ಏನ್ ಇವತ್ ಬದ್ನೇಕಾಯಿ ಚಟ್ನಿನಾ!

Chutney

oi-Staff

Published: Friday, October 2, 2009, 12:52 [IST]

ಬೇರೆಯವರ ವಿಚಾರಧಾರೆಗಳನ್ನು ಅಲ್ಲಗೆಳೆಯುವಾಗ, ನಿಂದಿಸುವಾಗ, ನಂಬಿಕೆ ಇಲ್ಲದಾಗ ಅಥವಾ ಒಂದು ಐಡಿಯಾ ಕ್ಲಿಕ್ ಆಗುವುದಿಲ್ಲ ಎನಿಸಿದಾಗ ಅಥವಾ ಬರೀ ಬುರುಡೆ ಹೊಡೀತಾನೆ ಎನಿಸಿದಾಗ "ಬದ್ನೇಕಾಯಿ" ಪದವನ್ನು ಬಳಸುವುದು ವಾಡಿಕೆ. ಉದಾಹರಣೆಗೆ : ಅವನೇನ್ ಬದ್ನೇಕಾಯಿ ಮಾಡ್ತಾನೇ ಬಾರೋ.. ಆದರೆ, ಸರ್ವಾಂತರ್ಯಾಮಿ, ತರಹೇವಾರಿ ಗುಣ, ಆಕಾರದ ತರಕಾರಿ ಬದನೆಕಾಯಿಗೆ ನಮ್ಮ ಅಡುಗೆ ಮನೆಗಳಲ್ಲಿ ಮುಕ್ತ ಪ್ರವೇಶವಿದೆ. ಬದನೆಕಾಯಿಯ ಅಸಲು ರುಚಿ ಗೊತ್ತಾಗುವುದು ಅದರ ಚಟ್ನಿ ರುಚಿಯಿಂದಲೇ, ಗೊತ್ತಾ?

ಇವಿಷ್ಟು ಸಿದ್ಧವಿರಲಿ :

ದೊಡ್ಡ ಗಾತ್ರದ ಬದನೇಕಾಯಿ -2
ಸಾಸಿವೆ -2 ಟೀ ಚಮಚ
ಇಂಗು - ಸ್ವಲ್ಪ
ಉದ್ದಿನಬೇಳೆ - 4 ಟೇಬಲ್ ಚಮಚ
ಹಸಿಮೆಣಸಿನಕಾಯಿ - 7 ರಿಂದ 8
ನಿಂಬೆಹಣ್ಣಿನ ಗಾತ್ರದ ಕ್ಲೀನಾದ ಹುಣಿಸೇಹಣ್ಣು
ಕೊತ್ತಂಬರಿ ಸೊಪ್ಪು - ಸ್ವಲ್ಪ
ಉಪ್ಪು - ರುಚಿಗೆ ತಕ್ಕಷ್ಟು

ಹೆಂಗ್ ಮಾಡೋದು:

ಬದನೆಕಾಯಿಯನ್ನು ಬೆಂಕಿಯ ಮೇಲಿಟ್ಟು ಸ್ವಲ್ಪ ಕಪ್ಪಗಾಗುವವರೆಗೆ (ಕಾಯಿ ಮೆತ್ತಗಾಗುವವರೆಗೆ )ಸುಟ್ಟು ಸಿಪ್ಪೆ ತೆಗೆದು ಚೆನ್ನಾಗಿ ಕಿವುಚಿಡಿ. ಬೆಂಕಿ ಎಂದರೆ, ಇಕ್ಕಳದಲ್ಲಿ ಬದನೆಕಾಯಿ ಇಟ್ಟು ಗ್ಯಾಸ್ ಉರಿಯಲ್ಲಿ ಸುಡುವುದು. ಸಾಸಿವೆ ಮತ್ತು ಇಂಗಿನ ಪುಡಿಯನ್ನು ಲೈಟಾಗಿ ಹುರಿಯಿರಿ. ಉದ್ದಿನಬೇಳೆಯನ್ನು ಪ್ರತ್ಯೇಕವಾಗಿ ಹುರಿದಿಟ್ಟುಕೊಳ್ಳಿ. ಮಿಕ್ಸಿಗೆ ಉಪ್ಪು, ಹುಣಿಸೇಹಣ್ಣು, ಹಸಿಮೆಣಸಿನಕಾಯಿ, ಸಾಸಿವೆ, ಇಂಗು ಮತ್ತು ಕೊತ್ತಂಬರಿ ಸೊಪ್ಪನ್ನು ಹಾಕಿ ಮೋಟಾರ್ ಆನ್ ಮಾಡಿ.

ಸ್ವಲ್ಪ ಹೊತ್ತು ಮಿಕ್ಸಿ ತಿರುಗಿದ ನೆತರ ಅದಕ್ಕೆ ಬದನೆಕಾಯಿಯನ್ನು ಹಾಕಿ ಎರಡು ನಿಮಿಷ ರುಬ್ಬಿರಿ. ಕೊನೆಗೆ, ಉದ್ದಿನಬೇಳೆಯನ್ನು ಹಾಕಿ ಇನ್ನು ಒಂದು ನಿಮಿಷ ಕಾಲ ಕಟಾಯಿಸಿ. ಚಪಾತಿ, ರೊಟ್ಟಿ, ಪುಲ್ಕ, ಅಕ್ಕಿ, ರಾಗಿ,ಜೋಳದ ರೊಟ್ಟಿಗೆ ಬದನೆಕಾಯಿಯ ಚಟ್ನಿ ರುಚಿಗೆ ಕೂಡಿಬರುತ್ತದೆ. ಡಾಭಾದಿಂದ ರೋಟಿ ತಂದು ಮನೆಯಲ್ಲಿ ಚಟ್ನಿ ಮಾಡುವುದು ನನಗೆ ಅಭ್ಯಾಸವಾಗಿದೆ.