ಚಳಿಯಲ್ಲಿ ಚನ್ನಾ ಮಸಾಲಾ ರುಚಿ ನೋಡಿ

Palya

oi-Sumalatha

By Sumalatha

Published: Wednesday, October 12, 2011, 14:01 [IST]

ಚನ್ನಾ ಮಸಾಲ ಉತ್ತರ ಭಾರತದ ಪ್ರಸಿದ್ಧ ರುಚಿಕರ ಮಸಾಲೆ ಖಾದ್ಯ. ಚಪಾತಿ, ರೋಟಿ, ಎಲ್ಲದರೊಂದಿಗೂ ಸುಲಭವಾಗಿ ಹೊಂದಿಕೆಯಾಗುವಂತಹ ಈ ಕಡಲೆಕಾಳಿನ ಖಾದ್ಯ ತಯಾರಿಸೋದು ಅಷ್ಟೇ ಸುಲಭ. ಚನ್ನಾ ಮಸಾಲವನ್ನು ಮಾಡೋದು ಹೇಗೆ ಎಂದು ಮುಂದೆ ತಿಳಿಯಿರಿ.

ಚನ್ನಾ ಮಸಾಲಾಗೆ ಏನೇನು ಬೇಕು?
* 1 ಕಪ್ ಕಡಲೆಕಾಳು (ಒಂದು ರಾತ್ರಿಯಿಡೀ ನೆನೆಸಿರಬೇಕು)
* 2 ಚಿಕ್ಕ ಈರುಳ್ಳಿ (ತುರಿದಿದ್ದು)
* 2 ಟೊಮೆಟೊ (ಚಿಕ್ಕದಾಗಿ ಕತ್ತರಿಸಿರಬೇಕು)
* ಶುಂಠಿ ಬೆಳ್ಳುಳ್ಳಿ ಪೇಸ್ಟ್
* ಹಸಿರು ಮೆಣಸಿನಕಾಯಿ
* ಚೆಕ್ಕೆ, ಲವಂಗ ಪುಡಿ
* ಜೀರಿಗೆ, ಪಲಾವ್ ಎಲೆ
* ಕೆಂಪು ಮೆಣಸಿನಕಾಯಿ ಪುಡಿ
* ಅರಿಶಿನ, ಗರಂ ಮಸಾಲೆ, ಧನ್ಯಾ ಪುಡಿ
* ಉಪ್ಪು, ಹುಣಸೆ, ಟೀ ಸೊಪ್ಪು
* ಎಣ್ಣೆ
* ಬೆಣ್ಣೆ, ಕೊತ್ತಂಬರಿ ಸೊಪ್ಪು

ಚನ್ನಾ ಮಸಾಲ ಮಾಡುವುದು ಹೀಗೆ:
* ನೆನೆಸಿದ ಕಡಲೆಕಾಳು, ನೀರು ಮತ್ತು ತೆಳುವಾದ ಬಟ್ಟೆಯಲ್ಲಿ ಟೀ ಪುಡಿ ಅಥವಾ ಟೀಸೊಪ್ಪನ್ನು ಕಟ್ಟಿ ಸ್ವಲ್ಪ ಉಪ್ಪು ಬೆರೆಸಿ ಕುಕ್ಕರಿನಲ್ಲಿ 3-4 ಬಾರಿ ಕೂಗುವವರೆಗೂ ಬೇಯಿಸಬೇಕು. (ಟೀ ಬ್ಯಾಗ್ ಕೂಡ ಉಪಯೋಗಿಸಬಹುದು)

* ಒಂದು ಬಾಣಲೆಯಲ್ಲಿ ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಜೀರಿಗೆ ಮತ್ತು ಪಲಾವ್ ಎಲೆ ಹಾಕಿ ಹುರಿಯಬೇಕು. ಕೆಲವು ಸೆಕೆಂಡ್ ಗಳ ನಂತರ ಈರುಳ್ಳಿ ಹಾಕಿ ಅದು ಕೆಂಬಣ್ಣಕ್ಕೆ ತಿರುಗುತ್ತಿದ್ದಂತೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಮತ್ತು ಮೆಣಸಿನ ಕಾಯಿ ಹಾಕಬೇಕು.

* ನಂತರ ರುಚಿಗೆ ತಕ್ಕಷ್ಟು ಉಪ್ಪು, ಅರಿಶಿನ, ಚೆಕ್ಕೆ ಲವಂಗದ ಪುಡಿ, ಧನ್ಯಾ ಪುಡಿ ಹಾಕಿ ಟೊಮೆಟೊ ಬೆರೆಸಬೇಕು.

* ಈಗ ಸ್ವಲ್ಪ ಹುರಿದು ಗರಂ ಮಸಾಲ, ಕೆಂಪು ಮೆಣಸಿನ ಕಾಯಿ ಪುಡಿ ಮತ್ತು ಕುಕ್ಕರ್ ನಲ್ಲಿ ಬೇಯಿಸಿದ ನೀರನ್ನು ಸ್ವಲ್ಪ ಹಾಕಬೇಕು.

* ಇದರೊಳಗೆ ಬೇಯಿಸಿದ ಕಡಲೆಕಾಳನ್ನು ಹಾಕಿ ಬೇಯಲು ಬಿಡಬೇಕು. ಒಂದು ಚಿಕ್ಕ ಬಟ್ಟಲಿನಲ್ಲಿ ಸ್ವಲ್ಪ ನೀರು, ಸಕ್ಕರೆ ಮತ್ತು ಹುಣಸೆಹಣ್ಣನ್ನು ಹಾಕಿ ನೆನೆಸಬೇಕು.

* ಕಡಲೆಕಾಳು ಗಟ್ಟಿಯಾಗುತ್ತಿದ್ದಂತೆ ಹುಣಸೆ ಹಣ್ಣನ್ನು ಹಿಂಡಿ ರಸವನ್ನು ಸೇರಿಸಬೇಕು.

* ಕೊನೆಗೆ ಅದರ ಮೇಲೆ ಕತ್ತರಿಸಿದ ಕೊತ್ತಂಬರಿ ಮತ್ತು ಬೆಣ್ಣೆಯನ್ನು ಹಾಕಿದರೆ ಸಖತ್ತಾದ ಚೆನ್ನಾ ಮಸಾಲದ ರುಚಿಯನ್ನು ನೀವು ಮನಸ್ಸಾರೆ ಸವಿಯಬಹುದು.