ಸಖತ್ ಸ್ಪೈಸಿ ಈ ಆಲೂ ರೋಟಿ ರೋಲ್

Breakfast

oi-Sumalatha

By Sumalatha

Published: Tuesday, November 29, 2011, 11:38 [IST]

ಆಲೂಗಡ್ಡೆಯೊಂದಿಗೆ ಮಸಾಲಾ ಬೆರೆಸಿ ತಯಾರಿಸುವ ಈ ಆಲೂ ರೋಟಿ ರೋಲ್ ತಿನ್ನೋದಕ್ಕೆ ಸಖತ್ ಟೇಸ್ಟಿ. ಮಸಾಲೆ ಮಿಶ್ರಣವನ್ನು ರೋಟಿಯೊಂದಿಗೆ ಸೇರಿಸಿ ತಿಂದರೆ ಅದರ ಮಜವೇ ಬೇರೆ. ಮಕ್ಕಳಿಗೆ, ಮನೆಮಂದಿಗೆಲ್ಲಾ ಅಚ್ಚು ಮೆಚ್ಚಾಗುವ ಈ ಆಲೂ ರೋಟಿ ರೋಲ್ ಸುಲಭವಾಗಿ ಮಾಡುವುದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಆಲೂ ರೋಟಿ ರೋಲ್ ಗೆ ಏನೇನು ಬೇಕು?
ರೋಟಿಗೆ: 2 ಕಪ್ ಗೋಧಿ ಹಿಟ್ಟು ಅಥವಾ ಮೈದಾ ಹಿಟ್ಟು, ಎಣ್ಣೆ, ನೀರು

ಪಲ್ಯಕ್ಕೆ: * 2-3 ಬೇಯಿಸಿದ ಆಲೂಗಡ್ಡೆ
* ಈರುಳ್ಳಿ
* ಕ್ಯಾರೆಟ್, ಕ್ಯಾಪ್ಸಿಕಂ
* ಹಸಿರು ಮೆಣಸಿನಕಾಯಿ
* ಬಟಾಣಿ
* ಉಪ್ಪು, ಅರಿಶಿಣ, ಕೆಂಪು ಮೆಣಸಿನಕಾಯಿ ಪುಡಿ
* ಚಾಟ್ ಮಸಾಲಾ, ಜೀರಿಗೆ, ಕರಿಬೇವು

ಆಲೂ ರೋಟಿ ರೋಲ್ ತಯಾರಿಸುವ ವಿಧಾನ:
1. ಬಿಸಿ ನೀರು ಮತ್ತು ಸ್ವಲ್ಪ ಎಣ್ಣೆಯನ್ನು ಬಳಸಿ ಚಪಾತಿ ಹಿಟ್ಟಿನಂತೆ ಕಲೆಸಿಕೊಳ್ಳಬೇಕು.

2. ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಕಾಯಿಸಿ ಅದಕ್ಕೆ ಕರಿಬೇವು, ಜೀರಿಗೆ ಹಾಕಿ ಹುರಿಯಬೇಕು. ನಂತರ ಅದಕ್ಕೆ ಈರುಳ್ಳಿ ಹಾಕಿ ಚಿಕ್ಕದಾಗಿ ಕತ್ತರಿಸಿದ ತರಕಾರಿ ಮತ್ತು ಬಟಾಣಿಯನ್ನು ಬೆರೆಸಿ ತರಕಾರಿ ಸ್ವಲ್ಪ ಮೆತ್ತಗಾಗುವವರೆಗೂ ಹುರಿಯಬೇಕು.

3. ನಂತರ ಈ ಮಿಶ್ರಣಕ್ಕೆ ಅರಿಶಿಣ, ಉಪ್ಪು, ಕೆಂಪು ಮೆಣಸಿನ ಪುಡಿ ಮತ್ತು ಚಾಟ್ ಮಸಾಲಾ ಹಾಕಿ ಚೆನ್ನಾಗಿ ಬೆರೆಸಬೇಕು.

4. ಬೇಯಿಸಿದ ಆಲೂಗಡ್ಡೆಗಳನ್ನು ಚೆನ್ನಾಗಿ ಹಿಸುಕಿ ಈ ಮಿಶ್ರಣದೊಂದಿಗೆ ಬೆರೆಸಬೇಕು. ಇದನ್ನು 2-3 ನಿಮಿಷ ಚೆನ್ನಾಗಿ ಹುರಿದು ನಂತರ ಉರಿಯನ್ನು ಆರಿಸಬೇಕು.

5. ರೋಟಿಯನ್ನು ತವೆ ಮೇಲೆ ಬೇಯಿಸಿ ( ರೋಟಿಗೆ ಎಣ್ಣೆ ಬದಲು ತುಪ್ಪ ಹಾಕಿದರೆ ರುಚಿ ಹೆಚ್ಚು)

6. ರೋಟಿ ಮಧ್ಯೆ ಈ ಆಲೂ ಮಿಶ್ರಣ ಹಾಕಿ ಸುರುಳಿ ಸುತ್ತಿದರೆ ಆಲೂ ರೋಟಿ ರೋಲ್ ರೆಡಿ. ಇದರೊಂದಿಗೆ ಟೊಮೆಟೊ ಕೆಚಪ್ ಬೆರೆಸಿ ತಿಂದರೆ ಇನ್ನೂ ರುಚಿ.