ದೋಸೆ ಕ್ಯಾಂಪ್‌ ನಲ್ಲಿ ಸಾದಾ ದೋಸೆ

Breakfast

oi-Staff

By Super

Published: Wednesday, March 28, 2012, 15:48 [IST]

ದೋಸೆ. ಒಂದರ್ಥದಲ್ಲಿ ಕರ್ನಾಟಕ ಸ್ಪೆಷಲ್‌. ಬೆಳಗ್ಗೆ ಎದ್ದು ತಿಂಡಿಗೆ ಏನು ಒದಗಿಸೋದಪ್ಪ ಎನ್ನುವ ಹೆಂಗಸರಿಗೂ ದೋಸೆ ಒಂದು ವರದಾನ. ಈ ದೋಸೆಯಲ್ಲಿ ಹಲವು ಬಗೆ. ವಿದ್ಯಾರ್ಥಿ ಭವನ್‌ ಮಸಾಲೆ ದೋಸೆ, ಕೃಷ್ಣ ಭವನ್‌ ಬೆಣ್ಣೆ ಮಸಾಲೆ, ಜನಾರ್ದನ ಈರುಳ್ಳಿ ದೋಸೆ, ದ್ವಾರಕಾ ಹೋಟೆಲ್‌ ಖಾಲಿ ದೋಸೆ, ರಾಮಕೃಷ್ಣ ರಾಗಿ ದೋಸೆ, ಶಾಂತಿ ಸಾಗರ್‌ ಸೆಟ್‌ ದೋಸೆ.... ಹೀಗೆ ಒಂದೊಂದು ಹೋಟೆಲ್‌ಗಳು ಒಂದೊಂದು ದೋಸೆಯಲ್ಲಿ ಸ್ಪೆಷಲೈಸೇಷನ್‌ ಮಾಡಿವೆ.

ಬೆಂಗಳೂರಿನಲ್ಲಿ ಇತ್ತೀಚೆಗೆ ಗಳೂ ಜನಪ್ರಿಯತೆ ಗಳಿಸಿವೆ. ಅಂದಹಾಗೆ ದೋಸೆಯಲ್ಲಿ ಎಷ್ಟು ಬಗೆ ಇದೆ ಗೊತ್ತೆ?

ರಾಗಿ ದೋಸೆ, ಮಸಾಲೆ ದೋಸೆ, ಸಾದಾ ದೋಸೆ ಅಥವಾ ಖಾಲಿ ದೋಸೆ, ಸೆಟ್‌ ದೋಸೆ, ರವೆ ದೋಸೆ, ಈರುಳ್ಳಿ ದೋಸೆ, ಮೈದಾ ದೋಸೆ, ಅಡೆ ದೋಸೆ, ಅವರೆಕಾಳು ದೋಸೆ, ಮೆಂತ್ಯದ ದೋಸೆ, ನೀರು ದೋಸೆ, ಕಾಯಿ ದೋಸೆ..... ಬನ್ನಿ ನಾವೂ ಕೂಡ ವಿವಿಧ ಬಗೆಯ ದೋಸೆ ಮಾಡೋಣ.

ಸಾದಾ ಅಥವಾ ಖಾಲಿದೋಸೆ

ಬೇಕಾಗುವ ಪದಾರ್ಥ: ಕುಸುಬಲ ಅಕ್ಕಿ ಕಾಲು ಕೆ.ಜಿ. ಸಾಧಾರಣ ಅಕ್ಕಿ ಕಾಲು ಕೆ.ಜಿ., ಉದ್ದಿನ ಬೇಳೆ 125 ಗ್ರಾಂನಷ್ಟು, ಮೆಂತ್ಯ 2 ಚಮಚ, ಒಂದು ಹಿಡಿ ಅವಲಕ್ಕಿ, ರುಚಿಗೆ ತಕ್ಕಷ್ಟು ಉಪ್ಪು.

ಮಾಡುವ ವಿಧಾನ : ಮೊದಲು ಎರಡು ಬಗೆ ಅಕ್ಕಿ, ಉದ್ದಿನ ಬೇಳೆ, ಮೆಂತ್ಯ, ಅವಲಕ್ಕಿ ಎಲ್ಲವನ್ನೂ 6ರಿಂದ 8 ಗಂಟೆಗಳ ಕಾಲ ನೆನೆಸಿಡಿ. ರಾತ್ರಿ ಹೊತ್ತಿಗೆ ಮಿಕ್ಸರ್‌, ಗ್ರೆೃಂಡರ್‌ ಅಥವಾ ಒರಳಿನಲ್ಲಿ ಚೆನ್ನಾಗಿ ರುಬ್ಬಿ, ಉಪ್ಪು ಹಾಕಿ ಕಲೆಸಿ ಮುಚ್ಚಿಡಿ. (ನೆನಪಿರಲಿ, ದೊಡ್ಡ ಪಾತ್ರೆಯಲ್ಲಿ ಅರ್ಧದಷ್ಟು ಹಾಕಿಡುವುದು ಉತ್ತಮ. ಕಂಠ ಭರ್ತಿ ಇದ್ದರೆ, ಹುದುಗು ಹೆಚ್ಚಾಗಿ ಹಿಟ್ಟು ಹೊರ ಚೆಲ್ಲುತ್ತದೆ).

ಬೆಳಗ್ಗೆ ಹೊತ್ತಿಗೆ ಅದು ಸೊಗಸಾಗಿ ಹಾಗೂ ಹದವಾಗಿ ಹುದುಗಾಗಿರುತ್ತದೆ. ಆನಂತರ ಉರಿಯುವ ಒಲೆಯ ಮೇಲೆ ಕಾವಲಿ ಇಟ್ಟು, ಕಾವಲಿಗೆ ಎಣ್ಣೆ ಸವರಿ, ಒಂದು ಸೌಟಿನಷ್ಟು ಹಿಟ್ಟನ್ನು ಹೆಂಚಿನ ಮೇಲೆ ಹಾಕಿ ಮಗಚುವಕೈಯಲ್ಲಿ ಎರಡೂ ಬದಿ ಬೇಯಿಸಿದರೆ, ಸಾದಾ ದೋಸೆ ರೆಡಿ. ದೋಸೆ ಜತೆ ಈರುಳ್ಳಿ ಸಾಂಬರ್‌ ಅಥವಾ ತೆಂಗಿನಕಾಯಿ ಚಟ್ನಿ ಒಳ್ಳೇ ಕಾಂಬಿನೇಷನ್‌.