ಎಲ್ಲರೂ ಬಾದಾಮಿ ಹಾಲೇ ಕುಡಿಯಿರಿ-ಸಂಪಾದಕ

Drinks

oi-Sumalatha N

By Sumalatha N

| Published: Saturday, July 30, 2011, 13:21 [IST]

ಈ ಚುಮು ಚುಮು ಚಳಿಯಲ್ಲಿ ಬಿಸಿ ಬಿಸಿ ಬಾದಾಮಿ ಹಾಲು ಕುಡಿಯುತ್ತಿದ್ದರೆ ಸ್ವರ್ಗಕ್ಕೆ ಮೂರೇ ಗೇಣು. ತುಂಬಾ ಖುಷಿಯಾದ್ರೆ ಹೊಟ್ಟೆ ತುಂಬಾ ಹಾಲು ಕುಡಿದಷ್ಟು ಖುಷಿಯಾಯ್ತು ಅಂತ ನಾವೆಲ್ಲ ಹೇಳೋದು ರೂಢಿ. ಇದೀಗ ನಟಿ ರಮ್ಯಾ, ಮುಖ್ಯಮಂತ್ರಿ ಯಡಿಯೂರಪ್ಪ ರಾಜೀನಾಮೆ ಹಿನ್ನೆಲೆಯಲ್ಲಿ ಹೊಟ್ಟೆ ತುಂಬಾ ಬಾದಾಮಿ ಹಾಲು ಕುಡಿದು ಸಂತೋಷ ಪಡಿ ಅಂತ ಎಲ್ಲರಿಗೂ ಹೇಳಿ ಸುದ್ದಿಯಾಗಿದ್ದಾರೆ. ಈ ಟೈಮ್ ನಲ್ಲಿ ನೀವು ಏನು ಮಾಡುತ್ತೀರ?

ಈಗೇನು ಎಲ್ಲ ಕಡೆ ಬಾದಾಮಿ ಪೌಡರ್ ಸಿಗುತ್ತೆ. ಮನೆಗೆ ತಂದು ಒಂದೇ ಕ್ಷಣಕ್ಕೆ ಮಾಡಿ ಜಂ ಅಂತ ಕುಡಿದುಬಿಡಬಹುದು ಅಂತ ನೀವು ಮನಸಲ್ಲೇ ಲೆಕ್ಕಾಚಾರ ಹಾಕೋತಿರಬಹುದು. ಆದ್ರೆ ಆ ಯೋಚನೆನ ಸ್ವಲ್ಪ ಹಿಂದಕ್ಕೆ ಸರಿಸಿ. ಅಲ್ಲಿ ಇಲ್ಲಿ ಸಿಗೋ ಕೃತಕ ವಸ್ತು ಬೆರೆಸಿ ಮಾಡೊ ಬಾದಾಮಿ ಹಾಲು ಬಿಟ್ಟು, ಮನೆಯಲ್ಲೇ ರುಚಿಕಟ್ಟಾದ, ಆರೋಗ್ಯಪೂರ್ಣವಾದ ಬಾದಾಮಿ ಪೌಡರ್ ಮಾಡಿ ಕುಡಿಯೋದರ ಬಗ್ಗೆ ಯೋಚನೆ ಮಾಡಿ.

ಮನೆಯಲ್ಲೇ ಹೇಗೆ ರುಚಿಕರವಾದ ಬಾದಾಮಿ ಹಾಲು ತಯಾರಿಸಬಹುದು? ತುಂಬಾ ಸಮಯ ಹಿಡಿಯುತ್ತೇನೊ ಅಂತ ಅಂದ್ಕೊಬೇಡಿ. ಅದು ತುಂಬಾ ಸರಳ. ಬಾದಾಮಿ ಹಾಲು ಮಾಡಲು ಬೇಕಾಗುವ ಸಾಮಾನುಗಳು: ಒಳ್ಳೆ ಗುಣಮಟ್ಟದ ಬಾದಾಮಿ ಬೀಜ, ಸ್ವಲ್ಪ ಪಿಸ್ತ, ಕಲ್ಲುಸಕ್ಕರೆ, ಯಾಲಕ್ಕಿ, ಕೇಸರಿ, ಸ್ವಲ್ಪ ಉಪ್ಪು. .

ಮಾಡುವ ವಿಧಾನ: ಚೆನ್ನಾಗಿರುವ ಬಾದಾಮಿ ಬೀಜವನ್ನು ಆರಿಸಿಕೊಂಡು ಬಾಣಲೆಯಲ್ಲಿ ಬೆಚ್ಚಗೆ ಹುರಿದುಕೊಳ್ಳಬೇಕು. ಹುರಿದುಕೊಂಡ ಬಾದಾಮಿ ಸಿಪ್ಪೆಯನ್ನು ಸುಲಿದು ಅದರೊಂದಿಗೆ ಪಿಸ್ತ, ಸಿಪ್ಪೆ ಬಿಡಿಸಿದ ಯಾಲಕ್ಕಿ, ಕೇಸರಿ, ಸ್ವಲ್ಪ ಉಪ್ಪು ಬೆರೆಸಿ ಮಿಕ್ಸಿಯಲ್ಲಿ ಹಾಕಿ ಪುಡಿ ಮಾಡಿಕೊಳ್ಳಬೇಕು. ಆ ನಂತರ ಮುಂಚೆಯೇ ಪುಡಿಮಾಡಿಟ್ಟುಕೊಂಡಿದ್ದ ಕೆಂಪು ಕಲ್ಲುಸಕ್ಕರೆಯನ್ನು ಬೆರೆಸಬೇಕು. ಈಗ ಹಾಲಿಗೆ ಈ ಬಾದಾಮಿ ಮಿಶ್ರಣ ಹಾಕಿ ಕುಡಿದು ನೋಡಿ. ಆಹಾ ಅಂತ ಬಾಯಿ ಚಪ್ಪರಿಸಿಕೊಂಡು ಫುಲ್ ಖುಷ್ ಆಗಿ ಹೋಗ್ತೀರ. ಚಳಿಗಾಲಕ್ಕೆ ಬಿಸಿ ಬಿಸಿಯಾಗಿ, ಬೇಸಿಗೆಯಲ್ಲಿ ಫ್ರೀಜರ್ ನಲ್ಲಿಟ್ಟು ತಣ್ಣಗೆ ಬಾದಾಮಿ ಹಾಲು ಕುಡಿದು ಹೊಟ್ಟೆ ತಣ್ಣಗೆ ಮಾಡಿಕೊಳ್ಳಬಹುದು..

ಒಳ್ಳೇದು ಮಾಡಿದವರಿಗೆ ಹೊಟ್ಟೆ ತುಂಬಾ ಹಾಲು ಕುಡಿದು ಸಂತೋಷವಾಗಿರು ಅಂತ ಹಾರೈಸುತ್ತಿದ್ದರು ನಮ್ಮ ಹಿರಿಯರು. ಇದೀಗ ಹೊಟ್ಟೆ ತುಂಬಾ ಬಾದಾಮಿ ಹಾಲು ಕುಡಿದು ಸಂತೋಷವಾಗಿರಿ ಅನ್ನೋದು ನಮ್ಮ ಸರದಿ.

;