ಭಾರತೀಯ ಶೈಲಿಯಲ್ಲಿ ಫ್ರೆಂಚ್ ಟೋಸ್ಟ್

ನಾವು ಭಾರತೀಯರು ವಿದೇಶಿ ಮೂಲದ ಕೆಲವೊಂದು ಅಡುಗೆಗಳನ್ನು ನಮ್ಮ ಶೈಲಿಯಲ್ಲಿ ತಯಾರಿಸಲು ಪ್ರಯತ್ನಿಸುತ್ತೇವೆ. ಅದು ನೂಡಲ್ಸ್ ಆಗಿರಬಹುದು, ಫ್ರೆಂಚ್ ಟೋಸ್ಟ್ , ಮ್ಯಾಗಿ ಈ ರೀತಿಯ ಯಾವುದೇ ಆಹಾರಗಳಾಗಿರಬಹುದು, ಇಂತಹ ಆಹಾರಗಳನ್ನು ನಮ್ಮ ಶೈಲಿಯಲ್ಲಿ ಮಾಡಿ ತಿನ್ನಲು ಇಷ್ಟಪಡುತ್ತೇವೆ.

ಅದರಲ್ಲೂ ಫ್ರೆಂಚ್ ಟೋಸ್ಟ್ ಅನ್ನು ಭಾರತೀಯ ಶೈಲಿಯಲ್ಲಿ ತಯಾರಿಸಿದರೆ ತುಂಬಾ ರುಚಿಕರವಾಗಿದ್ದು ಇದನ್ನು ಮಾಡುವ ವಿಧಾನ ಇಲ್ಲಿ ನೀಡಲಾಗಿದೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು:
ಮೊಟ್ಟೆ 4
ಹಾಲು 2 ಚಮಚ
ಚಿಕ್ಕ ಈರುಳ್ಳಿ 2
ಟೊಮೆಟೊ 1 (ಕತ್ತರಿಸಿದ್ದು)
ದುಂಡು ಮೆಣಸು 1
ಕೊತ್ತಂಬರಿ ಪುಡಿ 1 ಚಮಚ
ಚಾಟ್ ಮಸಾಲ ಅರ್ಧ ಚಮಚ
ರವೆ 1/4 ಕಪ್
ಬ್ರೆಡ್ ತುಂಡು 6
ರುಚಿಗೆ ತಕ್ಕ ಉಪ್ಪು
ಬೆಣ್ಣೆ 1 ಚಮಚ

ತಯಾರಿಸುವ ವಿಧಾನ:

1. ಮೊಟ್ಟೆಯನ್ನುಒಡೆದು ಒಂದು ಬಟ್ಟಲಿನಲ್ಲಿ ಹಾಕಿ ಅದಕ್ಕೆ ಹಾಲು ಹಾಕಿ ಚೆನ್ನಾಗಿ ಕದಡಬೇಕು.

2. ನಂತರ ಆ ಮಿಶ್ರಣಕ್ಕೆ ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಚಾಟ್ ಮಸಾಲ ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಬೇಕು. ನಂತರ 2-3 ನಿಮಿಷ ಕದಡಬೇಕು.

3. ನಂತರ ಇದಕ್ಕೆ ಕತ್ತರಿಸಿದ ದುಂಡು ಮೆಣಸಿನ ಕಾಯಿ, ಈರುಳ್ಳಿ, ಟೊಮೆಟೊ ಹಾಕಬೇಕು.

4. ಈಗ ಬ್ರೆಡ್ ತುಂಡುಗಳನ್ನು ಈ ಮಿಶ್ರಣದಲ್ಲಿ ಅದ್ದಿ, ನಂತರ ರವೆಯಲ್ಲಿ ಹೊರಳಾಡಿಸಬೇಕು. ನಂತರ ತವಾದಲ್ಲಿ ಹಾಕಿ ಬ್ರೆಡ್ ನ ಎರಡೂ ಬದಿಯನ್ನು ಫ್ರೈ ಮಾಡಿದರೆ ರುಚಿಯಾದ ಫ್ರೆಂಚ್ ಟೋಸ್ಟ್ ರೆಡಿ.