6 ತಿಂಗಳು ತುಂಬುವ ಮೊದಲು ಮಗುವಿಗೆ ನೀರು ಕುಡಿಸಿದರೆ ಈ ಅಪಾಯಗಳಿವೆ ಹುಷಾರ್!

ಬೇಸಿಗೆ ಶುರುವಾಗಿದೆ, ಬೇಸಿಗೆಯಲ್ಲಿ ದೇಹದಲ್ಲಿ ನೀರಿನಂಶ ಕಡಿಮೆಯಾಗುವುದನ್ನು ತಡೆಗಟ್ಟಲು ಸಾಕಷ್ಟು ನೀರು ಕುಡಿಯಬೇಕು. ಮಕ್ಕಳಿಗೆ ನೀರು ಕುಡಿಸಬೇಕು, ಇಲ್ಲದಿದ್ದರೆ ಆರೋಗ್ಯ ಸಮಸ್ಯೆ ಉಂಟಾಗುವುದು.

6 ತಿಂಗಳಿಗಿಂತ ಚಿಕ್ಕ ಮಕ್ಕಳಿಗೂ ನೀರು ಕೊಡುತ್ತಾರೆ, ಮಕ್ಕಳಿಗೆ ನೀರು ಕೊಡದಿದ್ದರೆ ಅವರ ಬಾಯಿ ಒಣಗುತ್ತೆ ಅಂತ ಸ್ಯೂನ್ ಅಥವಾ ಫೀಡಿಂಗ್‌ ಬಾಟಲಿನಲ್ಲಿ ನೀರು ಕೊಡುತ್ತಾರೆ. 6 ತಿಂಗಳಿಗಿಂತ ಚಿಕ್ಕ ಮಗುವಿಗೆ ನೀರು ಕೊಡುವುದರಿಂದ ಆ ಮಗುವಿನ ಆರೋಗ್ಯಕ್ಕೆ ನಾವು ತೊಂದರೆ ಮಾಡುತ್ತಿದ್ದೇವೆ ಎಂಬುವುದು ಗೊತ್ತೇ?

ಹೌದು, 6 ತಿಂಗಳಿಗಿಂತ ಚಿಕ್ಕ ಮಗುವಿಗೆ ನೀರು ಕೊಡಬಾರದು ಎಂದು ಮಕ್ಕಳ ತಜ್ಞರು ಹೇಳುತ್ತಾರೆ. ಬೇಸಿಗೆಯಲ್ಲಿ ಮಗುವಿಗೆ ನೀರು ಕೊಡದಿದ್ದರೆ ಹೇಗೆ?

ಮಗುವಿಗೆ ಅವಶ್ಯಕವಾದ ಸಿಗುವುದಾದರೂ ಹೇಗೆ ಎಂಬ ಚಿಂತೆಯೇ? ಚಿಂತೆ ಬಿಡಿ, ಇದರ ಕುರಿತ ಹೆಚ್ಚಿನ ಮಾಹಿತಿ ಇಲ್ಲಿದೆ ನೋಡಿ:

6 ತಿಂಗಳವರೆಗೆ ಮಗುವಿಗೆ ಎದೆ ಹಾಲು ಬಿಟ್ಟು ಬೇರೆ ಏನೂ ನೀಡಬೇಡಿ
ಇದನ್ನು ನಿಮಗೆ ವೈದ್ಯರು ಕೂಡ ಹೇಳಿರುತ್ತಾರೆ, ಆದರೆ ಹಲವರು ಇದನ್ನು ಪಾಲಿಸುವುದಿಲ್ಲ. ಮಗುವಿಗೆ 4 ತಿಂಗಳು ತುಂಬುವಾಗಲೇ ನೀರು ಕೊಡುವುದು, ರಾಗಿ ಅಂಬಳಿ ಕೊಡುವುದು ಮಾಡುತ್ತಾರೆ. ಆದರೆ ಆ ರೀತಿ ಮಾಡಲೇಬಾರದು. ನೀವು 6 ತಿಂಗಳವರೆಗೆ ತಾಯಿಯ ಎದೆಹಾಲನ್ನು ಹೊರತುಪಡಿಸಿ ಮಗುವಿಗೆ ಏನನ್ನೂ ನೀಡಬಾರದು. ತಾಯಿಯ ಎದೆಹಾಲಿನಲ್ಲಿ ಶೇ. 87ರಷ್ಟು ನೀರು, ಸೇ. 1ರಷ್ಟು ಪ್ರೊಟೀನ್‌, ಶೆ. 4ರಷ್ಟುಲಿಪಿಡ್, ಶೇ. 7ರಷ್ಟು ಕಾರ್ಬೋಹೈಡ್ರೇಟ್ಸ್ ಇರುತ್ತದೆ, ಮಗುವಿಗೆ ಬೆಳವಣಿಗೆಗೆ ಬೇಕಾದ ಎಲ್ಲಾ ಪೋಷಕಾಂಶಗಳು ತಾಯಿಯ ಎದೆಹಾಲಿನಲ್ಲಿಯೇ ಇರುವುದರಿಂದ 6 ತಿಂಗಳವರೆಗೆ ನೀರಾಗಲಿ, ಇತರ ಆಹಾರವಾಗಲಿ ನೀಡಬಾರದು.

ಮಕ್ಕಳಿಗೆ ನೀರು ಕೊಟ್ಟರೆ ಕಿಡ್ನಿಗೆ ಹಾನಿಯಾಗುತ್ತದೆ
ಮಕ್ಕಳಿಗೆ 6 ತಿಂಗಳಾಗುವವರಿಗೆ ಮಕ್ಕಳ ಕಿಡ್ನಿ ಸರಿಯಾಗಿ ಬೆಳವಣಿಗೆಯಾಗಿರುವುದಿಲ್ಲ. ಮಗುವಿನ ಕಿಡ್ನಿ ನೀರಿನಲ್ಲಿರುವ ಬೇಡದ ಅಂಶಗಳನ್ನು ತೆಗೆದು ಮೂತ್ರದ ಮೂಲಕ ಹೊರಹಾಕುವಷ್ಟು ಸಾಮರ್ಥ್ಯ ಹೊಂದಿರುವುದಿಲ್ಲ, ಆದ್ದರಿಂದ ಮಗುವಿನ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ.

ಸಾವು ಕೂಡ ಸಂಭವಿಸುವುದು
6 ತಿಂಗಳಿಗಿಂತ ಚಿಕ್ಕ ಮಗುವಿಗೆ ನೀರು ಕೊಡುವುದರಿಂದ hyponatremia ಅಂದರೆ ಮೆದುಳಿನಲ್ಲಿ ಊತ ಉಂಟಾಗಿ ಸಾವು ಕೂಡ ಸಂಭವಿಸಬಹುದು.

ಮಗುವಿಗೆ ಯಾವಾಗ ನೀರು ಕೊಡಲು ಪ್ರಾರಂಭಿಸಬಹುದು?
ಮಗುವಿಗೆ 6 ತಿಂಗಳ ನೀರು ಕೊಡಲು ಪ್ರಾರಂಭಿಸಬಹುದು, ಮಗುವಿಗೆ ಸ್ವಲ್ಪ ನೀರನ್ನು ಸ್ಪೂನ್‌ನಲ್ಲಿ ಕೊಡಿ, ಬಾಟಲಿಯಲ್ಲಿ ಕೊಡುವ ತಪ್ಪು ಮಾಡದಿರಿ. ಮಗುವಿಗೆ ಒಂದು ವರ್ಷ ಆಗುವವರಿಗೆ ಸ್ವಲ್ಪ ನೀರು ಕೊಡಿ, ಜೊತೆಗೆ ಎದೆಹಾಲು ಕೊಡಿ. ಮಗುವಿಗೆ ಒಂದು ವರ್ಷ ಕಳೆದ ಮೇಲೆ ಆ ಮಗು ಎಷ್ಟು ಕುಡಿಯುತ್ತದೋ ಅಷ್ಟು ನೀರು ಕೊಡಬಹದು.

ಮಗುವಿನಲ್ಲಿ ನೀರಿನಂಶ ಕಡಿಮೆಯಾದರೆ ಏನಾಗುತ್ತದೆ
* ತುಂಬಾ ಅಳು
* ವಾಂತಿ
* ಸುಸ್ತಾಗುವುದು
* ಪಿಡ್ಸ್ ಬರುವುದು
ಈ ಬಗೆಯ ಲಕ್ಷಣಗಳು ಕಂಡು ಬಂದರೆ ಮಕ್ಕಳ ತಜ್ಞರಿಗೆ ತೋರಿಸಿ.

ಬೇಸಿಗೆಯಲ್ಲಿ ಆಗಾಗ ಎದೆಹಾಲು ನೀಡಿ
ಮಗುವಿನಲ್ಲಿ ನೀರಿನಂಶ ಕಡಿಮೆಯಾಗದಿರಲು ಬೇಸಿಗೆಯಲ್ಲಿ ಆಗಾಗ ಹಾಲು ಕೊಡಿ. ಸಾಮಾನ್ಯವಾಗಿ ಎರಡು ಗಂಟೆಗೊಮ್ಮೆ ನೀಡಿದರೆ ಸಾಕು.