* 1 ಬಟ್ಟಲು ಪಾಲಾಕ್ (ಕತ್ತರಿಸಿರಬೇಕು)
* 2-3 ಹಸಿರು ಮೆಣಸಿನಕಾಯಿ
* 1/2 ಚಮಚ ಗರಂ ಮಸಾಲ ಪುಡಿ
* 1/2 ಚಮಚ ಕೆಂಪು ಮೆಣಸಿನ ಪುಡಿ
* 1/4 ಚಮಚ ಆಮ್ ಚೂರ್ ಪುಡಿ
* ರುಚಿಗೆ ತಕ್ಕಷ್ಟು ಉಪ್ಪು
* 1 ಚಮಚ ಸಾಸಿವೆ
* 1 ಚಮಚ ಬೆಣ್ಣೆ

ಸಿಹಿ ಗೆಣಸು ಪಾಲಾಕ್ ಫ್ರೈ ತಯಾರಿಸುವ ವಿಧಾನ:

* ಸ್ವಲ್ಪವೇ ಬೆಣ್ಣೆಯೊಂದಿಗೆ ಪಾಲಾಕ್ ಸೊಪ್ಪನ್ನು ಹುರಿದುಕೊಳ್ಳಬೇಕು. ಇದಕ್ಕೆ ಬೇಯಿಸಿದ ಸಿಹಿ ಗೆಣಸನ್ನು ಬೆರೆಸಿ ಚೆನ್ನಾಗಿ ತಿರುಗಿಸಬೇಕು.

* ಪಾಲಾಕ್ ಸೊಪ್ಪಿನ ಬಣ್ಣ ಬದಲಾಗುವವರೆಗೂ ಸ್ವಲ್ಪ ನೀರಿನೊಂದಿಗೆ ಬೇಯಿಸಬೇಕು.

* ಇದಕ್ಕೆ ಹಸಿರು ಮೆಣಸಿನಕಾಯಿ, ಕೆಂಪು ಮೆಣಸಿನ ಪುಡಿ, ಗರಂ ಮಸಾಲಾ ಪುಡಿ, ಆಮ್ ಚೂರ್ ಪೌಡರ್ ಮತ್ತು ಉಪ್ಪನ್ನು ಬೆರೆಸಿ ಚೆನ್ನಾಗಿ ತಿರುಗಿಸಬೇಕು.

* ಪ್ರತ್ಯೇಕ ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಕಾಯಿಸಿ ಸಾಸಿವೆ ಒಗ್ಗರಣೆ ಹಾಕಬೇಕು. ಒಗ್ಗರಣೆಯನ್ನು ಗೆಣಸಿನ ಮಿಶ್ರಣಕ್ಕೆ ಬೆರೆಸಿದರೆ ಸಿಹಿ ಗೆಣಸು ಪಾಲಾಕ್ ಫ್ರೈ ತಿನ್ನಲು ರೆಡಿ.