ತೆಳ್ಳಗೆ-ಬೆಳ್ಳಗಿನ ನೀರು ದೋಸೆ

ನೀರು ದೋಸೆ ಬರೀ ಅಕ್ಕಿಯಿಂದ ಮಾಡುವ ದೋಸೆಯಾಗಿದೆ. ಇದು ನೋಡಲು ತೆಳ್ಳಗೆ ಪೇಪರ್ ನಂತೆ ಇದ್ದು, ತಿನ್ನಲು ತುಂಬಾ ರುಚಿಯಾಗಿರುತ್ತದೆ. ಈ ದೋಸೆ ಮಾಡಲು ಉದ್ದಿನ ಬೇಳೆ, ಮೆಂತೆ ಯಾವುದೂ ಬಳಸುವುದಿಲ್ಲ, ಕೆಲವರು ಅಕ್ಕಿಯ ಜೊತೆಯ ತೆಂಗಿನ ಕಾಯಿ ಹಾಕಿ ರುಬ್ಬಿ ಈ ದೋಸೆ ತಯಾರಿಸುತ್ತಾರೆ. ಬರೀ ಅಕ್ಕಿ ರುಬ್ಬಿ ಮಾಡುವ ದೋಸೆಗಿಂತ ಸ್ವಲ್ಪ ತೆಂಗಿನ ಕಾಯಿ ಹಾಕಿ ಮಾಡುವ ದೋಸೆ ಹೆಚ್ಚು ರುಚಿಕರವಾಗಿರುತ್ತದೆ.

ದೋಸೆ ಹಿಟ್ಟನ್ನು ತುಂಬಾ ತೆಳ್ಳಗೆ ಮಾಡಿ ಈ ದೋಸೆಯನ್ನು ತಯಾರಿಸಲಾಗುವುದು. ಈ ದೋಸೆಯನ್ನು ತೆಂಗಿನ ಹಾಲು, ಜೇನು, ಚಟ್ನಿ, ಸಾರು, ನಾನ್ ವೆಜ್ ಸಾರುಗಳ ಜೊತೆ ತಿನ್ನಬಹುದು. ಈ ನೀರು ದೋಸೆ ಮಾಡುವ ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು
ಅಕ್ಕಿ 2 ಕಪ್( ನಾಲ್ಕು ಜನರಿಗೆ ಸಾಕಾಗುತ್ತದೆ)
ತೆಂಗಿನಕಾಯಿ(ಬೇಕಿದ್ದರೆ)
ರುಚಿಗೆ ತಕ್ಕ ಉಪ್ಪು

ಮಾಡುವ ಬಗೆ
* ರಾತ್ರಿ ಅಕ್ಕಿಯನ್ನು ನೆನೆ ಹಾಕಿಡಿ. ನಂತರ ಬೆಳಗ್ಗೆ ಅಕ್ಕಿಯನ್ನು ನುಣ್ಣಗೆ ರುಬ್ಬಿ (ತೆಂಗಿನಕಾಯಿ ಹಾಕುವುದಾದರೆ ಅಕ್ಕಿ ಜೊತೆ ಹಾಕಿ ರುಬ್ಬಿ).
* ನಂತರ ಅದನ್ನು ಪಾತ್ರೆಗೆ ಹಾಕಿ ಹಿಟ್ಟಿಗೆ ನೀರು ಹಾಗೂ ಉಪ್ಪು ಹಾಕಿ ಕಲೆಸಿ. ಈ ಹಿಟ್ಟು ನೀರು-ನೀರಾಗಿರಲಿ.
* ನಂತರ ದೋಸೆ ಕಾವಲಿಯಿಟ್ಟು, ಸ್ವಲ್ಪ ಎಣ್ಣೆ ಹಚ್ಚಿ ಒಂದು ಸೌಟು ದೋಸೆ ಹಿಟ್ಟನ್ನು ಹುಯ್ಯಿರಿ. ನಂತರ ತವಾವನ್ನು ಮತ್ತೊಂದು ಪಾತ್ರೆಯಿಂದ ಮುಚ್ಚಿ. ನಂತರ ದೋಸೆಯನ್ನು ಮಡಚಿ ತಟ್ಟೆಗೆ ಹಾಕಿ. ನೀರು ದೋಸೆ ಎರಡೇ ನಿಮಿಷದಲ್ಲಿ ರೆಡಿ.

ಇತರ ಟಿಪ್ಸ್
* ದೋಸೆ ತುಂಬಾ ಮೃದುವಾಗಿರಲು ನೀರು ಹಾಕುವಾಗ ಬಿಸಿ ನೀರನ್ನು ಹಾಕಿ.
* ಹಿಟ್ಟು ಅರೆಯುವಾಗ ನೀರಿನ ಬದಲು ತೆಂಗಿನಕಾಯಿಯ ನೀರನ್ನು ಹಾಕಿದರೆ ದೋಸೆ ಹೆಚ್ಚು ರುಚಿಕರವಾಗಿರುತ್ತದೆ.
* ಬೆಲ್ಲದ ನೀರು ಅಥವಾ ಕಬ್ಬಿನ ಹಾಲು ಬೆರೆಸಿದರೆ ಸಿಹಿ ನೀರು ದೋಸೆಯಾಗುತ್ತದೆ. ಸಿಹಿ ದೋಸೆ ಮಾಡುವುದಾದರೆ ಬಿಸಿ ನೀರು ಹಾಕಬೇಡಿ.