ಎಗ್ ದುನಿಯಾ : ಮೊಟ್ಟೆಮನೆಗೆ ಸ್ವಾಗತ

ಇವಿಷ್ಟೂ ಪದಾರ್ಥಗಳು ಬೇಕು :

ಆರು ಕೋಳಿ ಮೊಟ್ಟೆ
ಸಣ್ಣ ಗಾತ್ರದ ನಾಲಕ್ಕು ಈರುಳ್ಳಿ
ಹಸುರು ಮೆಣಸಿನ ಕಾಯಿ 4
ಗರಂ ಮಸಾಲೆ ಪುಡಿ 1 ಚಮಚ
ಮೆಣಸಿನಪುಡಿ 1 ಚಮಚ
ದನಿಯ ಪುಡಿ 1 ಚಮಚ
ಚೂರು ಅರಿಶಿನದ ಪುಡಿ, ನಾಲಕ್ಕು ಲವಂಗ
ಎರಡು ಎಸಳು ಬೆಳ್ಳುಳ್ಳಿ, ಚೂರು ಹಸಿಶುಂಠಿ, ಸಾಸಿವೆ, ಕರಿಬೇವು, ಉಪ್ಪು
ಎರಡು ಟೊಮೆಟೋ, ಅರ್ಧ ಕಪ್ ತೆಂಗಿನ ತುರಿ. ಉಪ್ಪು.

ಮಾಡುವ ವಿಧಾನ :

* ನೀರಿಗೆ ಸ್ವಲ್ಪ ಉಪ್ಪು ಹಾಕಿ ಅದರಲ್ಲಿ ಮೊಟ್ಟೆಗಳನ್ನು ಬೇಯುವುದಕ್ಕೆ ಹಾಕಿ. ಕುಕ್ಕರಿನಲ್ಲಿ ಬೇಯುವುದಕ್ಕೆ ಬಿಟ್ಟರೆ ಮೊಟ್ಟೆ ಬೆಂದು ಒಡೆಯುತ್ತದೆ. ಅದಕ್ಕೋಸ್ಕರ ಪಾತ್ರೆಯಲ್ಲಿ ನೀರು ಹಾಕಿ ಬೇಯಿಸಿದರೆ ಕ್ಷೇಮ. ಚೆನ್ನಾಗಿ ಬೆಂದುಕೊಳ್ಳಲು 20 ನಿಮಿಷವಾದರೂ ಬೇಕು.

* ತೆಂಗಿನ ತುರಿಯನ್ನು ಮಿಕ್ಸಿಗೆ ಹಾಕಿ ಚೆನ್ನಾಗಿ ರುಬ್ಬಿ ಒಂದು ಕಪ್ ಅಷ್ಟು ತೆಂಗಿನ ಹಾಲು ಮಾಡಿಟ್ಟುಕೊಳ್ಳಿರಿ.

* ಬಾಣಲೆಯಲ್ಲಿ ಚೂರು ಅಡುಗೆ ಎಣ್ಣೆ ಹಾಕಿ ಕಾದನಂತರ ಅದಕ್ಕೆ ದನಿಯ ಪುಡಿ, ಮೆಣಸಿನಪುಡಿ, ಗರಂ ಮಸಾಲಾ ಪುಡಿ, ಅರಿಶಿನದ ಪುಡಿ, ಲವಂಗ, ಬೆಳ್ಳುಳ್ಳಿಗಳನ್ನು ಹಾಕಿ ಹುರಿದುಕೊಳ್ಳಬೇಕು. ಆನಂತರ ಇದನ್ನು ಸ್ವಲ್ಪ ನೀರು ಬೆರೆಸಿ ಮಿಕ್ಸಿಗೆ ಹಾಕಿ ಚಟ್ನಿ ಮಾಡಿಟ್ಟುಕೊಳ್ಳಿರಿ.

* ಇನ್ನೊಂದು ಕಡೆಯಲ್ಲಿ ಹಸಿಮೆಣಸಿನಕಾಯಿ, ಈರುಳ್ಳಿ, ಹಸಿಶುಂಠಿ, ಟೊಮೆಟೋಗಳನ್ನು ಸಣ್ಣಗೆ ಹೆಚ್ಚಿ ಇಟ್ಟುಕೊಂಡಿರತಕ್ಕದ್ದು.

* ಒಂದು ಅಗಲಬಾಯಿಯ ನಾನ್ ಸ್ಟಿಕಿ ತವದಲ್ಲಿ ನಾಕಾರು ಚಮಚ ಅಡುಗೆ ಎಣ್ಣೆ ಹಾಕಿ ಬಿಸಿಮಾಡಿ. ಅದಕ್ಕೆ ಸಾಸಿವೆ, ಕರಿಬೇವು, ಈರುಳ್ಳಿ, ಹಸಿಶುಂಠಿ, ಹಸಿಮೆಣಸಿನಕಾಯಿ ಹಾಕಿ ನಿಧಾನವಾಗಿ ಬಾಡಿಸಿ ಅಥವಾ ತಾಳಿಸಿ ಅಥವಾ ಒಗ್ಗರಿಸಿ.

* ಈ ಒಗ್ಗರಣೆಗೆ ರುಬ್ಬಿಕೊಂಡ ಮಸಾಲೆ ಪದಾರ್ಥ ಹಾಕಿ ಸ್ವಲ್ಪ ನೀರನ್ನೂ ಹಾಕಿ ಕುದಿಯಲು ಬಿಡಿ. ಒಂದು ಕುದಿ ಬಂದನಂತರ ಅದಕ್ಕೆ ತೆಂಗಿನ ಹಾಲನ್ನು ಹಾಕಿ ಕೊನೆಯಲ್ಲಿ ಬೆಂದ ಮೊಟ್ಟೆಗಳ ಚಿಪ್ಪನ್ನು ಕಿತ್ತು ಬಿಸಾಕಿ ಒಂದೊಂದಾಗಿ ಇಳಿಬಿಡಿ. ಪ್ಯಾನ್ ಇಳಿಸುವುದಕ್ಕೆ ಮುಂಚೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ.

ಕೋಳಿ ಮೊಟ್ಟೆ ಕರಿಯನ್ನು ಯಾವುದರ ಜತೆ ಸವಿಯುವುದಕ್ಕೆ ನಿಮಗೆ ಇಷ್ಟ? ಗಂಜಿ, ಕೋರಿರೋಟಿ, ಅನ್ನ, ಗೋಧಿ ಚಪಾತಿ, ರಾಗಿ ಅಕ್ಕಿರೊಟ್ಟಿ, ನೀರು ದೋಸೆ ಅಥವಾ ಡೈಲಿ ಬ್ರೆಡ್?