ಎಲ್ಲ ತಿನಿಸುಗಳ ಸಂಗಾತಿ ಕಡಲೆಬೇಳೆ ಚಟ್ನಿಪುಡಿ

ಬೇಕಾಗುವ ಪದಾರ್ಥಗಳು

ಕಡಲೆಬೇಳೆ 1/2 ಲೋಟ
ಉದ್ದಿನ ಬೇಳೆ 1/2 ಲೋಟ
ಕಡಲೆಕಾಯಿ ಬೀಜ 1/2 ಲೋಟ
ಬ್ಯಾಡಗಿ ಮೆಣಸಿನಕಾಯಿ 15
ಒಣ ಕೊಬ್ಬರಿ 1 ಬಟ್ಟಲು
ಹುಣಿಸೇಹಣ್ಣು 1 ನಿಂಬೆ ಗಾತ್ರ

ಮಾಡುವ ವಿಧಾನ

ಬಾಣಲೆಗೆ ಮೇಲೆ ಹೇಳಿದ ಎಲ್ಲಾ ಪದಾರ್ಥಗಳನ್ನು ಬೇರೆ ಬೇರೆಯಾಗಿ ಮಧ್ಯಮ ಉರಿಯಲ್ಲಿ ಹದವಾಗಿ ಹುರಿದುಕೊಳ್ಳಿ. ಬೇಳೆಗಳನ್ನೂ, ಆಮೇಲೆ ಹುಣಸೆ ಹಣ್ಣನ್ನು ಮಿಕ್ಷಿಗೆ ಹಾಕಿ ಪುಡಿ ಮಾಡಿ. ಒಣ ಕೊಬ್ಬರಿ ಮಿಕ್ಸಿಗೆ ಹಾಕಿ ಪುಡಿ ಮಾಡಿಟ್ಟುಕೊಳ್ಳಿ. ಬ್ಯಾಡಗಿ ಮೆಣಸಿನಕಾಯಿ ಇಲ್ಲದಿದ್ದಲ್ಲಿ ಅಚ್ಚ ಮೆಣಸಿನಪುಡಿ 2 ಚಮಚ ತೆಗೆದುಕೊಳ್ಳಿ. ಇದನ್ನು ಹುರಿಯುವುದು ಬೇಡ. ಎಲ್ಲಾ ಮಿಕ್ಸ್ ಮಾಡುವಾಗ ಹಾಕಿ ಕೊಳ್ಳಬೇಕು.

ವಗ್ಗರಣೆ ಹಾಕಲು

ಸಾಸಿವೆ 2 ಚಮಚ
ಇಂಗು 1/2 ಚಮಚ
ಎಣ್ಣೆ 6 ಚಮಚ
ಕರಿಬೇವಿನ ಸೊಪ್ಪು 1 ದೊಡ್ಡ ಬಟ್ಟಲು

ಈಗ ಬೇರೆ ಬಾಣಲೆಗೆ ಎಣ್ಣೆ ಹಾಕಿ ಕಾದ ಮೇಲೆ ಸಾಸಿವೆ, ಇಂಗು ಮತ್ತು ಕರಿಬೇವು ಹಾಕಿ ಚೆನ್ನಾಗಿ ಹುರಿದು, ತಣ್ಣಗಾಗಲು ಬಿಡಿ. ತಣ್ಣಗಾದ ಮೇಲೆ ಕರಿಬೇವನ್ನು ಕೈಯಲ್ಲಿ ಚೆನ್ನಾಗಿ ಹಿಸುಕಿ ಪುಡಿಮಾಡಿಟ್ಟುಕೊಳ್ಳಿ. ಈಗ ಮಾಡಿಟ್ಟುಕೊಂಡ ಎಲ್ಲ ಪುಡಿಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ರುಚಿಗೆ ತಕ್ಕಷ್ಟು ಉಪ್ಪು ಮತ್ತು 2 ಚಮಚ ಸಕ್ಕರೆ (ಬೇಕಿದ್ದರೆ) ಹಾಕಿ ರುಚಿ ನೋಡಿ. ಹೆಚ್ಚು ಖಾರ ಬೇಕೆನಿಸಿದರೆ ಅಚ್ಚ ಖಾರದಪುಡಿ ಹಾಕಿ ಕೊಳ್ಳಿ.

ಬಾಯಲ್ಲಿ ನೀರೂರಿಸುವ ಕಡಲೆಬೇಳೆ ಚಟ್ನಿಪುಡಿಯನ್ನು ಅನ್ನ, ಉಪ್ಪಿಟ್ಟು, ಚಪಾತಿ, ರೊಟ್ಟಿಗಳೊಡನೆ ತಿನ್ನಲು ಸಖತ್ತಾಗಿರುತ್ತದೆ. ಚಟ್ನಿಪುಡಿಗೆ ಮೊಸರು ಸೇರಿಸಿದರೆ ಅದರ ಗಮ್ಮತ್ತೇ ಬೇರೆ.