ಸೇವಿಗೆ ಉಪ್ಪಿಟ್ಟು ರುಚಿಕರವಾಗಿಸುವ ಕಲೆ

Updated: Thursday, August 2, 2012, 12:41 [IST]

ಸೇವಿಗೆ ಉಪ್ಪಿಟ್ಟು ಮಾಡಿದಾಗ ಒಂದಕ್ಕೊಂದು ಅಂಟಿಕೊಂಡು ಇರುವಂತಹ ಉಪ್ಪಿಟ್ಟು ತಿಂದರೆ ಇನ್ನೊಮ್ಮೆ ಸೇವಿಗೆ ಉಪ್ಪಿಟ್ಟು ತಿನ್ನುವ ಸಾಹಸಕ್ಕೆ ಕೈ ಹಾಕುವುದಿಲ್ಲ. ಆದ್ದರಿಂದ ಸೇವಿಗೆ ಉಪ್ಪಿಟ್ಟು ಒಂದಕ್ಕೊಂದು ಅಂಟದಿರಲು ಅದನ್ನು ತಯಾರಿಸುವ ಕಲೆ ಗೊತ್ತಿರಬೇಕು. ಸೇವಿಗೆ ಉಪ್ಪಿಟ್ಟನ್ನು ರುಚಿಕರವಾಗಿ ತಯಾರಿಸುವ ಕಲೆಯನ್ನು ಇಲ್ಲಿ ವಿವರಿಸಲಾಗಿದೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು:

* 2 ಕಪ್ ಸೇವಿಗೆ
* ಒಂದು ಚಮಚ ಕಡಲೆ ಬೇಳೆ
* ಒಂದು ಚಮಚ ಉದ್ದಿನ ಬೇಳೆ
* ಕಾಲು ಚಮಚ ಸಾಸಿವೆ
* 2 ಚಮಚ ಗೋಡಂಬಿ
* 2 ಚಮಚ ಹುರಿಗಡಲೆ
* ಒಂದು ಈರುಳ್ಳಿ (ಕತ್ತರಿಸಿದ್ದು)
* 2 ಹಸಿ ಮೆಣಸಿನ ಕಾಯಿ
* 1 ಆಲೂಗೆಡ್ಡೆ
* ಬಟಾಣಿ 1/4 ಕಪ್
* 1 ಕ್ಯಾರೆಟ್
* 1 ಟೊಮೆಟೊ
* 4 1/2 ಕಪ್ ನೀರು
* 3 ಚಮಚ ಎಣ್ಣೆ
* 2 ಚಮಚ ತುಪ್ಪ
* ಸ್ವಲ್ಪ ಕರಿಬೇವಿನ ಎಲೆ
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಈರುಳ್ಳಿ, ಟೊಮೆಟೊ, ಆಲೂಗೆಡ್ಡೆ, ಕ್ಯಾರೆಟ್ ಇವುಗಳನ್ನು ಚಿಕ್ಕ ತುಂಡುಗಳಾಗಿ ಕತ್ತರಿಸಬೇಕು. ಹಸಿ ಮೆಣಸಿನ ಕಾಯಿಯನ್ನು ಉದ್ದುದ್ದವಾಗಿ ಕತ್ತರಿಸಬೇಕು.

2. ಬಾಣಲೆಯಲ್ಲಿ ಸೇವಿಗೆಯನ್ನು ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು.

3. ನಂತರ ಎಣ್ಣೆ ಬಿಸಿ ಮಾಡಿ ಸಾಸಿವೆ ಹಾಕಿ ಸಾಸಿವೆ ಚಟಾಪಟಾ ಶಬ್ದ ಬರುವಾಗ ಹುರಿಗಡಲೆ, ಉದ್ದಿನ ಬೇಳೆ ಮತ್ತು ಕರಿಬೇವಿನ ಎಲೆ ಸೇರಿಸಬೇಕು. ನಂತರ ಬಟಾಣಿ ಮತ್ತು ಗೋಡಂಬಿ ಹಾಕಿ ಚೆನ್ನಾಗಿ ಹುರಿಯಬೇಕು.

4. ನಂತರ ಕತ್ತರಿಸಿದ ಆಲೂಗೆಡ್ಡೆ ಮತ್ತು ಕ್ಯಾರೆಟ್, ಟೊಮೆಟೊ ಸೇರಿಸಿ ಟೊಮೆಟೊ ಮೆತ್ತಗಾಗುವವರೆಗೆ ಹುರಿದು ನಂತರ 4 1/2 ಕಪ್ ನೀರು ಸೇರಿಸಿ ರುಚಿಗೆ ತಕ್ಕ ಉಪ್ಪು ಹಾಕಿ ಬೇಯಿಸಬೇಕು.

5. ನೀರು ಕುದಿಯುತ್ತಿರುವಾಗ ಹುರಿದ ಸೇವಿಗೆ ಹಾಕಿ 5-6 ನಿಮಿಷ ಬೇಯಿಸಬೇಕು. ನಂತರ 2 ಚಮಚ ತುಪ್ಪ ಹಾಕಿ ಚೆನ್ನಾಗಿ ತಿರುಗಿಸಬೇಕು. ನಂತರ ಸೇವಿಗೆ ಬೆಂದಾಗ ಉರಿಯಿಂದ ಇಳಿಸಬೇಕು.

ಇದನ್ನು ಬಿಸಿಬಿಸಿಯಾಗಿ ತೆಂಗಿನ ಕಾಯಿ ಚಟ್ನಿ ಜೊತೆ ತಿನ್ನಲು ತುಂಬಾ ರುಚಿಯಾಗಿರುತ್ತದೆ.