ಶ್ರಮವಿಲ್ಲದೆ ಮಾಡಿ ಸವಿಯಿರಿ ಸಿಹಿ ಅವಲಕ್ಕಿ

ಹಳೆ ಮೈಸೂರು ಕಡೆ ಒಂದು ಮಾತಿದೆ. ಅರ್ಜೆಂಟೂ ಅಂದ್ರೆ, ಉಪ್ಪಿಟ್ಟು ಕೆದಕು, ಇನ್ನೂ ಅರ್ಜೆಂಟಾದ್ರೆ ಅವಲಕ್ಕಿ ನೆನೆಸು.

ಅವಲಕ್ಕಿಯಲ್ಲಿ ಹಲವು ಬಗೆ ತಿಂಡಿ ಮಾಡ್ತಾರೆ. ಅವಲಕ್ಕಿ ಬಾತ್‌, ಖಾರದ ಅವಲಕ್ಕಿ, ಅವಲಕ್ಕಿಒಗ್ಗರಣೆ, ಸಿಹಿ ಅವಲಕ್ಕಿ, ಮೊಸರವಲಕ್ಕಿ, ಅವಲಕ್ಕಿ ಬಿಸಿಬೇಳೆ ಬಾತ್‌ ಇತ್ಯಾದಿ ಇತ್ಯಾದಿ.

ಈ ಪೈಕಿ ಮೊಸರವಲಕ್ಕಿ ಹಾಗೂ ಸಿಹಿ ಅವಲಕ್ಕಿ ಮಾಡೋದು ಸುಲಭ ಅಂದ್ರೆ ಸುಲಭ. ಏಕೆಂದರೆ ಇಲ್ಲಿ ಒಲೆ ಹಚ್ಚುವ ಗೋಜೆ ಇಲ್ಲ.

ಮೊಸರವಲಕ್ಕಿ : ನಿಮಗೆ ಅಗತ್ಯವಿರುವಷ್ಟು ಅವಲಕ್ಕಿಯನ್ನು ಚೆನ್ನಾಗಿ ನೀರಲ್ಲಿ ತೊಳೆದು, ಅರ್ಧಗಂಟೆ ನೆನೆಸಿಟ್ಟು, ನೀರನ್ನೆಲ್ಲಾ ಹಿಂಡಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಗೂ ಮೊಸರು ಹಾಕಿದರೆ ಮೊಸರವಲಕ್ಕಿ ರೆಡಿ. ಟೈಮಿದ್ದರೆ, ರುಚಿಗೆ ಸಾಸಿವೆ, ಒಣಮೆಣಸಿನಕಾಯಿ ಒಗ್ಗರಣೆಯನ್ನೂ ಹಾಕ್ಕೋಬಹುದು.

ಸಿಹಿ ಅವಲಕ್ಕಿ

ಬೇಗಾಗುವ ಪದಾರ್ಥ : ಕಾಲು ಕೆಜಿ ಗಟ್ಟಿ ಅವಲಕ್ಕಿ, ಅರ್ಧ ಅಚ್ಚು ಬೆಲ್ಲ, ಒಂದು ಹೋಳಿನಷ್ಟು ತೆಂಗಿನಕಾಯಿ, ನಾಲ್ಕಾರು ಏಲಕ್ಕಿ, ಒಂದೆರಡು ಚಮಚ ಸಕ್ಕರೆ.

ಮಾಡುವ ವಿಧಾನ : ಗಟ್ಟಿ ಅವಲಕ್ಕಿಯನ್ನು ಚೆನ್ನಾಗಿ ನೀರಿನಲ್ಲಿ ತೊಳೆದು, ಪಾತ್ರೆಯಲ್ಲಿ ಹಾಕಿ ಭರ್ತಿ ನೀರು ಹಾಕಿ ಅರ್ಧಗಂಟೆ ನೆನೆಸಿಡಿ. ಅವಲಕ್ಕಿ ಮೆತ್ತಗಾದ ಬಳಿಕ, ನೀರನ್ನು ಹಿಂಡಿ, ನೆಂದ ಅವಲಕ್ಕಿಯನ್ನು ಬೇರೆ ಪಾತ್ರೆಗೆ ಹಾಕಿಟ್ಟುಕೊಳ್ಳಿ.

ಇದಕ್ಕೆ (ಸಣ್ಣಗೆ ತುರಿದ) ಕಾಯಿತುರಿ, ಹೆರೆದ ಬೆಲ್ಲ, ನುಣ್ಣಗೆ ಕುಟ್ಟಿದ ಏಲಕ್ಕಿ ಪುಡಿ ಹಾಕಿ ಚೆನ್ನಾಗಿ ಕಲೆಸಿ. ಮೇಲೆ ಒಂದೆರಡು ಚಮಚ ಸಕ್ಕರೆ ಹಾಕಿದರೆ. ರುಚಿಯಾದ ದಿಢೀರ್‌ ತಿನಿಸು ಸಿಹಿಅವಲಕ್ಕಿ ರೆಡಿ.