ಕ್ಯಾಬೇಜ್ ರವೆ ಉಪ್ಪಿಟ್ಟು

ಕ್ಯಾಬೇಜ್ ಹಾಕಿ ಮಾಡುವ ಈ ರವೆ ಉಪ್ಪಿಟ್ಟು ರುಚಿಕರ ಮಾತ್ರವಲ್ಲ, ಆರೋಗ್ಯಕರ ಕೂಡ ಹೌದು. ಅಲ್ಲದೆ ಕ್ಯಾಬೇಜ್ ನಲ್ಲಿ ಗರ್ಭಿಣಿಯರಿಗೆ ಅವಶ್ಯಕವಾದ ಪೋಷಕಾಂಶ ಮತ್ತು ವಿಟಮಿನ್ಸ್ ಇರುವುದರಿಂದ ಗರ್ಭಿಣಿಯರು ತಮ್ಮ ಡಯಟ್ ನಲ್ಲಿ ಸೇರಿಸಬೇಕಾದ ಆಹಾರ ಇದಾಗಿದೆ.

ಇದನ್ನು ಎಣ್ಣೆ ಬದಲು ತುಪ್ಪ ಹಾಕಿ ಮಾಡಿದರೆ ಮತ್ತಷ್ಟು ರುಚಿಕರ. ಬನ್ನಿ ಕ್ಯಾಬೇಜ್ ಉಪ್ಪಿಟ್ಟು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಾಗ್ರಿಗಳು
ರವೆ 1 ಕಪ್
ಸಾಸಿವೆ ಅರ್ಧ ಚಮಚ
ಜೀರಿಗೆ ಅರ್ಧ ಚಮಚ
ಉದ್ದಿನ ಬೇಳೆ ಅರ್ಧ ಚಮಚ
ಕಡಲೆ ಬೇಳೆ ಅರ್ಧ ಚಮಚ
ಒಣ ಮೆಣಸು 3
ಸ್ವಲ್ಪ ಕರಿಬೇವಿನ ಎಲೆ
ಕ್ಯಾಬೇಜ್(1/4 ಕಪ್)
ಟೊಮೆಟೊ 1
ಕ್ಯಾರೆಟ್ 1
ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಗೋಡಂಬಿ 5-6 (ಚಿಕ್ಕ ಪೀಸ್ ಮಾಡಿದ್ದು)
ಎಣ್ಣೆ ಅಥವಾ ತುಪ್ಪ 2 ಚಮಚ
ರುಚಿಗೆ ತಕ್ಕ ಉಪ್ಪು
ಸಲಹೆ: ತುಪ್ಪದಲ್ಲಿ ಮಾಡಿದರೆ ಹೆಚ್ಚು ರುಚಿಕರ.

ತಯಾರಿಸುವ ವಿಧಾನ:

* ಮೊದಲು ಬಾಣಲೆಗೆ ಹಾಕಿ ರವೆಯನ್ನು ಫ್ರೈ ಮಾಡಿ ಇಡಿ.

* ನಂತರ ಬಾಣಲೆಗೆ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಿ, ಸಾಸಿವೆ ಚಟಾಪಟಾ ಶಬ್ದ ಮಾಡುವಾಗ ಉದ್ದಿನಬೇಳೆ, ಕಡಲೆಬೇಳೆ, ಜೀರಿಗೆ, ಕರಿ ಬೇವಿನ ಎಲೆ, ಒಣ ಮೆಣಸು ಹಾಕಿ 1 ನಿಮಿಷ ಫ್ರೈ ಮಾಡಿ, ನಂತರ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಮತ್ತೊಂದು ನಿಮಿಷ ಫ್ರೈ ಮಾಡಿ.

* ನಂತರ ಕತ್ತರಿಸಿದ ಕ್ಯಾಬೇಜ್, ಟೊಮೆಟೊ, ಕ್ಯಾರೆಟ್ ಹಾಕಿ 5-7 ನಿಮಿಷ ಫ್ರೈ ಮಾಡಿ, ನಂತರ ಗೋಡಂಬಿ ಹಾಕಿ ಮತ್ತೆ 2 ನಿಮಿಷ ಫ್ರೈ ಮಾಡಿ, ನೀರು ಹಾಕಿ, ರುಚಿಗೆ ತಕ್ಕ ಉಪ್ಪು ಸೇರಿಸಿ ಕುದಿಸಿ, ನೀರು ಕುದಿ ಬರುವಾಗ ರವೆಯನ್ನು ನಿಧಾನವಾಗಿ ಹಾಕಿ, ರವೆ ಹಾಕುವಾಗ ಸೌಟ್ ನಿಂದ ತಿರುಗಿಸುತ್ತಾ ಇದ್ದರೆ ರವೆ ಗಂಟು-ಗಂಟಾಗುವುದನ್ನು ತಡೆಯಬಹುದು. ಒಮ್ಮೆ ಚೆನ್ನಾಗಿ ಮಿಕ್ಸ್ ಮಾಡಿ ಕಡಿಮೆ ಉರಿಯಲ್ಲಿ 5 ನಿಮಿಷ ಬೇಯಿಸಿದರೆ ಕ್ಯಾಬೇಜ್ ರವೆ ಉಪ್ಪಿಟ್ಟು ರೆಡಿ.