ಟೊಮೊಟೊ ಗೊಜ್ಜು

ಟೊಮೊಟೊ ಹಣ್ಣಿನಿಂದ ತುಂಬಾ ಡಿಶಸ್‌ ಮಾಡಬಹುದು, ಅದರಲ್ಲಿ ಇದು ಒಂದು. ಇದು ಚಪಾತಿಗೆ ನೆಂಚಿಕೊಳ್ಳಲು ಬಲು ಚೆಂದ. ಬೇಗ ತಯಾರಿಸಬಹುದು.

• ಹೊಸಮನೆ ಕುಮುದಾ ಶಂಕರ್‌, ಜೆಡ್ಡಾ, ಸೌದಿ ಅರೇಬಿಯಾ

ಬೇಕಾಗುವ ಪದಾರ್ಥಗಳು :

ಹಣ್ಣಾಗಿರುವ ಟೊಮೊಟೊ 4ರಿಂದ 5
ಈರುಳ್ಳಿ 2
ಹಸಿಮೆಣಸಿನಕಾಯಿ 2
ಕರಿಬೇವು(ಬೇಕಾದರೆ)
ಎಣ್ಣೆ
ಸಾಸಿವೆ
ಉದ್ದಿನ ಬೇಳೆ
ಕೆಂಪುಮೆಣಸಿನ ಪುಡಿ
ಉಪ್ಪು
ಕೊತ್ತುಂಬರಿ ಸೊಪ್ಪು

ಮಾಡುವ ವಿಧಾನ :

ಮೊದಲಿಗೆ ಈರುಳ್ಳಿ, ಹಸಿಮೆಣಸಿನಕಾಯಿ , ಕೊತ್ತುಂಬರಿ ಹೆಚ್ಚಿಕೊಳ್ಳಿ.

ಒಗ್ಗರಣೆಗೆ ಪಾತ್ರೆ ಇಟ್ಟು ಎಣ್ಣೆ ಹಾಕಿ, ಕಾದ ಬಳಿಕ ಸಾಸಿವೆ,ಉದ್ದಿನಬೇಳೆ, ಕರಿಬೇವು, ಹೆಚ್ಚಿದ ಈರುಳ್ಳಿ, ಮೆಣಸಿನಕಾಯಿ ಹಾಕಿ ಬಾಡಿಸಿ, ನಂತರ ಟೊಮೊಟೊ ಹಾಕಿ ಚೆನ್ನಾಗಿ ತಿರುವಿ. ಟೊಮೊಟೊ ಬೇಯಲು ಬಿಡಿ.

ಸ್ವಲ್ಪ ಹೊತ್ತು ಎಣ್ಣೆಯಲ್ಲಿ ಬೆಂದ ನಂತರ ತೆಳುವಾಗಿ, ಹೆಚ್ಚಾಗಿ ಬೇಕಾಗಿದ್ದರೆ ಸ್ವಲ್ಪ ನೀರು ಹಾಕಿ, ಉಪ್ಪು ಮತ್ತು ಕೆಂಪುಮೆಣಸಿನಪುಡಿ ಹಾಕಿ ಚೆನ್ನಾಗಿ ತಿರುವಿ. ಸ್ವಲ್ಪ ಹೊತ್ತು ಹಾಗೆ ಬಿಟ್ಟು ನಂತರ ಕೊತ್ತುಂಬರಿ ಉದುರಿಸಿ. ಇದಕ್ಕೆ ಬೇಕಾದರೆ ಕೊಬ್ರಿ ತುರಿ ಇಲ್ಲಾ ಹಸಿಕಾಯಿತುರಿ ಹಾಕಿ ಬೆರಸಿ. ಇದು ಚಪಾತಿ ಮತ್ತು ಬ್ರೆಡ್‌ ಜೊತೆ ತಿನ್ನಲು ಚೆನ್ನಾಗಿರುತ್ತದೆ. ಬೇಗ ಕೂಡಾ ಆಗುತ್ತದೆ. ಉಪ್ಪು , ಖಾರ ಹೆಚ್ಚಾಗಿ ಹಾಕಿದರೆ ಅನ್ನಕ್ಕೂ ಕಲಸಿಕೊಂಡು ತಿನ್ನಬಹುದು.