ಅಪ್ಪಟ ಕನ್ನಡ ಮಣ್ಣಿನ ಖಾದ್ಯ: ರಾಗಿ ದೋಸೆ

ಇಷ್ಟು ದಿನ ಕರ್ನಾಟಕವನ್ನು ರಾಗಿ ಮುದ್ದೆ ಮಾತ್ರ ಪ್ರತಿನಿಧಿಸುತ್ತಿತ್ತು. ಈಗ ಆ ಸಾಲಿಗೆ ಅಪ್ಪಟ ಕನ್ನಡ ಮಣ್ಣಿನ ರಾಗಿ ದೋಸೆ ಸಹ ಸೇರಿದೆ. ಈಗಾಗಲೇ ವಿದ್ಯಾರ್ಥಿ ಭವನ್‌ ಮಸಾಲೆ ದೋಸೆ, ಕೃಷ್ಣ ಭವನ್‌ ಬೆಣ್ಣೆ ಮಸಾಲೆ, ಜನಾರ್ದನ ಈರುಳ್ಳಿ ದೋಸೆ, ದ್ವಾರಕಾ ಹೋಟೆಲ್‌ ಖಾಲಿ ದೋಸೆ, ರಾಮಕೃಷ್ಣ ರಾಗಿ ದೋಸೆ, ಶಾಂತಿ ಸಾಗರ್‌ ಸೆಟ್‌ ದೋಸೆ....ಈ ಎಲ್ಲಾ ದೋಸೆಗಳನ್ನು ಸವಿದರೂ ರಾಗಿ ದೋಸೆ ಮಾತ್ರ ಸದಾ ಕಾಡುತ್ತಿರುತ್ತದೆ. ಜೊತೆಗೆ ಆರೋಗ್ಯದ ಬಗ್ಗೆ ಹೆಚ್ಚಿನ ಕಾಳಜಿ ಇರುವವರು ರಾಗಿ ದೋಸೆಯನ್ನು ಮತ್ತಷ್ಟು ಇಷ್ಟಪಡುತ್ತಿದ್ದಾರೆ.

*ಶ್ರೀರಕ್ಷಾ, ಬೆಂಗಳೂರು

ಬೇಕಾಗುವ ಸಾಮಗ್ರಿಗಳು
ರಾಗಿ: 100ಗ್ರಾಂ
ಮೊಸರು:10 ಗ್ರಾಂ
ಶುಂಠಿ: 5 ಗ್ರಾಂ
ಹಸಿ ಮೆಣಸಿನಕಾಯಿ:2
ಇಂಗು: 2 ಗ್ರಾಂ ಅಥವಾ ಒಂದು ಚಿಟಿಕೆ
ಉಪ್ಪು: ರುಚಿಗೆ ತಕ್ಕಷ್ಟು
ಮೈದಾ: 10 ಗ್ರಾಂ
ಅಕ್ಕಿ ಹಿಟ್ಟು: 5 ಗ್ರಾಂ
ಸಣ್ಣಗೆ ಹೆಚ್ಚಿಕೊಂಡ ಈರುಳ್ಳಿ: 10 ಗ್ರಾಂ

ತಯಾರಿಸುವ ವಿಧಾನ
5 ರಿಂದ 6 ಗಂಟೆಗಳ ಕಾಲ ರಾಗಿಯನ್ನು ನೀರಿನಲ್ಲಿ ನೆನೆಸಿಡಿ. ನಂತರ ಒರಳು ಕಲ್ಲು ಅಥವಾ ಮಿಕ್ಸಿ ಅಥವಾ ಗ್ರೈಂಡರ್‌ನಲ್ಲಿ ಚೆನ್ನಾಗಿ ರುಬ್ಬಿಕೊಳ್ಳಿ. ಸಣ್ಣಗೆ ಹೆಚ್ಚಿಕೊಂಡ ಶುಂಠಿ, ಮೊಸರು,ಹಸಿ ಮೆಣಸಿನಕಾಯಿ, ಇಂಗು,ಉಪ್ಪು, ಮೈದಾ,ಅಕ್ಕಿ ಹಿಟ್ಟು,ಈರುಳ್ಳಿಯನ್ನು ರುಬ್ಬಿಕೊಂಡ ರಾಗಿ ಹಿಟ್ಟಿಗೆ ಸೇರಿಸಿ.

ಉರಿಯುವ ಒಲೆಯ ಮೇಲೆ ಕಾವಲಿ ಇಟ್ಟು, ಕಾವಲಿಗೆ ಬೆಣ್ಣೆ ಅಥವಾ ಎಣ್ಣೆಯನ್ನು ಸವರಿ, ಒಂದು ಸೌಟಿನಷ್ಟು ಹಿಟ್ಟನ್ನು ಹೆಂಚಿನ ಮೇಲೆ ಹಾಕಿ ಮಗಚುವಕೈಯಲ್ಲಿ ಎರಡೂ ಬದಿ ಬೇಯಿಸಿದರೆ, ರಾಗಿ ದೋಸೆ ರೆಡಿ. ದೋಸೆ ಜತೆ ಈರುಳ್ಳಿ ಸಾಂಬರ್‌ ಅಥವಾ ತೆಂಗಿನಕಾಯಿ ಚಟ್ನಿ ಒಳ್ಳೇ ಕಾಂಬಿನೇಷನ್‌.