ದೀಪಾವಳಿ ಬಜೆಟ್ ಚಿಂತೆಯೇ? ದಂಪತಿಗಳೇ, ಈ 'ಮನಿ ಡೇಟ್' ಮೂಲಕ ಹಣಕಾಸಿನ ಸಮಸ್ಯೆಗಳಿಗೆ ಗುಡ್ ಬೈ ಹೇಳಿ!

ಇಂದು (ಅಕ್ಟೋಬರ್ 30) ಭಾರತದಲ್ಲಿ 'ವಿಶ್ವ ಮಿತವ್ಯಯ ದಿನ' (World Thrift Day). ಈ ಹಬ್ಬದ ಋತುವಿನಲ್ಲಿ ನಿಮ್ಮ ದೀಪಾವಳಿ ಬಜೆಟ್ ಸರಿದೂಗಿಸಲು ಮತ್ತು ಸಾಲದ ಸುಳಿಗೆ ಸಿಲುಕದಿರಲು ದಂಪತಿಗಳು 30 ನಿಮಿಷಗಳ ಸಣ್ಣ 'ಮನಿ ಡೇಟ್' (ಹಣಕಾಸು ಚರ್ಚೆ) ಮಾಡಿ! ಮೊಬೈಲ್ ಸೈಲೆಂಟ್‌ನಲ್ಲಿಟ್ಟು, ಒಂದು ನೋಟ್‌ಪ್ಯಾಡ್ ತೆರೆಯಿರಿ. ಒಬ್ಬರು ಮಾತನಾಡಿದರೆ ಇನ್ನೊಬ್ಬರು ಪಾಯಿಂಟ್ಸ್ ಬರೆದುಕೊಳ್ಳಿ. ಇಲ್ಲಿ ಯಾರನ್ನೂ ದೂಷಿಸುವುದು ಬೇಡ, ಹಣಕಾಸಿನ ವಿಚಾರದಲ್ಲಿ ಸ್ಪಷ್ಟತೆ ಕಂಡುಕೊಳ್ಳುವುದಷ್ಟೇ ನಮ್ಮ ಗುರಿ. ಕೊನೆಯಲ್ಲಿ ಮೂರು ಪ್ರಮುಖ ನಿರ್ಧಾರಗಳನ್ನು ಪಟ್ಟಿ ಮಾಡಿಕೊಂಡು ಈ ಚರ್ಚೆ ಮುಗಿಸಿ.

ಮೊದಲು ನಿಮ್ಮಿಬ್ಬರ ನಿಗದಿತ ಮತ್ತು ಇತರೆ ಆದಾಯವನ್ನು (ಟೇಕ್-ಹೋಮ್ ಸ್ಯಾಲರಿ) ಬರೆದುಕೊಳ್ಳಿ. ನಂತರ ಪ್ರತಿಯೊಂದು ಇಎಂಐ (EMI) ಮತ್ತು ಅಗತ್ಯ ಬಿಲ್‌ಗಳನ್ನು ಪಾವತಿಸುವ ದಿನಾಂಕಗಳ ಸಮೇತ ಪಟ್ಟಿ ಮಾಡಿ. ದೀಪಾವಳಿ ಉಡುಗೊರೆ, ಪ್ರವಾಸ, ಹೊಸ ಬಟ್ಟೆ, ಸಿಹಿ ತಿಂಡಿ ಮತ್ತು ಮನೆ ಅಲಂಕಾರಕ್ಕೆ ಎಷ್ಟು ಖರ್ಚು ಮಾಡಬೇಕು ಎಂಬುದಕ್ಕೆ ಒಂದು ಮಿತಿ ಇಡಿ. ನಿಮ್ಮ ಯುಪಿಐ (UPI) ಮತ್ತು ಆಟೋ-ಪೇ (Autopay) ಖರ್ಚುಗಳನ್ನು ಒಮ್ಮೆ ಪರಿಶೀಲಿಸಿ. ಸದ್ಯಕ್ಕೆ ಅನಗತ್ಯ ಖರ್ಚುಗಳಿಗೆ ಬ್ರೇಕ್ ಹಾಕಿ, ಬಿಲ್ ಪಾವತಿಯ ದಿನಾಂಕಗಳಿಗೆ ಕ್ಯಾಲೆಂಡರ್ ರಿಮೈಂಡರ್ ಸೆಟ್ ಮಾಡಿಕೊಳ್ಳಿ.

ವಿಶ್ವ ಮಿತವ್ಯಯ ದಿನ: ದಂಪತಿಗಳಿಗೆ 7 ಹಂತಗಳ 'ಮನಿ ಡೇಟ್' ಪ್ಲಾನ್

ಮುಂದಿನ ಹಂತವಾಗಿ, ಇಬ್ಬರೂ ಸೇರಿ ತುರ್ತು ನಿಧಿ (Emergency Fund) ರೂಪಿಸಿ. ಮುಂದಿನ ಕೆಲವು ವಾರಗಳ ಖರ್ಚಿಗೆ ಬೇಕಾಗುವಷ್ಟು ಹಣವನ್ನು ಗುರಿಯಾಗಿಸಿಕೊಂಡು, ಪ್ರತಿ ತಿಂಗಳು ಎಷ್ಟು ಉಳಿಸಬೇಕು ಎಂದು ಲೆಕ್ಕ ಹಾಕಿ. ಮನೆ ಖರ್ಚನ್ನು ಅರ್ಧದಷ್ಟು (50-50) ಹಂಚಿಕೊಳ್ಳುತ್ತೀರೋ ಅಥವಾ ಆದಾಯಕ್ಕೆ ತಕ್ಕಂತೆ ಭಾಗ ಮಾಡುತ್ತೀರೋ ನಿರ್ಧರಿಸಿ. ಇಬ್ಬರ ಆದಾಯದಲ್ಲಿ ವ್ಯತ್ಯಾಸವಿದ್ದರೆ ಪ್ರೀತಿಯಿಂದ, ನ್ಯಾಯಯುತವಾಗಿ ನಿರ್ಧಾರ ತಗೊಳ್ಳಿ. ಯಾರು ಯಾವ ಬಿಲ್ ಕಟ್ಟಬೇಕು ಎಂದು ಬರೆದಿಟ್ಟುಕೊಳ್ಳಿ, ವಾರಕ್ಕೊಮ್ಮೆ ಇದನ್ನು ಪರಿಶೀಲಿಸಲು ಸಣ್ಣ ರಿವ್ಯೂ ಮೀಟಿಂಗ್ ಇಟ್ಟುಕೊಳ್ಳಿ.

ದೀಪಾವಳಿ ಬಜೆಟ್ ಮತ್ತು ಸಾಲ ಮುಕ್ತಿ: ಪ್ರಾಕ್ಟಿಕಲ್ ಟಿಪ್ಸ್

ಸಾಲ ತೀರಿಸುವುದು ಮತ್ತು ಹೂಡಿಕೆ ಮಾಡುವ ವಿಚಾರದಲ್ಲಿ ಸ್ಪಷ್ಟ ನಿಯಮವಿರಲಿ. 'ಬೈನಾ‌ವ್ ಪೇ ಲೇಟರ್' (BNPL) ಮತ್ತು ಕ್ರೆಡಿಟ್ ಕಾರ್ಡ್‌ನಂತಹ ಹೆಚ್ಚಿನ ಬಡ್ಡಿಯ ಸಾಲಗಳನ್ನು ಮೊದಲು ಚುಕ್ತಾ ಮಾಡಿ. ಬಡ್ಡಿ ದರ ಹೆಚ್ಚಿದ್ದರೆ, ಮ್ಯೂಚುವಲ್ ಫಂಡ್ ಎಸ್‌ಐಪಿ (SIP) ಹೆಚ್ಚಿಸುವ ಮುನ್ನ ಸಾಲ ತೀರಿಕೊಳ್ಳಿ. ಕಡಿಮೆ ಬಡ್ಡಿಯ ಗೃಹ ಸಾಲಗಳಿದ್ದರೆ (Home Loan), ಎಸ್‌ಐಪಿ ಜೊತೆಗೆ ಸಣ್ಣ ಮೊತ್ತದ ಪ್ರಿ-ಪೇಮೆಂಟ್ ಮುಂದುವರಿಸಬಹುದು. ವಾರಾಂತ್ಯದಲ್ಲಿ ಹಣ ಖರ್ಚು ಮಾಡದಿರುವ 'ನೋ-ಸ್ಪೆಂಡ್ ಚಾಲೆಂಜ್' ಮಾಡಿ, ಉಚಿತವಾಗಿ ಸಮಯ ಕಳೆಯುವ ಜಾಗಗಳಿಗೆ ಭೇಟಿ ನೀಡಿ!

ಕೊನೆಯಲ್ಲಿ, ಇಬ್ಬರೂ ಸೇರಿ ಒಂದು ಪುಟದ 'ಹಣಕಾಸು ಒಪ್ಪಂದ' (Money Pact) ಸಿದ್ಧಪಡಿಸಿ. ಅದರಲ್ಲಿ ನಿಮ್ಮಿಬ್ಬರ ಗುರಿಗಳು, ಖರ್ಚಿನ ಮಿತಿ, ಯಾರು ಯಾವ ಬಿಲ್ ಕಟ್ಟಬೇಕು, ಮುಂದಿನ ರಿವ್ಯೂ ದಿನಾಂಕ ಎಲ್ಲವನ್ನೂ ಸ್ಪಷ್ಟವಾಗಿ ಬರೆಯಿರಿ. ಯುಪಿಐ ಹಾಗೂ ಆಟೋ-ಪೇ ರಿಮೈಂಡರ್‌ಗಳನ್ನೂ ಸೇರಿಸಿ. ಇಬ್ಬರೂ ಅದಕ್ಕೆ ಸಹಿ ಮಾಡಿ, ಒಂದು ಫೋಟೋ ತೆಗೆದುಕೊಂಡು, ಪ್ರಿಂಟ್‌ಔಟ್ ಅನ್ನು ಫ್ರಿಡ್ಜ್‌ಗೆ ಪಿನ್ ಮಾಡಿ. ಈ ಸಣ್ಣ ಅಭ್ಯಾಸವು ವಿಶ್ವ ಮಿತವ್ಯಯ ದಿನದಂದು ನಿಮ್ಮ ಹಣಕಾಸಿನ ಮೇಲಿನ ನಿಯಂತ್ರಣ ಹೆಚ್ಚಿಸಿ, ದೀಪಾವಳಿಯನ್ನು ನೆಮ್ಮದಿಯಿಂದ ಆಚರಿಸಲು ನೆರವಾಗುತ್ತದೆ.