ಆರೋಗ್ಯಕರ ಮತ್ತು ರುಚಿಯಾದ ಮೀನಿನ ಟಿಕ್ಕಾ

ಮೀನಿಂದ ತಯಾರಿಸಿದ ಆಹಾರ ರುಚಿ ಮಾತ್ರವಲ್ಲ, ಆರೋಗ್ಯಕ್ಕೂ ಒಳ್ಳೆಯದು. ಮೀನಿನಲ್ಲಿ ಒಳ್ಳೆಯ ಕೊಬ್ಬಿನಂಶ ಮತ್ತು ಅಧಿಕ ಪೋಷಕಾಂಶ ಇರುವುದರಿಂದ ವೈದ್ಯರು ಕೂಡ ಇದನ್ನು ತಿನ್ನುವಂತೆ ಸಲಹೆ ನೀಡುತ್ತಾರೆ. ಮೀನಿನ ಆಹಾರವನ್ನು ನಾನಾ ಬಗೆಯ ರುಚಿಯಲ್ಲಿ ತಯಾರಿಸಬಹುದು. ಇವತ್ತು ನಾವು ಮೀನು ಟಿಕ್ಕಾ ತಯಾರಿಸುವ ವಿಧಾನ ತಿಳಿಯೋಣ:

ತಯಾರಿಸಲು ಬೇಕಾಗುವ ಸಾಮಾಗ್ರಿಗಳು:

* 1/2 ಕೆಜಿ ಮೀನಿನ ತುಂಡುಗಳು (ಯಾವ ಮೀನು ಬೇಕಾದರೂ ಆಗಬಹುದು)
* 150 ಗ್ರಾಂ ವನಸ್ಪತಿ
* 1 ಚಮಚ ಅಜ್ವೈನ್
* 2 ಚಮಚ ಜೀರಿಗೆ ಪುಡಿ
* 2ಚಮಚ ಗರಂ ಮಸಾಲ
* 1 ಚಮಚ ಬೆಳ್ಳುಳ್ಳಿ ಪೇಸ್ಟ್
* 2 ಚಮಚ ಮೈದಾ
* ನಿಂಬೆರಸ
* 5 ಚಮಚ ಪುದೀನಾ ಅಥವಾ ಕೊತ್ತಂಬರಿ ಪೇಸ್ಟ್
* 1/2 ಚಮಚ ಕರಿಮೆಣಸಿನ ಪುಡಿ
* ಕತ್ತರಿಸಿದ ಈರುಳ್ಳಿ 1
* 60 ಗ್ರಾಂ ಮೊಸರು
* 1/4 ಚಮಚ ಅರಿಶಿಣ ಪುಡಿ
* ಖಾರಕ್ಕೆ ತಕ್ಕ ಕೆಂಪು ಮೆಣಸಿನ ಪುಡಿ
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಬೆಳ್ಳುಳ್ಳಿ ಪೇಸ್ಟ್, ಅಜ್ವೈನ್, ಜೀರಿಗೆ ಪುಡಿ, ಗರಂ ಮಸಾಲ ಪುಡಿ, ಸ್ವಲ್ಪ ನಿಂಬೆ ರಸ, ಪುದೀನಾ ಅಥವಾ ಕೊತ್ತಂಬರಿ ಪೇಸ್ಟ್, ಉಪ್ಪು, ಕೆಂಪು ಮೆಣಸಿನ ಪುಡಿ,ಮ ಕರಿಮೆಣಸಿನ ಪುಡಿ, ಅರಿಶಿಣ ಪುಡಿಯನ್ನು ಮೊಸರಿನಲ್ಲಿ ಹಾಕಿ ಮಿಶ್ರ ಮಾಡಬೇಕು.

2. ಈ ಮಿಶ್ರಣಕ್ಕೆ ಮೀನಿನ ತುಂಡುಗಳನ್ನು ಹಾಕಿ ಮಿಶ್ರ ಮಾಡಿ 3 ಗಂಟೆ ಕಾಲ ಇಡಬೇಕು.

3. ಈಗ ಬಾಣಲೆಯಲ್ಲಿ ಎಣ್ಣೆ ಹಾಕಿ ಕಾಯಿಸಿ ಅದರಲ್ಲಿ ಮೀನಿನ ತುಂಡುಗಳನ್ನು ಹಾಕಿ ಕರಿದು ತೆಗೆಯಬೇಕು.

4. ಈಗ ತಯಾರಿಸಿದ ಟಿಕ್ಕಾವನ್ನು ತಟ್ಟೆಗೆ ಹಾಕಿ, ಕತ್ತರಿಸಿದ ಈರುಳ್ಳಿ ಮತ್ತು ನಿಂಬೆ ಹಣ್ಣಿನ ತುಂಡುಗಳನ್ನು ಇಟ್ಟು ಬಡಿಸಬೇಕು.