ಕಲಿಯುಗದ ದ್ರೌಪದಿ! ಇಬ್ಬರು ಸಹೋದರರ ಮದುವೆಯಾದ ಯುವತಿ; ಅಸಲಿ ಸತ್ಯ ಬಹಿರಂಗ

ಕಲಿಯುಗದ ದ್ರೌಪದಿ ಕಲ್ಯಾಣ! ಹಿಮಾಚಲದ ವಿಚಿತ್ರ ಸಂಪ್ರದಾಯ, ಒಂದೇ ಹೆಣ್ಣಿಗೆ ಇಬ್ಬರು ಗಂಡಂದಿರು. ಇಬ್ಬರು ಅಣ್ಣ-ತಮ್ಮನಿಗೆ ಒಬ್ಬಳೇ ಪತ್ನಿ. ಹೌದು, ಇದು ಶೂಟಿಂಗ್ ಅಲ್ಲ, ಸತ್ಯ ಘಟನೆ. ಇಬ್ಬರು ಸಹೋದರರ ಜೊತೆ ಒಂದೇ ಮಂಟಪದಲ್ಲಿ ಮದುವೆಯಾದ ಯುವತಿಯ ಕಥೆ ಇದು. ಹಿಮಾಚಲ ಪ್ರದೇಶದ ಹಾಥಿ ಸಮುದಾಯದಲ್ಲಿ ವಿಚಿತ್ರವಾದ ಬಹುಪತಿತ್ವ ಪದ್ಧತಿಯೊಂದು ಚಾಲ್ತಿಯಲ್ಲಿದೆ. ಈ ಪದ್ಧತಿಯಲ್ಲಿ ಸಹೋದರರಿಬ್ಬರು ಒಂದೇ ಯುವತಿಯನ್ನು ವಿವಾಹವಾಗುವ (two brothers marry one woman) ಸಂಪ್ರದಾಯವಿದೆ. ಇದು ದ್ವಾಪರ ಯುಗದ ದ್ರೌಪದಿಯ ಕತೆಯನ್ನು ನೆನಪಿಸುವಂತಿದೆ. ಈ ಅಪರೂಪದ ಆಚರಣೆಯ ಬಗ್ಗೆ ವಧು ಮತ್ತು ವರ ಸಂತಸ ವ್ಯಕ್ತಪಡಿಸಿದ್ದಾರೆ. ಇದು ನಮ್ಮೆಲ್ಲರ ಒಮ್ಮತದ ನಿರ್ಧಾರ ಎಂದು ಹೇಳಿದ್ದಾರೆ.

ಭಾರತದ ವಿವಾಹ ಸಂಸ್ಕೃತಿಯು ವಿಸ್ತಾರವಾಗಿದೆ. ಪ್ರದೇಶ, ಧರ್ಮ ಮತ್ತು ಸಮುದಾಯವನ್ನು ಅವಲಂಬಿಸಿ ವಿಭಿನ್ನ ಆಚರಣೆಗಳನ್ನು ಹೊಂದಿದೆ. ಇತ್ತೀಚೆಗೆ, ಹಿಮಾಚಲ ಪ್ರದೇಶದಲ್ಲಿ ಬಹುಪತಿತ್ವದ ಅಪರೂಪದ ಸಂಪ್ರದಾಯವು ವ್ಯಾಪಕ ಗಮನ ಸೆಳೆದಿದೆ. ಪ್ರದೀಪ್ ಮತ್ತು ಕಪಿಲ್ ನೇಗಿ ಎಂಬ ಇಬ್ಬರು ಸಹೋದರರು ಸುನೀತಾ ಚೌಹಾಣ್ (Sunita Chauhan) ಎಂಬ ಮಹಿಳೆಯನ್ನು ವಿವಾಹವಾಗಿ ಹಟ್ಟಿ ಸಮುದಾಯದ ಸಂಸ್ಕೃತಿಯನ್ನು ಬಹಿರಂಗವಾಗಿ ಆಚರಿಸಿದ್ದಾರೆ. ಈ ವಿವಾಹವು ವಧು ಮತ್ತು ವರರ ಪರಸ್ಪರ ಒಪ್ಪಿಗೆಯಿಂದ ನಡೆದಿದೆ. ಸಮುದಾಯದ ಜನರು ಸಹ ಇದರಲ್ಲಿ ಭಾಗವಹಿಸಿದ್ದರು.

ಸಮುದಾಯದ ಬೆಂಬಲ ಮತ್ತು ಪರಸ್ಪರ ಒಪ್ಪಿಗೆ

ಸಿರ್ಮೌರ್ ಜಿಲ್ಲೆಯ ಶಿಲ್ಲೈ ಗ್ರಾಮದ ನಿವಾಸಿಗಳಾದ ಪ್ರದೀಪ್ ನೇಗಿ (pradeep negi) ಮತ್ತು ಕಪಿಲ್ ನೇಗಿ (kapil negi) ಅವರು ಹತ್ತಿರದ ಕುನ್ಹಾಟ್ ಗ್ರಾಮದ ಸುನಿತಾ ಚೌಹಾಣ್ ಅವರನ್ನು ವಿವಾಹವಾದರು. ಅವರ ವಿವಾಹವು ಸಾಂಸ್ಕೃತಿಕ ಪರಂಪರೆಯಿಂದ ಕೂಡಿದ್ದು, ಸಮುದಾಯದ ಬೆಂಬಲ ಮತ್ತು ಪರಸ್ಪರ ಒಪ್ಪಿಗೆಯಿಂದ ನಡೆಸಲ್ಪಟ್ಟಿತು. ಸಹೋದರರು ಒಂದೇ ಹೆಂಡತಿಯನ್ನು ಮದುವೆಯಾಗುವುದು ಮತ್ತು ಹಂಚಿಕೊಳ್ಳುವ ಬಹುಪತಿತ್ವದ ಸಂಪ್ರದಾಯವನ್ನು ಮುಚ್ಚಿಡದೆ ಬಹಿರಂಗವಾಗಿ ಆಚರಿಸಿದ್ದು ವಿಶೇಷವಾಗಿತ್ತು.

'ದ್ರೌಪದಿ ಪ್ರಥ' ಹೆಸರಿನ ಬಹುಪತಿತ್ವ

ಹಟ್ಟಿ ಸಮುದಾಯದಲ್ಲಿ (Hatti community marriage) ಬಹುಪತಿತ್ವ ಪದ್ಧತಿಯು ಜೋಡಿದಾರನ್, ದ್ರೌಪದಿ ಪ್ರಥ ಅಥವಾ ದ್ರೌಪದಿ ಪದ್ಧತಿ (Draupadi Pratha) ಎಂದು ಕರೆಯಲ್ಪಡುತ್ತದೆ. ಈ ಪದ್ಧತಿಯು ಸಿರ್ಮೌರ್ ಜಿಲ್ಲೆಯ ಟ್ರಾನ್ಸ್-ಗಿರಿ ಪ್ರದೇಶ ಮತ್ತು ಉತ್ತರಾಖಂಡದ ಕೆಲವು ಭಾಗಗಳಲ್ಲಿ ಆಳವಾಗಿ ಬೇರೂರಿದೆ. ಕುಟುಂಬದ ಆಸ್ತಿಯನ್ನು ವಿಭಜಿಸುವುದನ್ನು ತಪ್ಪಿಸಲು ಮತ್ತು ಮಹಿಳೆಯರಿಗೆ ಸಾಮಾಜಿಕ ಭದ್ರತೆಯನ್ನು ಖಚಿತಪಡಿಸಿಕೊಳ್ಳಲು ಈ ಪದ್ಧತಿಯನ್ನು ಅನುಸರಿಸಲಾಗುತ್ತದೆ. ಸಾಮಾಜಿಕ ರೂಢಿಗಳು ಮತ್ತು ಆಧುನಿಕ ಪ್ರಭಾವಗಳಿಂದಾಗಿ ಇದರ ಆಚರಣೆ ಕಡಿಮೆಯಾಗಿದೆ. ಈ ಪದ್ಧತಿಯ ಮುಖ್ಯ ಉದ್ದೇಶವೆಂದರೆ, ಕುಟುಂಬದ ಐಕ್ಯತೆಯನ್ನು ಕಾಪಾಡುವುದು, ಪೂರ್ವಜರ ಭೂಮಿಯ ವಿಭಜನೆಯನ್ನು ತಡೆಯುವುದು ಮತ್ತು ಮಹಿಳೆ ವಿಧವೆಯಾಗಿ ಉಳಿಯದಂತೆ ನೋಡಿಕೊಳ್ಳುವುದು.

ನಾವಿಬ್ಬರೂ ಹೆಂಡತಿಗೆ ಪ್ರೀತಿ, ರಕ್ಷಣೆ ನೀಡುತ್ತೇವೆ

ಪ್ರದೀಪ್ ಜಲ ಶಕ್ತಿ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದರೆ, ಕಪಿಲ್ ವಿದೇಶದಲ್ಲಿ ಆತಿಥ್ಯ ಉದ್ಯಮದಲ್ಲಿ ಕೆಲಸ ಮಾಡುತ್ತಿದ್ದಾರೆ. ಹಿರಿಯ ಸಹೋದರ ಪ್ರದೀಪ್, ಈ ವಿವಾಹವು ನಂಬಿಕೆ ಮತ್ತು ಜವಾಬ್ದಾರಿಯ ಆಧಾರದ ಮೇಲೆ ತೆಗೆದುಕೊಂಡ ನಿರ್ಧಾರ ಎಂದು ಹೇಳಿದ್ದಾರೆ. 'ನಮ್ಮ ಇತಿಹಾಸದ ಬಗ್ಗೆ ನಮಗೆ ಹೆಮ್ಮೆ ಇದೆ. ಹಾಗಾಗಿ ನಾವು ನಮ್ಮ ಸಂಪ್ರದಾಯವನ್ನು ಬಹಿರಂಗವಾಗಿ ಅನುಸರಿಸಿದ್ದೇವೆ' ಎಂದು ತಿಳಿಸಿದ್ದಾರೆ. ವಿದೇಶದಲ್ಲಿ ಆತಿಥ್ಯ ಉದ್ಯಮದಲ್ಲಿ ಕೆಲಸ ಮಾಡುವ ಕಪಿಲ್, 'ನಾವು ಪಾರದರ್ಶಕತೆಯನ್ನು ನಂಬುತ್ತೇವೆ. ನಾನು ಸಾಗರೋತ್ತರದಲ್ಲಿ ವಾಸಿಸುತ್ತಿದ್ದರೂ, ಈ ವಿವಾಹವು ನಮ್ಮ ಹೆಂಡತಿಗೆ ಪ್ರೀತಿ, ರಕ್ಷಣೆ ಮತ್ತು ಒಂದುಗೂಡಿದ ಕುಟುಂಬದ ಭರವಸೆಯನ್ನು ನೀಡುತ್ತದೆ' ಎಂದು ಹೇಳಿದ್ದಾರೆ.

'ನಾನು ಇಷ್ಟಪಟ್ಟು ಒಪ್ಪಿಕೊಂಡೆ' ಎಂದ ವಧು

ವಧು ಸುನಿತಾ ಚೌಹಾಣ್ ಮಾತನಾಡಿ, 'ಇದು ನನ್ನ ಸ್ವಂತ ಆಯ್ಕೆ. ನನ್ನ ಮೇಲೆ ಯಾರೂ ಒತ್ತಡ ಹೇರಲಿಲ್ಲ. ಈ ಸಂಪ್ರದಾಯದ ಬಗ್ಗೆ ನನಗೆ ತಿಳಿದಿದೆ ಮತ್ತು ನಾನು ಇಷ್ಟಪಟ್ಟು ಒಪ್ಪಿಕೊಂಡಿದ್ದೇನೆ. ನಾವೆಲ್ಲರೂ ಒಟ್ಟಾಗಿ ಈ ನಿರ್ಧಾರವನ್ನು ತೆಗೆದುಕೊಂಡಿದ್ದೇವೆ, ಪ್ರತಿಜ್ಞೆ ಮಾಡಿದ್ದೇವೆ ಮತ್ತು ನಮ್ಮ ಸಂಬಂಧದ ಮೇಲೆ ನನಗೆ ನಂಬಿಕೆ ಇದೆ' ಎಂದು ತಿಳಿಸಿದ್ದಾರೆ.

ಮೂರು ದಿನಗಳ ಕಾಲ ನಡೆದ ವಿವಾಹ

ಮೂರು ದಿನಗಳ ಕಾಲ ನಡೆದ ಈ ವಿವಾಹದಲ್ಲಿ ಕುಟುಂಬ, ಸ್ನೇಹಿತರು ಮತ್ತು ಹತ್ತಿರದ ಗ್ರಾಮಸ್ಥರು ಭಾಗವಹಿಸಿದ್ದರು. ಈ ಅಪರೂಪದ ವಿವಾಹಕ್ಕೆ ಸಾಕ್ಷಿಯಾಗಲು ಅನೇಕ ಜನರು ಆಗಮಿಸಿದ್ದರು. ಅತಿಥಿಗಳಿಗೆ ಸಾಂಪ್ರದಾಯಿಕ ಟ್ರಾನ್ಸ್-ಗಿರಿ ಭಕ್ಷ್ಯಗಳನ್ನು ನೀಡಲಾಯಿತು. ಈ ಪ್ರದೇಶದಲ್ಲಿ ಮದುವೆಗಳಿಗೆ ಸಾಮಾನ್ಯವಾಗಿ ತಯಾರಿಸಲಾಗುವ ಸ್ಥಳೀಯ ಖಾದ್ಯಗಳು ಇದರಲ್ಲಿ ಸೇರಿವೆ. ಸಂತೋಷದ ವಾತಾವರಣದಲ್ಲಿ ಜನರು ಪಹಾಡಿ ಸಾಂಪ್ರದಾಯಿಕ ಹಾಡುಗಳಿಗೆ ಕುಣಿದು ಕುಪ್ಪಳಿಸಿದರು. ಜಾನಪದ ಗೀತೆ ಹಾಡಿದರು ಮತ್ತು ವಧು-ವರರಿಗೆ ಶುಭ ಹಾರೈಸಿದರು.

ಒಟ್ಟಾರೆಯಾಗಿ, ದ್ವಾಪರ ಯುಗದಲ್ಲಿ ದ್ರೌಪದಿ ಐವರು ಪಾಂಡವರನ್ನು ವಿವಾಹವಾಗಿ ಬಹುಪತಿತ್ವವನ್ನು ಸ್ವೀಕರಿಸಿದಳು. ಅದೇ ರೀತಿ, ಕಲಿಯುಗದಲ್ಲಿ ಹಿಮಾಚಲ ಪ್ರದೇಶದ ಹಾಥಿ ಸಮುದಾಯವು ಶತಮಾನಗಳ ಹಿಂದಿನ ಪದ್ಧತಿಯನ್ನು ಇಂದಿಗೂ ಉಳಿಸಿಕೊಂಡು ಬಂದಿದೆ. ಇದು ಸಹೋದರರು ಹೆಂಡತಿಯನ್ನು ಹಂಚಿಕೊಳ್ಳುವ ಒಂದು ಹಳೆಯ ಆಚರಣೆಯಾಗಿದೆ.