ಹಸಿರು ಟೊಮ್ಯಾಟೋ ಚಟ್ನಿ : ರೊಟ್ಟಿ-ಚಪಾತಿಗೆ ಸಾಥ್‌

ನಿಮಗೆ ಈ ಚಟ್ನಿ ತುಂಬಾ ಖಾರವೆನಿಸಿದರೆ, ಸ್ವಲ್ಪ ಬೆಲ್ಲ ಹಾಕಿ ಖಾರ ಕಡಿಮೆ ಮಾಡಿಕೊಳ್ಳಬಹುದು.

• ಅಮೃತಾ

ಬೇಕಾಗುವ ಸಾಮಗ್ರಿಗಳು :

• 4 ಮಧ್ಯಮ ಗಾತ್ರದ ಟೊಮ್ಯಾಟೋ ಕಾಯಿಗಳು
• 2 ಚಮಚ ಕತ್ತರಿಸಿದ ಕೋತಂಬರಿ
• 2-4 ಚಮಚ ಕಡಲೇಕಾಯಿ ಎಣ್ಣೆ
• 1 ಚಮಚ ಜೀರಿಗೆ
• 1 ಚಮಚ ಎಳ್ಳು
• 4-5 ಎಸಳು ಬೆಳ್ಳುಳ್ಳಿ(ಕಚ್ಚರಿಸಿದ್ದು)
• 2-3 ಹಸಿಮೆಣಸಿನಕಾಯಿ
• 1 ಚಮಚ ಸಾಸಿವೆ
• 1 ಚಿಟಿಕೆ ಇಂಗು
• 1 ಕಡ್ಡಿ ಕರಿಬೇವು

ಮಾಡುವ ವಿಧಾನ :

ಟೊಮ್ಯಾಟೋಗಳನ್ನು ಸ್ವಲ್ಪ ಮಧ್ಯಮ ಗಾತ್ರದಲ್ಲಿ ಕತ್ತರಿಸಿಕೊಳ್ಳಿ. ಒಲೆಯ ಮೇಲೆ ಹಂಚು ಕಾಯಲು ಇಡಿ. ಕಾದ ಹಂಚಿನಲ್ಲಿ ಕತ್ತರಿಸಿದ ಟೊಮ್ಯಾಟೋ ಹಾಕಿ, ಕಂದು ಬಣ್ಣ ಬರುವವರೆಗೆ ಹುರಿದುಕೊಳ್ಳಿ. ಟೊಮ್ಯಾಟೋ ಜೊತೆಗೆ ಕೊತ್ತಂಬರಿ, ಬೆಳ್ಳುಳ್ಳಿ, ಎಳ್ಳು, ಜೀರಿಗೆ, ಹಸಿಮೆಣಸಿನಕಾಯಿ ಹುರಿದುಕೊಳ್ಳಿ.

ಈ ಪದಾರ್ಥಗಳನ್ನು ಹುರಿದುಕೊಳ್ಳುವಾಗ ಆಗಷ್ಟು-ಈಗಿಷ್ಟು ಕಡಲೇಕಾಯಿ ಎಣ್ಣೆ ಬಳಸಿಕೊಳ್ಳಿ. ಹುರಿದುಕೊಂಡ ಎಲ್ಲ ಪದಾರ್ಥಗಳನ್ನು ಮಿಕ್ಸರ್‌ಗೆ ಹಾಕಿ ಹದವಾಗಿ ರುಬ್ಬಿಕೊಳ್ಳಿ.

ಆನಂತರ ಒಂದೆರಡು ಚಮಚ ಕಡಲೇಕಾಯಿ ಎಣ್ಣೆಯಲ್ಲಿ ಎಳ್ಳು, ಜೀರಿಗೆ, ಸಾಸಿವೆ, ಇಂಗು ಹಾಕಿ ಒಗ್ಗರಣೆ ಹಾಕಿ. ಒಗ್ಗರಣೆಗೆ ಕರಿಬೇವು ಬೇಕಿದ್ದರೆ ಬಳಸಿಕೊಳ್ಳಿ. ರುಬ್ಬಿಕೊಂಡ ಮಿಶ್ರಣಕ್ಕೆ ಒಗ್ಗರಣೆ ಹಾಕಿ ಬೆರಸಿಕೊಳ್ಳಿ. ಈಗ ಚಟ್ನಿಯೇನೋ ರೆಡಿ. ಆದರೆ ನಿಮಗೆ ತುಂಬಾ ಖಾರವೆನಿಸಿದರೆ, ಸ್ವಲ್ಪ ಬೆಲ್ಲ ಹಾಕಿ ಖಾರ ಕಡಿಮೆ ಮಾಡಿಕೊಳ್ಳಬಹುದು.

ಈ ಚಟ್ನಿ ರೊಟ್ಟಿ, ಚಪಾತಿ, ದೋಸೆ ಜೊತೆಯಲ್ಲಿ ತಿನ್ನಲು ರುಚಿಕಟ್ಟಾಗಿರುತ್ತದೆ. ಅನ್ನದೊಂದಿಗೂ ನೆಂಜಿಕೊಂಡು ತಿನ್ನಬಹುದು.