ಮೈಸೂರಿನ ಪ್ರಮೀಳೆಯರ ಪಾಕ ಪ್ರದರ್ಶನ

Culture

oi-Staff

By Super

Updated: Thursday, March 14, 2013, 16:27 [IST]

ಜೀ ಕನ್ನಡದ ಜನಪ್ರಿಯ ಕಾರ್ಯಕ್ರಮಗಳಲ್ಲೊಂದಾದ ರುಚಿ ಅಭಿರುಚಿ ಸಿಂಗರ್ ಸ್ಪೆಷಲ್ ಸರಣಿಯ ಯಶಸ್ಸಿನ ನಂತರ ಇದೀಗ ಜಿಲ್ಲಾ ವಿಶೇಷ ಕಾರ್ಯಕ್ರಮ ಆರಂಭಿಸಿದ್ದು ಪ್ರಾರಂಭದಲ್ಲಿ ಸಾಂಸ್ಕೃತಿಕ ನಗರಿ ಮೈಸೂರು ಜಿಲ್ಲೆಯನ್ನು ಆಯ್ದುಕೊಂಡಿದೆ. ಈಗಾಗಲೇ ಮೈಸೂರು ಜಿಲ್ಲೆಯಲ್ಲಿ ಆಡಿಷನ್ ನಡೆಸಿ, ಉತ್ತಮವಾಗಿ ವಿಶೇಷ ಆಹಾರ ಪದಾರ್ಥಗಳನ್ನು ತಯಾರಿಸುವವರನ್ನು ಆಯ್ಕೆ ಮಾಡಿದ್ದು ಮೈಸೂರು ಜಿಲ್ಲಾ ವಿಶೇಷ ಆಹಾರ ಪದಾರ್ಥಗಳ ತಯಾರಿಕೆಗೆ ಸಂಬಂಧಿಸಿದ ಕಾರ್ಯಕ್ರಮ ನಿರ್ಮಿಸಿದೆ. ಈ ವಿಶೇಷ ಸರಣಿ ನವೆಂಬರ್ 28ರ ಭಾನುವಾರದಿಂದ ಪ್ರತಿ ದಿನ ಮಧ್ಯಾಹ್ನ 1 ಗಂಟೆಗೆ ಜೀ ಕನ್ನಡದಲ್ಲಿ ಪ್ರಸಾರವಾಗುತ್ತಿದೆ.

ಮೈಸೂರು ಜಿಲ್ಲೆಯ ವಿಶೇಷ ಖಾದ್ಯಗಳ ತಯಾರಿಕೆ ಕುರಿತಾದ ಕಾರ್ಯಕ್ರಮ ಒಂದು ವಾರಗಳ ಕಾಲ ಪ್ರಸಾರ ಕಾಣಲಿದ್ದು ಆರಂಭದ ದಿನವಾದ ಭಾನುವಾರ ಮೈಸೂರಿನ ಸುಪ್ರಸಿದ್ದ ತಾರಾ ಹೋಟೆಲ್‌ಗಳ ವಿವಿಧ ಬಾಣಸಿಗರು ತಾವು ತಯಾರಿಸುವ ವಿಶೇಷ ಆಹಾರ ಪದಾರ್ಥಗಳನ್ನು ತಯಾರಿಸುವ ಬಗೆ ಪರಿಚಯಿಸಿದ್ದಾರೆ. ಈ ಪೈಕಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿಗಳಿಸಿರುವ ಮೈಸೂರ್ ಪಾಕ್ , ಮೈಸೂರಿನಲ್ಲಿ ಹೇಗೆ ತಯಾರಾಗುತ್ತದೆ ಹಾಗೂ ಅದರ ವಿಶೇಷಗಳೇನು ಎಂಬುದರ ಮಾಹಿತಿಯೂ ನೀಡಲಾಗುತ್ತದೆ.

ಮೈಸೂರು ಜಿಲ್ಲೆಯಿಂದ ಐವರನ್ನು ಕಾರ್ಯಕ್ರಮಕ್ಕೆ ಆಯ್ಕೆ ಮಾಡಲಾಗಿದ್ದು ಮೈಸೂರು ಸೀಮೆಯ ಗ್ರಾಮೀಣ ಪ್ರದೇಶಗಳಲ್ಲಿ ಹಾಗೂ ಮೈಸೂರು ನಗರದಲ್ಲಿ ಜನಪ್ರಿಯವಾಗಿರುವ ವಿಶೇಷ ಆಹಾರ ಪದಾರ್ಥಗಳ ತಯಾರಿಕೆಯ ಬಗೆಯನ್ನು ಅವರು ಪರಿಚಯಿಸಲಿದ್ದಾರೆ. ಈ ಐದು ಜನರ ನಡುವೆ ಆರೋಗ್ಯಕರವಾದ ಸ್ಪರ್ಧೆಯೂ ಸಹ ಇದ್ದು ಡಿಸೆಂಬರ್ 4ರ ಶುಕ್ರವಾರದವರೆಗೂ ವಿವಿಧ ಹಂತದ ಸ್ಪರ್ಧೆಗಳು ನಡೆಯಲಿವೆ. ಡಿಸೆಂಬರ್ 5ರಂದು ಅಂತಿಮ ಹಂತದ ಸ್ಪರ್ಧೆ ಇದ್ದು ಅತ್ಯುತ್ತಮ ಆಹಾರ ಪದಾರ್ಥ ತಯಾರಿಸಿದವರನ್ನು ಮೈಸೂರ್ ಡಿಸ್ಟ್ರಿಕ್ಟ್ ಕುಕ್ರಿ ಕ್ವೀನ್ ಎಂಬ ಬಿರುದಿತ್ತು ಬಹುಮಾನ ನೀಡಲಾಗುವುದು.

ಈ ಸರಣಿ ರಾಜ್ಯದ ಎಲ್ಲಾ ಜಿಲ್ಲೆಗಳ ಆಹಾರ ಪದಾರ್ಥಗಳ ವಿಶೇಷ ಹಾಗೂ ವೈಶಿಷ್ಟ್ಯಗಳನ್ನು ಪರಿಚಯಿಸಲಿದ್ದು ಪ್ರತಿ ದಿನ ಮಧ್ಯಾಹ್ನ 1 ಗಂಟೆಗೆ ಪ್ರಸಾರವಾಗಲಿದೆ.

ಈ ಕಾರ್ಯಕ್ರಮ ಕುರಿತು ಹೆಚ್ಚಿನ ಮಾಹಿತಿ ಬೇಕಿದ್ದರೆ ಸಂಪರ್ಕಿಸಿ :
ಮಧುಸೂಧನ್.ವಿ
99002 89844