ಕಣಿಲೆ ಪತ್ರೊಡೆ ಮತ್ತು ಪಲ್ಯ

ಹುಟ್ಟುತ್ತ ಹುಲ್ಲಾದೆ, ಬೆಳೆಯುತ್ತ ಮರವಾದೆ... ನೀನಾರಿಗಾದೆ ಬಿದಿರು, ಎಳೆ ಬಿದಿರು..!!

• ಸುಮತಿ ಕೆ. ಸಿ. ಭಟ್‌, ಅದೂರು

ಬೇಕಾಗುವ ಸಾಮಗ್ರಿ :

ಒಂದು ಫೂಟ್‌ ಉದ್ದದ ಕಣಿಲೆ (ಎಳೆ ಬಿದಿರು),
ಕುಚ್ಚಲಕ್ಕಿ 1 ಪಾವು, ಬೆಳ್ತಿಗೆ ಅಕ್ಕಿ- 1 ಪಾವು
ಕೊತ್ತಂಬರಿ ಬೀಜ 2 ಚಮಚ,
ಜೀರಿಗೆ ಅರ್ಧ ಚಮಚ,
ಚಿಟಿಕೆ ಅರಸಿನ ಪುಡಿ,
ಒಣಮೆಣಸು- 4,
ನೆಲ್ಲಿ ಕಾಯಿ ಗಾತ್ರದ ಹುಳಿ,
ನಿಂಬೆ ಗಾತ್ರದ ಬೆಲ್ಲ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು .

ಮಾಡುವ ವಿಧಾನ : ಕಣಿಲೆಯ ಮೆದುಭಾಗವನ್ನು ಸಣ್ಣಗೆ ತುರಿದು ನೀರು ಹಾಕಿ ಬೇಯಿಸಿ. ನೀರು ಸೋಸಿಟ್ಟುಕೊಳ್ಳಿ. ನೆನೆಯಿಸಿದ ಅಕ್ಕಿ ತೊಳೆದು, ಉಪ್ಪು, ಹುಳಿ, ಮೆಣಸು, ಕೊತ್ತಂಬರಿ, ಜೀರಿಗೆ, ಅರಸಿನ ಹುಡಿ, ಬೆಲ್ಲ ಹಾಕಿ ತುಸು ನೀರು ಹಾಕಿ ತರಿ ತರಿಯಾಗಿ ಗಟ್ಟಿಯಾಗಿ ರುಬ್ಬಿ. ಬೇಯಿಸಿದ ಕಣಿಲೆ ಸೇರಿಸಿ. ನಂತರ ದೊಡ್ಡ ಉಂಡೆ ಮಾಡಿ ಹಬೆಯಲ್ಲಿ ಬೇಯಿಸಿ. ಬೆಂದ ಮೇಲೆ ತುಪ್ಪ ಹಾಕಿ ತಿನ್ನಬಹುದು. ಇಲ್ಲವೇ ಪುಡಿ ಒಗ್ಗರಣೆ ಹಾಕಿ ಬೆಲ್ಲ, ತೆಂಗಿನ ತುರಿ ಸೇರಿಸಿಯೂ ತಿನ್ನಬಹುದು.

*

ಕಣಿಲೆಯ ಪಲ್ಯ

ಬೇಕಾಗುವ ಸಾಮಗ್ರಿ :

ಕಣಿಲೆ ತುರಿ - 2 ಕಪ್‌,
ಬೆಲ್ಲ - ನೆಲ್ಲಿಕಾಯಿ ಗಾತ್ರದ್ದು ,
ಮೆಣಸಿನ ಹುಡಿ 1 ಚಮಚ,
ಚಿಟಿಕೆ ಅರಸಿನ ಪುಡಿ,
ಸ್ವಲ್ಪವೇ ಹುಳಿ,
ಒಗ್ಗರಣೆ ವಸ್ತು,
ತೆಂಗಿನ ತುರಿ ಕಾಲು ಕಪ್‌ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು.

ಮಾಡುವ ವಿಧಾನ : ಕಣಿಲೆ ತುರಿಯನ್ನು ಬೇಯಿಸಿ ನೀರು ಸೋಸಿಟ್ಟುಕೊಳ್ಳಿ. ನೀರು ಬಸಿದ ನಂತರ ಮೆಣಸಿನ ಪುಡಿ, ಅರಸಿನ ಪುಡಿ, ಬೆಲ್ಲ, ಹುಳಿ, ಉಪ್ಪು ಹಾಕಿ. ಬಾಣಲೆಯಲ್ಲಿ ಉದ್ದಿನ ಬೇಳೆ ಒಗ್ಗರಣೆಗಿಟ್ಟು, ಸಾಸಿವೆ ಸಿಡಿದ ನಂತರ ಎಲ್ಲವನ್ನೂ ಹಾಕಿ, ತುಸು ನೀರು ಹಾಕಿ ಮುಚ್ಚಿಡಿ. ನೀರು ಆರುತ್ತಾ ಬಂದಾಗ ತೆಂಗಿನ ತುರಿ ಹಾಕಿ ಎರಡು ಚಮಚ ಎಣ್ಣೆ ಹಾಕಿ ಗೊಟಾಯಿಸಿ ಕೆಳಗಿಳಿಸಿ.