ಹೆರಿಗೆಯಾದ ನಂತರ ತೂಕ ಇಳಿಸುವಿಕೆ ಸರಿಯೆ?

Post Natal

oi-Staff

By Super

Updated: Monday, October 12, 2015, 10:50 [IST]

ಬಳಕುವ ಮೈಮಾಟ ಬೇಕೆಂದು ಪ್ರತಿಯೊಂದು ಹೆಣ್ಣು ಬಯಸುತ್ತಿರುತ್ತಾಳೆ. ಡಯಟ್, ವ್ಯಾಯಾಮ ಮಾಡಿ ಹೆಚ್ಚಿನವರು ಆಕರ್ಷಕ ಮೈಕಟ್ಟು ಹೊಂದಿರುತ್ತಾರೆ. ಆದರೆ ಮದುವೆಯಾಗಿ ಒಂದು ಮಗುವಿನ ತಾಯಿಯಾದಾಗ ದೇಹದಲ್ಲಿ ಅನೇಕ ಬದಲಾವಣೆಗಳಾಗುತ್ತವೆ. ಕೆಲವರು ಗುಂಡಗೆ ಆಗುವವರು. ಆದರೆ ಈ ಬದಲಾವಣೆಯನ್ನು ಸ್ವಾಗತಿಸಲು ಹೆಚ್ಚಿನವರು ತಯಾರು ಇರುವುದಿಲ್ಲ. ಮಗುವಾದ ನಂತರ ಕೂಡ ಬಳಕುವ ಮೈಮಾಟ ಬೇಕೆಂದು ಬಯಸುತ್ತಾರೆ.

ಅದಕ್ಕಾಗಿ ಹೆರಿಗೆಯಾದ ಕೆಲವೇ ತಿಂಗಳಿನಲ್ಲಿ ಜಿಮ್ ಗೆ ಸೇರಕೊಳ್ಳ ಬಯಸುತ್ತಾರೆ, ಆಹಾರ ಕಡಿಮೆ ತಿನ್ನುತ್ತಾರೆ. ಒಟ್ಟಿನಲ್ಲಿ ಒಂದು ಮಗುವಿನ ತಾಯಿಯಾದರೂ ಎಷ್ಟು ಆಕರ್ಷಕ ಮೈಮಾಟ ಹೊಂದಿದ್ದಾಳೆ ಎಂದು ಇತರರಿಂದ ಹೊಗಳಿಸಿಕೊಳ್ಳಬೇಕೆಂಬ ಹಂಬಲ ಕೂಡ ಇರುತ್ತದೆ. ಮಗುವಾದ ನಂತರ ಕೂಡ ಬಳಕುವ ಮೈಮಾಟ ಪಡೆಯುವುದು ತಪ್ಪಲ್ಲ. ಆದರೆ ಹೆರಿಗೆಯಾದ ಕೆಲವೇ ತಿಂಗಳಿನಲ್ಲಿ ತೂಕ ಇಳಿಸಿಕೊಳ್ಳುವ ಯೋಚನೆ ಎಷ್ಟರ ಮಟ್ಟಿಗೆ ಸರಿ ಎಂದು ತಿಳಿಯಲು ಮುಂದೆ ಓದಿ.

1. ಗರ್ಭವತಿಯಾದಾಗ ಮೈ ತೂಕ ಸ್ವಲ್ಪ ಜಾಸ್ತಿಯಾಗುವುದು ಸಹಜ. ಹೆರಿಗೆ ನಂತರ ದೇಹದ ಆರೈಕೆಗೆ ಉತ್ತಮ ಪೋಷಕಾಂಶಗಳಿರುವ ಆಹಾರ ಸೇವನೆ ಅವಶ್ಯಕ. ಅಲ್ಲದೆ ಮಗುವಿಗೆ ಹಾಲು ಕೊಡುವುದರಿಂದ ಪೌಷ್ಠಿಕ ಆಹಾರದ ಕಡೆ ಗಮನ ಕೊಡಬೇಕೆ ಹೊರತು ಡಯಟ್ ಕಡೆಯಲ್ಲ.

2. ಹೆರಿಗೆ ನಂತರ ಸ್ವಲ್ಪ ಕಾಲದವರೆಗೆ ಹೊಟ್ಟೆಯನ್ನು ಹಸಿದುಕೊಂಡು ಇರಬಾರದು. ಈ ರೀತಿ ಹಸಿವಿನಿಂದ ಇದ್ದರೆ ನಿಶ್ಯಕ್ತಿ ಉಂಟಾಗುತ್ತದೆ. ಆದ್ದರಿಂದ ತೂಕ ಹೆಚ್ಚಾಗುತ್ತದೆ ಎಂದು ತಿನ್ನದೆ ಕೂರದೆ ಸರಿಯಾಗಿ ತಿನ್ನಬೇಕು.

3. ಪ್ರಸವದ ನಂತರ ದಿನಕ್ಕೆ 400-500 ಕ್ಯಾಲೋರಿ ಆಹಾರವನ್ನು ಹೆಚ್ಚುವರಿಯಾಗಿ ತೆಗೆದುಕೊಳ್ಳಬೇಕು. ಮಗುವಿನ ಆರೋಗ್ಯ ತಾಯಿ ತಿನ್ನುವ ಆಹಾರದ ಮೇಲೆ ಅವಲಂಭಿಸಿರುತ್ತದೆ.

4. ಹೆರಿಗೆಯಾಗಿ ಒಂದು ಆರು ತಿಂಗಳವರೆಗೆ ದೇಹದ ತೂಕದ ಬಗ್ಗೆ ಚಿಂತೆ ಮಾಡಬಾರದು. ಊಟ ಬಿಟ್ಟು ತೆಳ್ಳಗಾಗುವ ಪ್ರಯತ್ನ ಮಾಡಬಾರದು.

ಯಾವಾಗ ವ್ಯಾಯಾಮ ಮಾಡಬೇಕು.

1. ಹೆರಿಗೆಯಾದ 2 ತಿಂಗಳ ಬಳಿಕ ನಿಧಾನಕ್ಕೆ ಒಂದು 30 ನಿಮಿಷ ನಡೆಯುವ ವ್ಯಾಯಾಮ ಮಾಡಬೇಕು. ಮನೆಯಲ್ಲಿ ಸಣ್ಣ ಪುಟ್ಟ ಕೆಲಸಗಳನ್ನು ಮಾಡಿದರೆ ಸ್ವಲ್ಪ ವ್ಯಾಯಾಮ ದೊರಕುವುದು.

2. ನಾರ್ಮಲ್ ಡೆಲಿವರಿಯಾದವರು 6 ತಿಂಗಳ ಬಳಿಕ ಪುಶ್ ಅಪ್. ಪುಲ್ ಅಪ್ ಮುಂತಾದ ವ್ಯಾಯಾಮ ಮಾಡುವುದು ಒಳ್ಳೆಯದು.

ಸಿಸೇರಿಯನ್ ಆದವರು ತಮ್ಮ ಆರೋಗ್ಯದ ಬಗ್ಗೆ ಮತ್ತಷ್ಟು ಎಚ್ಚರಿಕೆ ವಹಿಸಬೇಕು.

1. ಸಿಸೇರಿಯನ್ ಆದರೆ ಹೊಟ್ಟೆ ಹೆಚ್ಚಾಗಿ ಬಬರಬಹುದು. ಇದನ್ನು ನಿಯಂತ್ರಿಸಲು ಬೆಲ್ಟ್ ಧರಿಸುವುದು ಅವಶ್ಯಕ. ಇಲ್ಲದಿದ್ದರೆ ಅಧಿಕ ಬೊಜ್ಜು ತುಂಬಿ ದೇಹದ ತನ್ನ ಸುಂದರ ಆಕಾರವನ್ನು ಕಳೆದುಕೊಳ್ಳುತ್ತದೆ. ಆದರೆ ಈ ಬೆಲ್ಟ್ ಧರಿಸಿದರೆ ಹೊಟ್ಟೆ ಕರಗುವುದರಿಂದ ತೆಳ್ಳಗೆ ಕಾಣಿಸಬಹುದು ಅಲ್ಲದೆ ಸಿಸೇರಿಯನ್ ಆದವರಿಗೆ ಸ್ವಲ್ಪ ದಿನಗಳವರೆಗೆ ಎದ್ದು ಕೂರಲು ತುಂಬಾ ಕಷ್ಟವಾಗುತ್ತದೆ. ಈ ಬೆಲ್ಟ್ ಧರಿಸಿದರೆ ಎದ್ದು ಕೂರಲು ಸುಲಭವಾಗುವುದು.

2. ಸಿಸೇರಿಯನ್ ಆದವರು 6 ತಿಂಗಳ ನಂತರ ನಿಧಾನಕ್ಕೆ ನಡೆಯುವ ವ್ಯಾಯಾಮ ಮಾಡಬಹುದು, ನಡೆಯುವಾಗ ಬೀಳದಂತೆ ಜಾಗೃತಿವಹಿಸಬೇಕು. ಕಷ್ಟದ ವ್ಯಾಯಾಮವನ್ನು ಒಂದು ವರ್ಷದ ಬಳಿಕ ಮಾಡಬಹುದು.

ಹೆರಿಗೆ ಬಳಿಕ ಕಟ್ಟುನಿಟ್ಟಿನ ಡಯಟ್ ಬದಲು, ಉತ್ತಮ ಸಮತೋಲನ ಆಹಾರ ಮತ್ತು ಸೂಕ್ತ ವ್ಯಾಯಾಮ ಕ್ರಮಗಳನ್ನು ಅನುಸರಿಸುವುದು ಸೂಕ್ತ. ಇದರಿಂದ ದೇಹವು ಅಪೌಷ್ಠಿಕತೆಗೆ ಈಡಾಗುವುದಿಲ್ಲ.