ಮೆಂತ್ಯದಹಿಟ್ಟಿನ ಗೊಜ್ಜಿನ ಪುಡಿ

ಮೆಂತ್ಯದ ಹಿಟ್ಟಿನ ಗೊಜ್ಜಿನ ಪುಡಿ ಮಾಡುವುದು ತುಂಬಾ ಸುಲಭ. ಯಾವುದಕ್ಕೂ ಈ ಗೊಜ್ಜಿನ ಪುಡಿ ನಿಮ್ಮ ಅಡುಗೆ ಮನೆಯ ಕಪಾಟಿನಲ್ಲಿರಲಿ. ಏಕೆಂದರೆ ಸಾರು-ಸಾಂಬಾರು ರುಚಿಸದೇ ಇದ್ದಾಗ ಬಿಸಿಬಿಸಿ ಅನ್ನಕ್ಕೆ ಮೆಂತ್ಯದ ಹಿಟ್ಟಿನ ಗೊಜ್ಜಿನ ಪುಡಿ ಕಲಸಿ ಚಪ್ಪರಿಸಿ ತಿನ್ನಬಹುದು. ಸಾಲದಕ್ಕೆ ಮೆಂತ್ಯೆಗೆ ವೈದ್ಯಕೀಯ ಗುಣಗಳೂ ಇವೆ. ಅದು ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ ಎಂದು ಆಯುರ್ವೇದ ವಿಜ್ಞಾನದಲ್ಲಿ ತಿಳಿಸಿದೆ. ತಡ ಯಾಕೆ ಒಮ್ಮೆ ಮಾಡಿ ನೋಡಿ.

ಜಾನಕಿ ರಾಮಕೃಷ್ಣ, ಬೆಂಗಳೂರು

ಬೇಕಾಗುವ ಸಾಮಗ್ರಿ:

ಕಡಲೇ ಬೇಳೆ : 50 ಗ್ರಾಂ
ತೊಗರಿ ಬೇಳೆ:50 ಗ್ರಾಂ
ಹೆಸರು ಬೇಳೆ: 50 ಗ್ರಾಂ
ಉದ್ದಿನ ಬೇಳೆ:50 ಗ್ರಾಂ
ಗೋಧಿ:40 ಗ್ರಾಂ
ಮೆಂತ್ಯ:1ಟೀ ಚಮಚ
ಎಣ್ಣೆ: ಒಗ್ಗರಣೆಗೆ
ಜೀರಿಗೆ:2 ಟೀ ಚಮಚ
ಮೆಣಸು: 25 ಗ್ರಾಂ

ಮಾಡುವ ವಿಧಾನ:
ಕಾದ ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿಕೊಂಡು ಪ್ರತ್ಯೇಕ ಪ್ರತ್ಯೇಕವಾಗಿ ಎಲ್ಲ ಪದಾರ್ಥಗಳನ್ನೂ ಒಂದೊಂದಾಗಿ ಹುರಿದುಕೊಳ್ಳಿ. ಮೆಂತ್ಯವನ್ನು ಸ್ವಲ್ಪ ಕೆಂಪಗಾಗುವವರೆಗೆ ಮಾತ್ರ ಹುರಿಯಿರಿ. ಎಲ್ಲ ಪದಾರ್ಥಗಳನ್ನೂ ಮಿಕ್ಸರ್ ನಲ್ಲಿ ನುಣ್ಣಗೆ ಅಂದರೆ ಮೈದಾ ಹಿಟ್ಟಿನ ಹದಕ್ಕೆ ಪುಡಿ ಮಾಡಿಟ್ಟುಕೊಳ್ಳಿ. ಈ ಪುಡಿ ನುಣ್ಣಗೆ ಇದ್ದಷ್ಟೂಗೊಜ್ಜು ರುಚಿಯಾಗಿರುತ್ತದೆ.

ಮೆಂತ್ಯದ ಹಿಟ್ಟಿನ ಗೊಜ್ಜು ತಯಾರಿಸುವಾಗ, ನಿಂಬೆ ಗಾತ್ರ ಹುಣಸೆಹಣ್ಣು ಶುಚಿಮಾಡಿ ನೀರಿನಲ್ಲಿನೆನೆಸಿ; ನಂತರ ಚೆನ್ನಾಗಿ ಕಿವುಚಿ ರಸ ತಯಾರಿಸಿ. ಈ ರಸಕ್ಕೆ (ಅಳತೆ ಒಂದು ಲೋಟ) ಮೆಂತ್ಯದ ಹಿಟ್ಟಿನ ಪುಡಿ 2 ಟೀ ಚಮಚ, ಸ್ವಲ್ಪ ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿ. ಈ ರೀತಿ ಕಲಸಿರುವ ಹಿಟ್ಟಿಗೆ ಬಾಳಕದ ಮೆಣಸಿನಕಾಯಿ ಅಥವಾ ಒಣ ಮೆಣಸಿನಕಾಯಿ ಒಗ್ಗರಣೆ ಕೊಡಬಹುದು. ಇದನ್ನು ಕುದಿಸುವ ಅಗತ್ಯವಿರುವುದಿಲ್ಲ.