ಕಾರ್ಮಿಕರು ತಿಳಿದುಕೊಳ್ಳಲೇಬೇಕಾದ 'ಕಾರ್ಮಿಕ ಹಕ್ಕುಗಳು'

ಭಾರತದ ಕಾರ್ಮಿಕರ ದಿನಾಚರಣೆಯ ಮಹತ್ವ : -

ಸಂಸ್ಥೆಗೆ, ಸಮಾಜಕ್ಕೆ ಹಾಗೂ ದೇಶದ ಆರ್ಥಿಕ ಏಳಿಗೆಗೆ ಕಾರ್ಮಿಕರ ಸೇವೆ ಮತ್ತು ತ್ಯಾಗವನ್ನು ಗಮನದಲ್ಲಿಟ್ಟುಕೊಂಡು ವರ್ಷದಲ್ಲಿ ಅವರಿಗಾಗಿ ಒಂದು ದಿನ ಮೀಸಲಿಡಬೇಕು ಎಂದು ತೀರ್ಮಾನಿಸಿ ಪ್ರಾರಂಭ ಮಾಡಿದ ಈ ಆಚರಣೆ ಇಂದಿಗೂ ಕೂಡ ಪ್ರತಿ ವರ್ಷ ನಡೆಯುತ್ತಲೇ ಸಾಗಿದೆ. ಅಮೇರಿಕ ದೇಶದಲ್ಲಿ ಅಂದಿನ ಕಾಲದಲ್ಲಿ ಕೆಲಸಗಾರರ ವಿರುದ್ಧ ನಡೆಯುತ್ತಿದ್ದ ಶೋಷಣೆಗಳು, ಕಾರ್ಮಿಕರ ಹಿತ ಕಾಪಾಡದಂತಹ ಕಾನೂನುಗಳು, ಕಳಪೆ ಕೆಲಸದ ಪರಿಸ್ಥಿತಿಗಳು ಮತ್ತು ಅನಿಯಮಿತ ಕೆಲಸದ ಸಮಯಗಳ ವಿರುದ್ಧ ಕಾರ್ಮಿಕರು ಸಿಡಿದೆದ್ದಿದ್ದರು.

ಇವರ ಎಲ್ಲಾ ಬೇಡಿಕೆಗಳನ್ನು ಈಡೇರಿಸುವ ಮತ್ತು ಇವರ ಕಷ್ಟಗಳಿಗೆ ಪರಿಹಾರಗಳನ್ನು ಒದಗಿಸಿ ಕೊಡುವ ದಿನವಾಗಿ 19 ನೇ ಶತಮಾನದ ಅಂತ್ಯದಲ್ಲಿ ಮೇ 1 ರ ಕಾರ್ಮಿಕರ ದಿನ ಬದಲಾಯಿತು ಎಂಬ ಮಾತಿದೆ

ಈ ದಿನ ಆಘಾತಕಾರಿ ಘಟನೆಯೊಂದು ನಡೆದು ಹೋಯಿತು. ಕಾರ್ಮಿಕರು 16 ಗಂಟೆಗಳ ಕೆಲಸದ ಸಮಯವನ್ನು 8 ಗಂಟೆಗಳಿಗೆ ತಗ್ಗಿಸಬೇಕೆಂದು ಅಲ್ಲಿನ ಕಾರ್ಮಿಕ ನೀತಿಯನ್ನು ವಿರೋಧಿಸುತ್ತಾ ತಮ್ಮ ಪಾಡಿಗೆ ತಾವು ಮುಷ್ಕರದಲ್ಲಿ ಭಾಗಿಯಾಗಿದ್ದರು. ಸರ್ಕಾರದ ಆದೇಶದ ಮೇರೆಗೆ ಪೊಲೀಸರು ಇವರ ಮೇಲೆ ಗುಂಡಿನ ಮಳೆಗರೆದರು. ಆ ಸಂದರ್ಭದಲ್ಲಿ ಇಬ್ಬರು ಕಾರ್ಮಿಕರು ತಮ್ಮ ಪ್ರಾಣವನ್ನು ಕಳೆದುಕೊಂಡರು. ಇದರಿಂದ ಕುಪಿತಗೊಂಡ ಸಾವಿರಾರು ಕೆಲಸಗಾರರು ಮುಷ್ಕರದಲ್ಲಿ ಭಾಗಿಯಾದರು. ಮುಷ್ಕರ ಇನ್ನೂ ತೀವ್ರ ಸ್ವರೂಪ ಪಡೆದುಕೊಂಡಿತು.

ಆಗ ಅಂದರೆ 1916 ರ ಇಸವಿಯಲ್ಲಿ ಅಮೆರಿಕ ಸರ್ಕಾರ 8 ಗಂಟೆಗಳ ಕೆಲಸದ ಸಮಯವನ್ನು ಆದೇಶ ಮಾಡಿತು.

ಆದರೆ ಭಾರತದಲ್ಲಿ 1923 ನೇ ಇಸವಿಯ ಮೇ 1 ರಂದು " ಲೇಬರ್ ಕಿಸಾನ್ ಪಾರ್ಟಿ ಆಫ್ ಹಿಂದುಸ್ತಾನ್ " ಸ್ಥಾಪನೆಗೊಂಡ ದಿನದಿಂದ ಕಾರ್ಮಿಕರ ದಿನಾಚರಣೆಯನ್ನು ಆಚರಣೆ ಮಾಡಲಾಗುತ್ತದೆ. ಕಾರ್ಮಿಕರ ದಿನಾಚರಣೆಯ ದಿನದಂದು ರಾಷ್ಟ್ರೀಯ ರಜಾ ದಿನವಾಗಿ ಘೋಷಣೆ ಮಾಡಬೇಕೆಂದು ಮತ್ತು ಕಾರ್ಮಿಕರಿಗೆ ಅಂದಿನ ದಿನ ಕೆಲಸದಿಂದ ಬಿಡುವು ನೀಡಬೇಕೆಂದು ಸದನದಲ್ಲಿ ಮಸೂದೆ ಮಂಡಿಸಲಾಯಿತು.

ಅಂದಿನಿಂದ ಇಂದಿನವರೆಗೂ ಪ್ರತಿ ವರ್ಷ ಕಾರ್ಮಿಕರ ದಿನಾಚರಣೆಯನ್ನಾಗಿ ಆಚರಿಸಲಾಗುತ್ತಿದೆ. ಕೆಲವೊಂದು ರಾಷ್ಟ್ರಗಳಲ್ಲಿ ಬೇರೆ ಬೇರೆ ದಿನಗಳಲ್ಲಿಯೂ ಕಾರ್ಮಿಕರ ದಿನಾಚರಣೆಯನ್ನು ಆಚರಿಸುತ್ತಾರೆ.

ಈ ದಿನದಂದು ಸಂಸ್ಥೆಯ ಉದ್ಯೋಗಿಗಳು, ಒಕ್ಕೂಟದ ನಾಯಕರುಗಳು ಭಾಷಣ

ಅಂತರಾಷ್ಟ್ರೀಯ ಕಾರ್ಮಿಕರ ದಿನಾಚರಣೆಯ ಇತಿಹಾಸ : -

ಅಮೇರಿಕಾ ದೇಶದ ಚಿಕಾಗೋದಲ್ಲಿ 1886 ರ ಇಸವಿಯಲ್ಲಿ ಕಾರ್ಮಿಕರ ಒಕ್ಕೂಟ ದಿನಕ್ಕೆ ಎಂಟು ಗಂಟೆಗಳ ಕೆಲಸದ ವೇಳಾಪಟ್ಟಿಯನ್ನು ನಿಗದಿ ಮಾಡಬೇಕೆಂದು ಮುಷ್ಕರದಲ್ಲಿ ಪಾಲ್ಗೊಂಡಿದ್ದರು.

ದಿನ ಕಳೆದಂತೆ ಈ ಮುಷ್ಕರ ಹಿಂಸಾತ್ಮಕ ರೂಪವನ್ನು ಪಡೆಯಿತು. ದಂಗೆ ಎದ್ದ ಸಾವಿರಾರು ಕಾರ್ಮಿಕರನ್ನು ನಿಯಂತ್ರಣ ಮಾಡಲು ಪೊಲೀಸರು ಹರಸಾಹಸ ಪಡಬೇಕಾಯಿತು. ಬಾಂಬ್ ಗಳನ್ನು ಜನರ ಮೇಲೆ ಎಸೆಯಲು ಪ್ರಾರಂಭ ಮಾಡಿದರು.

ಈ ಸಂದರ್ಭದಲ್ಲಿ ಬಹಳಷ್ಟು ಮುಗ್ಧ ಜನರು, ಕಾರ್ಮಿಕರು ತಮ್ಮ ಪ್ರಾಣ ತ್ಯಾಗ ಮಾಡಿದರು. ಹಲವಾರು ಜನ ಗಾಯಗೊಂಡರು. ಇದನ್ನು ಖಂಡಿಸಿ ವಿಶ್ವದ ನಾನಾ ಭಾಗಗಳಲ್ಲಿ ಪ್ರತಿಭಟನೆ ಪ್ರಾರಂಭವಾಯಿತು. ಇದರ ನೆನಪಿಗಾಗಿ ಅಂತರಾಷ್ಟ್ರೀಯ ಕಾರ್ಮಿಕ ದಿನಾಚರಣೆಯನ್ನಾಗಿ ಆಚರಣೆ ಮಾಡಲಾಗುತ್ತದೆ.

ನಮ್ಮ ಭಾರತದಲ್ಲಿ ತಮಿಳುನಾಡಿನ ರಾಜಧಾನಿಯಾದ ಮದ್ರಾಸ್ ( ಈಗಿನ ಚೆನ್ನೈ ) ನಲ್ಲಿ 1923 ರಲ್ಲಿ ಪ್ರಪ್ರಥಮ ಬಾರಿಗೆ ಆಚರಿಸಲಾಯಿತು. ಈ ದಿನ ಇಡೀ ದೇಶಾದ್ಯಂತ ವ್ಯಾಪಾರ ಸಂಘಗಳಿಂದ ಮೆರವಣಿಗೆ ನಡೆಸಲಾಗುತ್ತದೆ.

ವಿದ್ಯಾರ್ಥಿಗಳಲ್ಲಿ ದುಡಿಮೆಯ ವರ್ಗದ ಬಗ್ಗೆ ಜಾಗೃತಿ ಮೂಡಿಸಲು ಹಲವಾರು ಆಂದೋಲನಗಳನ್ನು, ಬೀದಿ ನಾಟಕಗಳನ್ನು ಆಯೋಜಿಸಲಾಗುತ್ತದೆ. ರಾಜಕಾರಣಿಗಳನ್ನು ಆಹ್ವಾನಿಸಿ ಭಾಷಣ ಮಾಡಿಸಲಾಗುತ್ತದೆ. ಕಾರ್ಮಿಕರ ಹಕ್ಕುಗಳ ಬಗ್ಗೆ ತಿಳಿಸಿ ಹೇಳಲಾಗುತ್ತದೆ. ಅಂತರಾಷ್ಟ್ರೀಯ ಕಾರ್ಮಿಕರ ಒಕ್ಕೂಟವು ಈ ದಿನದಂದು ಹಲವಾರು ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತದೆ.

ಕಾರ್ಮಿಕರ ದಿನಾಚರಣೆ ಇಡೀ ವಿಶ್ವಕ್ಕೆ ಸಂಬಂಧಿಸಿದ್ದು : -

ಮೊದಲೇ ಹೇಳಿದಂತೆ ಕಾರ್ಮಿಕರ ದಿನಾಚರಣೆ ಕೇವಲ ಭಾರತದಲ್ಲಿ ಆಚರಣೆ ಮಾಡುವ ಪದ್ಧತಿಯಲ್ಲ.

ಹಲವಾರು ಯುರೋಪಿಯನ್ ರಾಷ್ಟ್ರಗಳಾದ ಸ್ವೀಡನ್, ಫ್ರಾನ್ಸ್, ಪೋಲ್ಯಾಂಡ್, ಫಿನ್ಲ್ಯಾಂಡ್, ನಾರ್ವೆ, ಸ್ಪೇನ್, ಇಟಲಿ, ಜರ್ಮನಿ, ಪನಾಮ, ಕ್ಯೂಬಾ, ಮೆಕ್ಸಿಕೋ, ಗುಯಾನ, ಪೆರು,ಉರುಗ್ವೆ, ಬ್ರೆಜಿಲ್, ಅರ್ಜೆಂಟೈನಾ, ಚೈಲ್, ಕೆನಡಾ, ಅಮೇರಿಕಾ, ಆಸ್ಟ್ರೇಲಿಯಾ ಮತ್ತು ಇತ್ಯಾದಿ ದೇಶಗಳಲ್ಲಿ ಸಂತೋಷ ಸಡಗರಗಳಿಂದ ಆಚರಣೆ ಮಾಡಿ ಸಂಭ್ರಮ ವ್ಯಕ್ತಪಡಿಸುತ್ತಾರೆ. ಕೆಲವೊಂದು ರಾಷ್ಟ್ರಗಳಲ್ಲಿ ಇದೊಂದು ಸಾಂಪ್ರದಾಯಿಕ ಆಚರಣೆಯಾಗಿ ಬದಲಾಗಿ ಆಚರಿಸಲ್ಪಡುತ್ತಿದೆ.

ಈ ದಿನ ಬ್ಯಾಂಕುಗಳಿಗೆ ರಜೆ ಇಲ್ಲದಿದ್ದರೂ ಮೇ ತಿಂಗಳ ಮೊದಲ ಸೋಮವಾರದಂದು ಅವರಿಗೆ ಕಾರ್ಮಿಕರ ದಿನವಾಗಿ ಬದಲಾಗಿರುತ್ತದೆ. ಇಂಗ್ಲೆಂಡ್ ದೇಶದಲ್ಲಿ ಈ ದಿನ ಮೋರಿಸ್ ನೃತ್ಯ ಮತ್ತು ಮೇ ಪೋಲ್ ಸುತ್ತಲು ನಡೆಯುವ ನೃತ್ಯ ನೋಡಲು ನಯನ ಮನೋಹರ.

ಸೋವಿಯತ್ ಒಕ್ಕೂಟದ ಅಧಿಕೃತ ಪ್ರಶಂಸೆಯನ್ನು 20 ನೇ ಶತಮಾನದಲ್ಲಿ ಮೇ ದಿನಕ್ಕೆ ನೀಡಲಾಯಿತು. ಜರ್ಮನಿಯಲ್ಲಿ 1933 ರಲ್ಲಿ ಕಾರ್ಮಿಕರ ದಿನವನ್ನು ರಜಾ ದಿನವನ್ನಾಗಿ ಘೋಷಣೆ ಮಾಡಲಾಯಿತು.

ನಮ್ಮ ಭಾರತದಲ್ಲಿ ಹಲವಾರು ರಾಜ್ಯಗಳಲ್ಲಿ ಕಾರ್ಮಿಕರ ದಿನಾಚರಣೆ ಆಚರಿಸಲ್ಪಡುತ್ತದೆ. ಆಯಾ ರಾಜ್ಯದ ಜನರು ಅವರವರ ಭಾಷೆಯಲ್ಲಿ ಈ ದಿನವನ್ನು ಕರೆಯುತ್ತಾರೆ.

ಉದಾಹರಣೆಗೆ ಹಿಂದಿಯಲ್ಲಿ ' ಕಾಮ್ಗರ್ ದಿನ ' ಎಂದು, ಮರಾಠಿಯಲ್ಲಿ ' ಕಾಮ್ಗರ್ ದಿನ್ ' ಎಂದು ಮತ್ತು ತಮಿಳು ಭಾಷೆಯಲ್ಲಿ ' ಉಜೈಪಾಲರ್ ಧಿನಂ ' ಎಂದು ಕರೆಯುತ್ತಾರೆ.

ಕಾರ್ಮಿಕರ ದಿನಾಚರಣೆ ಮತ್ತು ಕಾರ್ಮಿಕರ ಹಕ್ಕುಗಳು : -

ಕಾರ್ಮಿಕ ದಿನಾಚರಣೆ ಆಚರಣೆ ಮಾಡುವ ಉದ್ದೇಶವೇ ಕಷ್ಟ ಪಟ್ಟು ದುಡಿಯುವ ಕಾರ್ಮಿಕರಿಗೆ ಗೌರವ ಸಲ್ಲಿಸಬೇಕೆಂದು. ಇಡೀ ವಿಶ್ವದಾದ್ಯಂತ ಎಲ್ಲಿಯೂ ಸಹ ಯಾವುದೇ ಸಂಸ್ಥೆಯಲ್ಲಿ ಯಾವೊಬ್ಬ ಕಾರ್ಮಿಕನನ್ನು 8 ಗಂಟೆಗಳಿಗಿಂತ ಅಧಿಕವಾಗಿ ಕೆಲಸ ಮಾಡಿಸಿಕೊಳ್ಳುವಂತಿಲ್ಲ.

ಹಾಗೂ ಕೆಲಸ ಮಾಡಿಸಿಕೊಂಡರೆ ಅದಕ್ಕೆ ಸರಿಯಾದ ವೇತನವನ್ನು ನಿಗದಿ ಮಾಡಿ ಸಂಬಳದ ಜೊತೆಗೆ ಆತನಿಗೆ ಪಾವತಿಸಬೇಕು. ಇದರ ಬಗ್ಗೆ ಪ್ರತಿಯೊಬ್ಬ ಕಾರ್ಮಿಕರಿಗೂ ಅರಿವಿರಬೇಕು. ಕೇವಲ ಸಂಭ್ರಮಾಚರಣೆಯಿಂದ ಮುಕ್ತಾಯ ಆಗದೆ ಎಲ್ಲಾ ಕಾರ್ಮಿಕರಿಗೂ ಈ ಬಗ್ಗೆ ಜಾಗೃತಿ ಮೂಡಿಸಬೇಕು.