ತುಪ್ಪ ಹಾಕಿಯೇ ಮಾಡಿ ವಿಶ್ವ ಶ್ರೇಷ್ಠ ಮಸಾಲೆ ದೋಸೆ

Updated: Monday, July 9, 2012, 14:04 [IST]

ಇಷ್ಟು ದಿವಸ ದಕ್ಷಿಣ ಭಾರತದ ಪ್ರಸಿದ್ಧ ತಿಂಡಿಗಳಲ್ಲಿ ಒಂದಾಗಿದ್ದ ಮಸಾಲೆ ದೋಸೆ ಈಗ ವಿಶ್ವ ಪ್ರಸಿದ್ಧ ಟಾಪ್ 10 ತಿಂಡಿಗಳ ಪಟ್ಟಿಯಲ್ಲಿ ಒಂದಾಗಿದೆ. ಇಷ್ಟರವರೆಗೆ ಮನುಷ್ಯನಾಗಿ ಹುಟ್ಟಿದ ಮೇಲೆ ಸಾಯೋಕ್ಮುಂಚೆ ಜೋಗದ ಗುಂಡಿ ನೋಡಬೇಕು ಎಂದು ಕರ್ನಾಟಕದ ಜೋಗದ ಗುಂಡಿ ಚೆಲುವನ್ನು ಕುರಿತು ಹೇಳಲಾಗಿತ್ತು, ಈಗ ಜೋಗದ ಜೊತೆ ಇಲ್ಲಿಯದೇ ತಿಂಡಿಯಾದ ಮಸಾಲೆ ದೋಸೆಯನ್ನು ಸಾಯೋಕ್ಮುಂಚೆ ರುಚಿ ಎಂದು ಪ್ರವಾಸೋದ್ಯಮಕ್ಕೆ ಸಂಬಂಧಿಸಿದಂತೆ Viator ಎಂಬ ಬ್ಲಾಗ್ ಇಡೀ ವಿಶ್ವಕ್ಕೆ ಸಾರಿದೆ.

ಮಸಾಲೆ ದೋಸೆಯನ್ನು ಅಂಗಡಿಗಳಲ್ಲಿ ತಯಾರಿಸುವಾಗ ಯಾವುದಾದರೂ ಒಂದು ಅಡುಗೆ ಎಣ್ಣೆ ಅಥವಾ ಹಳೆಯ ಬೆಣ್ಣೆ ಹಾಕಿ ಮಸಾಲೆ ದೋಸೆಯೆಂದು ಕೊಡುತ್ತಾರೆ. ಇಂತಹ ರುಚಿ ನೋಡಿ ಮೋಸ ಹೋಗದಿರಿ. ಮಸಾಲೆ ದೋಸೆಯ ನಿಜವಾದ ಸವಿ ನೋಡಬೇಕೆಂದರೆ ಅದಕ್ಕೆ ಶುದ್ಧವಾದ ತುಪ್ಪ ಹಾಕಬೇಕು. ಅಂತಹ ಮಸಾಲೆ ದೋಸೆ ರುಚಿ ನೋಡಬೇಕೆಂದರೆ ಮನೆಯಲ್ಲಿಯೇ ತಯಾರಿಸುವುದು ಒಳ್ಳೆಯದು. ಬನ್ನಿ, ವಿಶ್ವ ಪ್ರಸಿದ್ಧವಾದ ಮಸಾಲೆ ದೋಸೆಯನ್ನು ರುಚಿಕರವಾಗಿ ಮಾಡುವ ವಿಧಾನ ತಿಳಿಯೋಣ:

ಬೇಕಾಗುವ ಸಾಮಾಗ್ರಿಗಳು:
* 4 ಕಪ್ ಅಕ್ಕಿ
* 1 ಕಪ್ ಉದ್ದಿನಬೇಳೆ
* ಹಿಡಿಯಷ್ಟು ಮೆಂತೆಕಾಳು
* ಎರಡು ಚಮಚದಷ್ಟು ಕಡಲೆಬೇಳೆ
* ಮುಷ್ಟಿಯಷ್ಟು ಗಟ್ಟಿ ಅವಲಕ್ಕಿ (ದೋಸೆ ಮೆತ್ತಗಾಗಲು)
* ಚಿಟಿಕೆಯಷ್ಟು ಸೋಡಾ
* ರುಚಿಗೆ ಸ್ವಲ್ಪ ಉಪ್ಪು
* ಶುದ್ಧವಾದ ತುಪ್ಪ

ತಯಾರಿಸುವ ವಿಧಾನ:

1. ಅಕ್ಕಿ, ಮೆಂತೆ ಕಾಳು ಉದ್ದಿನ ಬೇಳೆ, ಕಡಲೆ ಬೇಳೆ, ಅವಲಕ್ಕಿ ಇವುಗಳನ್ನು 6 ತಾಸು ನೀರಿನಲ್ಲಿ ನೆನೆಸಿಡಬೇಕು. ಅವಲಕ್ಕಿಯನ್ನು ಬೇರೆ ಬಟ್ಟಲಿನಲ್ಲಿ ನೆನೆಸಿಡಿ.

2. ನಂತರ ಎಲ್ಲಾ ಸಾಮಾಗ್ರಿಗಳನ್ನು ಚೆನ್ನಾಗಿ ತೊಳೆದು ಅದಕ್ಕೆ ನೆನೆಸಿದ ಅವಲಕ್ಕಿ ಹಾಕಿ ರಾತ್ರಿ ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ, ಚಿಟಿಕೆಯಷ್ಟು ಸೋಡಾ ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಿ ಚೆನ್ನಾಗಿ ಮಿಶ್ರ ಮಾಡಿ ಒಂದು ಪಾತ್ರೆಯಲ್ಲಿ ಹಾಕಬೇಕು, ಹಿಟ್ಟು ಹಾಕುವ ಪಾತ್ರೆ ಸ್ವಲ್ಪ ದೊಡ್ಡದಿರಲಿ, ಇಲ್ಲದಿದ್ದರೆ ಅದು ಉಬ್ಬಿ , ಹಿಟ್ಟು ಪಾತ್ರೆಯಿಂದ ಹೊರಚೆಲ್ಲುವುದು.

3. ಮರುದಿನ ಬೆಳಗ್ಗೆ ದೋಸೆ ಉಯ್ಯುವ ಮುನ್ನ ಸೌಟ್ ನಿಂದ ತಿರುಗಿಸಿ , ಹಿಟ್ಟು ತುಂಬಾ ಗಟ್ಟಿಯಾಗಿದ್ದರೆ ಸ್ವಲ್ಪ ನೀರು ಸೇರಿಸಬಹುದು.

4. ನಂತರ ದೋಸೆ ಕಾವಲಿಯನ್ನು ಬಿಸಿ ಮಾಡಿ ಅದರ ಮೇಲೆ ತುಪ್ಪ ಸವರಿ ದೋಸೆ ಹಿಟ್ಟು ಹುಯ್ದು ಒಂದು ಬದಿ ಕೆಂಪಗಾದ ಮೇಲೆ ಅದರೊಳಗೆ ಆಲೂಗಡ್ಡೆ ಪಲ್ಯವನ್ನು ಜೋಪಾನವಾಗಿ ಸುರುಳಿ ಸುತ್ತಿ ಇಟ್ಟರೆ ಮಸಾಲೆ ದೋಸೆ ತಯಾರು. ಪಕ್ಕದಲ್ಲಿ ಕೊಬ್ಬರಿ ಚಟ್ನಿ, ಒಂದು ಬಟ್ಟಲಲ್ಲಿ ಬಿಸಿಬಿಸಿ ಸಾಂಬಾರು, ಜೊತೆಗಿಷ್ಟು ಬೆಣ್ಣೆ ಇದ್ದುಬಿಟ್ಟರೆ ಇದರ ರುಚಿ ಅಮೋಘವಾಗಿರುತ್ತದೆ.