ಸುಲಭವಾಗಿ ತಯಾರಿಸಬಹುದು ಆಲೂಪರೋಟ

Updated: Friday, April 19, 2013, 12:47 [IST]

ಬರೀ ಮೈದಾದಿಂದ ತಯಾರಿಸುವ ಪರೋಟಕ್ಕಿಂತ ಆಲೂ ಪರೋಟದ ರುಚಿ ಹೆಚ್ಚು. ಆಲೂ ಪರೋಟವನ್ನು ಮಾಡಲು ತುಂಬಾ ಸಮಯವೇನು ಬೇಕಾಗಿಲ್ಲ. ಬಲು ಸಲಭದಲ್ಲಿಯೆ ತಯಾರಿಸಬಹುದು. ಅದಕ್ಕಾಗಿ ನಾವು ಕೆಲವು ಸರಳ ವಿಧಾನಗಳನ್ನು ನೀಡುತ್ತಿದ್ದೇವೆ. ಈ ಉಪಾಯಗಳನ್ನು ಪಾಲಿಸಿದರೆ ಆಲೂ ಪರೋಟ ಮಾಡಲು ಹೆಚ್ಚಿನ ಸಮಯ ತೆಗೆದುಕೊಳ್ಳುವುದಿಲ್ಲ.

ಆಲೂ ಪರೋಟಕ್ಕೆ ಬೇಕಾಗುವ ಸಾಮಾಗ್ರಿಗಳು:

1. ಆಲೂಗೆಡ್ಡೆ 2 (ಬೇಯಿಸಿ ಸಿಪ್ಪೆ ಸುಲಿದಿದ್ದು)
2. ಮೈದಾ 2 ಕಪ್
3. ಗೋಧಿ (ಸ್ವಲ್ಪ ತರಿಯಿರಬೇಕು)
4. ಒಣಗಿದ ಮಾವಿನ ಪುಡಿ (ಅಮೆಚ್ಯೂರ್) 1 ಚಮಚ
5. ಚಿಟಿಕೆಯಷ್ಟು ಅಜ್ವೈನ್
6. ಕತ್ತರಿಸಿದ ಕೊತ್ತಂಬರಿ ಸೊಪ್ಪು
7. ರುಚಿಗೆ ತಕ್ಕ ಉಪ್ಪು
8. ಹಸಿಮೆಣಸಿನಕಾಯಿ
9. ತುಪ್ಪ

ತಯಾರಿಸುವ ವಿಧಾನ:

1. ಆಲೂಪರೋಟ ಬೆಳಗ್ಗೆ ಮಾಡಲು ರಾತ್ರಿ ಮೈದಾ ಹಿಟ್ಟು ಮತ್ತು ಗೋಧಿ ಹಿಟ್ಟನ್ನು ಮಿಶ್ರ ಮಾಡಿ, ರುಚಿಗೆ ತಕ್ಕ ಉಪ್ಪು ಹಾಕಿ ಕಲೆಸಿಡಬೇಕು. ಹಿಟ್ಟು ಮೃದುವಾಗಿರಲು ಕಲೆಸುವಾಗ 2 ಚಮಚ ತುಪ್ಪ ಹಾಕಿರಬೇಕು. ನಂತರ ಹಿಟ್ಟನ್ನು ತೇವವಾದ ಮಸ್ಲೀನ್ ಬಟ್ಟೆಯಿಂದ ಸುತ್ತಿ ಇಡಬೇಕು.

2. ಬೆಳಗ್ಗೆ ಆಲೂಗೆಡ್ಡೆಯನ್ನು ಬೇಯಿಸಬೇಕು. ಹಸಿಮೆಣಸಿನಕಾಯಿಯನ್ನು ಕತ್ತರಿಸಿಟ್ಟುಕೊಳ್ಳಬೇಕು.

3. ಪರೋಟಕ್ಕೆ ತಟ್ಟಲು ಹಿಟ್ಟಿನಿಂದ ಚಿಕ್ಕ ಉಂಡೆಗಳನ್ನು ಮಾಡಬೇಕು.

4. ಆಲೂಗೆಡ್ಡೆಯ ಸಿಪ್ಪೆ ಸುಲಿದು ಅದನ್ನು ಚೆನ್ನಾಗಿ ಹಿಸುಕಿ ಅದರಲ್ಲಿ ಕೊತ್ತಂಬರಿ ಸೊಪ್ಪು, ಅಜ್ವೈನ್, ಅಮೆಚ್ಯೂರ್, ಹಸಿಮೆಣಸಿಕಾಯಿ ಹಾಕಿ ಸ್ವಲ್ಪ ಉಪ್ಪು ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು.

5. ಈಗ ಪರೋಟ ಹಿಟ್ಟಿನ ಉಂಡೆಯನ್ನು ಕೈ ಬೆರಳಿನಿಂದ ಸ್ವಲ್ಪ ಗುಂಡಿ ಮಾಡಿ ಅದಕ್ಕೆ ಆಲೂ ಮಿಶ್ರಣವನ್ನು ತುಂಬಿ ಮೈದಾ ಪರೋಟಕ್ಕೆ ತಟ್ಟಿದ ರೀತಿ ತಟ್ಟಬೇಕು.

6. ನಂತರ ಪರೋಟವನ್ನು ಕಡಿಮೆ ಉರಿಯಲ್ಲಿ ಕಾವಲಿಗೆ ಸ್ವಲ್ಪ ತುಪ್ಪ ಹಾಕಿ ಪರೋಟ ಹಾಕಬೇಕು. ನಂತರ ಅದನ್ನು ಮಗುಚಿ ಹಾಕಿ ತುಪ್ಪ ಹಾಕಬೇಕು. ಈ ರೀತಿ ಮಾಡಿದರೆ ರುಚಿಕರವಾದ ಆಲೂ ಪರೋಟ ರೆಡಿ.