ಚಿಕನ್ ಭಟ್ಟಿ-ಚಾಟ್ಸ್ ರೆಸಿಪಿ

ಈ ವೀಕೆಂಡ್ ಗೆ ಏನಾದರೂ ನಾನ್ ವೆಜ್ ಸ್ಪೆಷೆಲ್ ತಯಾರಿಸಬೇಕೆಂದು ಅಂದುಕೊಂಡಿದ್ದರೆ ಈ ಚಾಟ್ ರೆಸಿಪಿ ಟ್ರೈ ಮಾಡಬಹುದು. ಈ ಚಾಟ್ ರೆಸಿಪಿಯಲ್ಲಿ ಮೊದಲು ಚಿಕನ್ ಮಸಾಲೆ ಜೊತೆ ಬೇಯಿಸಿ, ನಂತರ ಚಾಟ್ ತಯಾರಿಸಲಾಗುವುದು.

ಈ ರೆಸಿಪಿಗೆ ಬಳಸುವ ಮಸಾಲೆ ಹಾಗೂ ಚಾಟ್ ಸಾಮಾಗ್ರಿಗಳಿಂದ ಇದು ತಿನ್ನಲು ತುಂಬಾ ರಚಿಕರವಾಗಿರುತ್ತದೆ. ಇದನ್ನು ಟ್ರೈ ಮಾಡಬೇಕೆಂದು ಅನಿಸಿದರೆ ರೆಸಿಪಿ ನೋಡಿ ಇಲ್ಲಿದೆ:

ಮಸಾಲೆ ಸಾಮಾಗ್ರಿಗಳು:
* ಕೊತ್ತಂಬರಿ ಬೀಜ ಅರ್ಧ ಚಮಚ
* ಮೆಂತೆ ಬೀಜ ಅರ್ಧ ಚಮಚ
* ಕರಿಮೆಣಸಿನ ಪುಡಿ ಅರ್ಧ ಚಮಚ
* ಗರಂ ಮಸಾಲ ಅರ್ಧ ಚಮಚ
* ದುಂಡು ಮೆಣಸು 1
* ಜೀರಿಗೆ ಅರ್ಧ ಚಮಚ
* ಕೆಂಪು ಮೆಣಸಿನ ಪುಡಿ 1 ಚಮಚ

ಚಾಟ್ಸ್ ಸಾಮಾಗ್ರಿಗಳು:
* ಮೂಳೆಯಿಲ್ಲದ ಸಾಮಾನ್ಯ ಗಾತ್ರದ ಚಿಕನ್ ತುಂಡು 10
* ನಿಂಬೆ ಹಣ್ಣು 1
* ಶುಂಠಿ ಪೇಸ್ಟ್ 1 ಚಮಚ
* ಈರುಳ್ಳಿ 1
* ಟೊಮೆಟೊ 1
* ಸೌತೆಕಾಯಿ 1 (ಕತ್ತರಿಸಿದ್ದು)
* ಪುದೀನಾ 2 ಎಲೆ
* ಕರಿಮೆಣಸಿನ ಪುಡಿ ಅರ್ಧ ಚಮಚ
* ಬ್ಲ್ಯಾಕ್ ಸಾಲ್ಟ್
* ಎಣ್ಣೆ

ತಯಾರಿಸುವ ವಿಧಾನ:

1. ಮಸಾಲೆ ಸಾಮಾಗ್ರಿಗಳಲ್ಲಿ ಹೇಳಿರುವ ಎಲ್ಲಾ ವಸ್ತುಗಳನ್ನು ಮಿಕ್ಸಿಯಲ್ಲಿ ಹಾಕಿ ನುಣ್ಣನೆ ರುಬ್ಬಿಕೊಳ್ಳಬೇಕು.

2. ನಂತರ ಚಿಕನ್ ತುಂಡುಗಳನ್ನು ಈ ಮಸಾಲೆಯನ್ನು ಮಿಶ್ರಣ ಮಾಡಿ ಸ್ವಲ್ಪ ಉಪ್ಪು ಹಾಕಿ, ನಿಂಬೆ ರಸ ಹಿಂಡಿ ಅರ್ಧ ಗಂಟೆ ಕಾಲ ಇಡಬೇಕು.

3. ಈಗ ಪಾತ್ರೆಯಲ್ಲಿ ಎಣ್ಣೆಯನ್ನು ಬಿಸಿಮಾಡಿ ಅದರಲ್ಲಿ ಚಿಕನ್ ತುಂಡುಗಳನ್ನು ಹಾಕಿ ಕಡಿಮೆ ಉರಿಯಲ್ಲಿ 10-15 ನಿಮಿಷ ಬೇಯಿಸಿ.

4. ಚಿಕನ್ ಬೆಂದ ನಂತರ ಅದನ್ನು ತಟ್ಟೆಯಲ್ಲಿ ಹಾಕಿ ತರಕಾರಿಗಳನ್ನು ಸ್ಟೈಲಾಗಿ ಕತ್ತರಿಸಿ ತಟ್ಟೆಯಲ್ಲಿಟ್ಟು ಚಾಟ್ ಮಸಾಲ, ಕರಿ ಮೆಣಸಿನ ಪುಡಿ ಹಾಗೂ ಬ್ಲ್ಯಾಕ್ ಸಾಲ್ಟ್ ಅನ್ನು ಅದರ ಮೇಲೆ ಉದುರಿಸಿದರೆ ಸರ್ವ್ ಮಾಡಲು ಚಿಕನ್ ಬಾಟಿ ಚಾಟ್ ರೆಡಿ.