ಹೆಸರು ಬೇಳೆ ಕ್ಯಾರೆಟ್ ಕೋಸಂಬರಿ

Palya

oi-Reena

By Hema S

Published: Monday, March 19, 2012, 15:14 [IST]

ಯುಗ-ಯುಗಗಳು ಕಳೆದರೂ ಯುಗಾದಿ ಮರಳಿ ಬರುತ್ತಿದೆ... ನಮಗೆ ಹೊಸ ವರ್ಷ ಅಂದರೆ ಯುಗಾದಿ. ಬಾಳೆಂದರೆ ಸಿಹಿ-ಕಹಿಗಳ ಮಿಲನ ಎಂಬುದನ್ನು ಜನತೆಗೆ ಜ್ಞಾಪಿಸುತ್ತಾ ಸಿಹಿ-ಕಹಿಯನ್ನು ಸಮಾನವಾಗಿ ಸ್ವೀಕರಿಸಬೇಕು, ಆಗ ಬದುಕು ಬಂಗಾರವಾಗುವುದು ಎಂಬ ಅರ್ಥವನ್ನು ಸಾರುವ ಯುಗಾದಿ ಬರುತ್ತಿದೆ.

ಯುಗಾದಿಗೆ ಮುಖ್ಯವಾಗಿ ಬೇವು ಬೆಲ್ಲ ತಯಾರಿಸಲಾಗುವುದು. ನಂತರ ಹಬ್ಬದ ಅಡುಗೆಯಲ್ಲಿ ಕೊಸಂಬರಿ, ಹೋಳಿಗೆ, ಪಚಡಿ, ಒಬ್ಬಟ್ಟು ಹೀಗೆ ಹತ್ತಾರು ಬಗೆಯ ಅಡುಗೆಯನ್ನು ತಯಾರಿಸಲಾಗುವುದು.

ಯುಗಾದಿಯಲ್ಲಿ ಅಮ್ಮಂದಿರುವ ಮಾಡುವ ರುಚಿಕರವಾದ ಅಡುಗೆಯನ್ನು ತಿಂದು ಗೊತ್ತಿರುತ್ತದೆ ವಿನಾಃ ತಯಾರಿಸಿ ಗೊತ್ತಿರುವುದಿಲ್ಲ. ಅದರಲ್ಲೂ ಹೊಸದಾಗಿ ಮದುವೆಯಾದವರಿಗೆ ಇದೊಂದು ಸವಾಲು, ಅತ್ತೆ ಮನೆಯಲ್ಲಿ ಹಬ್ಬದ ಅಡುಗೆ ತಯಾರಿಸುವುದು ಹೇಗೆ ಎಂಬ ಚಿಂತೆ.

ಚಿಂತೆ ಬೇಡ ರಿಲ್ಯಾಕ್ಸ್ ಆಗಿ ಏಕೆಂದರೆ ಕನ್ನಡ ಬೋಲ್ಡ್ ಸ್ಕೈ ನಿಮಗಾಗಿ ಯುಗಾದಿ ರೆಸಿಪಿಗಳನ್ನು ನೀಡುತ್ತಿದೆ. ಆದ್ದರಿಂದ ಯಾವುದೆ ಮುಜುಗರವಿಲ್ಲದೆ ಈ ಅಡುಗೆ ಮಾಡಿ ನೋಡಿ. ಮನೆಯವರು ನಿಮ್ಮ ಕೈ ನೈಪುಣ್ಯಕ್ಕೆ ಕ್ಲೀನ್ ಬೋಲ್ಡ್ ಆಗುವುದರಲ್ಲಿ ಯಾವುದೇ ಸಂಶಯವಿಲ್ಲ. ಮೊದಲಿಗೆ ಹೆಸರುಬೇಳೆ ಕ್ಯಾರೆಟ್ ಕೋಸಂಬರಿ ಮಾಡುವ ವಿಧಾನ ತಿಳಿಯೋಣ:

ಬೇಕಾಗುವ ಸಾಮಾಗ್ರಿಗಳು:
* 2 ಕ್ಯಾರೆಟ್ (ತುರಿದ ಕ್ಯಾರೆಟ್)
* 1/4 ಕಪ್ ಹೆಸರು ಬೇಳೆ ( 3 ಗಂಟೆ ಮುಂಚಿತವಾಗಿ ನೀರಿನಲ್ಲಿ ನೆನೆ ಹಾಕಿರಬೇಕು)
* ಸ್ವಲ್ಪ ತುರಿದ ತೆಂಗಿನಕಾಯಿ
* ಸ್ವಲ್ಪ ಕೊತ್ತಂಬರಿ ಸೊಪ್ಪು (ಕತ್ತರಿಸಿದ್ದು)
* ರುಚಿಗೆ ತಕ್ಕ ಉಪ್ಪು

ಒಗ್ಗರಣೆಗೆ:
* 2 ಚಮಚ ಎಣ್ಣೆ
* 1 ಚಮಚ ಸಾಸಿವೆ
* ಚಿಟಿಕೆಯಷ್ಟು ಇಂಗು
* 2-3 ಕತ್ತರಿಸಿದ ಹಸಿಮೆಣಸಿನ ಕಾಯಿ

ತಯಾರಿಸುವ ವಿಧಾನ:

1. ನೀರಿನಲ್ಲಿ ನೆನೆಹಾಕಿದ ಹೆಸರುಬೇಳೆಯನ್ನು ಅದರ ನೆನೆ ಹಾಕಿದ ವಾಸನೆ ಹೋಗುವವರೆಗೆ ಚೆನ್ನಾಗಿ ತೊಳೆಯಬೇಕು.

2. ಅದಕ್ಕೆ ತುರಿದ ಕ್ಯಾರೆಟ್ ಮತ್ತು ಕೊಬ್ಬರಿಯನ್ನು ಹಾಕಿ ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರ ಮಾಡಬೇಕು.

3. ಈಗ ಬಾಣಲೆಯನ್ನು ಬಿಸಿ ಮಾಡಿ ಸಾಸಿವೆ ಹಾಕಿ ಅದು ಚಟಾಪಟಾ ಶಬ್ದ ಬರುವಾಗ ಹಸಿಮೆಣಸಿನ ಕಾಯಿ ಮತ್ತು ಚಿಟಿಕೆಯಷ್ಟು ಇಂಗು ಸೇರಿಸಿ 1-2 ನಿಮಿಷ ಬಿಸಿ ಮಾಡಿ ಅದನ್ನು ಕೋಸಂಬರಿ ಮಿಶ್ರಣದ ಜೊತೆ ಸೇರಿಸಿ, ಕೊತ್ತಂಬರಿ ಸೊಪ್ಪು ಹಾಕಿದರೆ ಯುಗಾದಿಯ ಸ್ಪೆಷಲ್ ಹೆಸರು ಬೇಳೆ ಕ್ಯಾರೆಟ್ ಕೋಸಂಬರಿ ರೆಡಿ.